Sara Timoteo 2:1-15
2 Si oföna, uʼandrö khömi enaʼö miʼangandrö salahi niha fefu, miʼandrö wanolo khö Lowalangi soroi ba dödö ba miʼandrö saohagölö khönia.
2 Miʼangandrö salahi razo hegöi ira samatörö fefu,+ enaʼö ahono ba ohahau dödöda ba waʼauri ba wamosumange Lowalangi soroi ba dödö ba si fao fangodödögö.+
3 Daʼö zi sökhi ba somasi Lowalangi, Sangorifi yaʼita,+
4 enaʼö teʼorifi fefu niha+ ba lasöndra waʼaboto ba dödö si tefaudu sanandrösa ba zindruhu.
5 Ha samösa Lowalangi,+ ba ha samösa zangagö talu gotalua+ ba gotaluara Lowalangi faoma niha,+ yaʼia daʼö niha andrö, Keriso Yesu,+
6 sanehegö faʼaurinia tobali höli si tefaudu soguna ba niha fefu.+ Daʼö wamaduhuʼö nituriaigö ba ginötö si no mutatugöi.
7 Börö wamaduhuʼö andre+ wa lafatenge ndraʼo tobali sanuriaigö, sinenge,+ ba samahaʼö ba ngawalö soi+ sanandrösa ba wamati hegöi ba zindruhu. Sindruhu fefu niwaʼögu andre, tenga faya.
8 Börö daʼö, omasido na fefu ndra matua mangandrö ira gofu hezo, lafazawa dangara niʼamoniʼö,+ si lö fönu+ ba si lö fabuʼa-buʼasa.+
9 Simanö göi ndra alawe, enaʼö lahaogö ira faoma nukha soadu ba sinangea, lö fayawa ba iʼila ifatimbaisi, tenga fondrandra bu ba famake anaʼa, mutiara, mazui nukha sebua böli,+
10 hizaʼi yamuhaogö mbotonia ira alawe faoma bua-bua si sökhi moloʼö sinangea ba ndra alawe sangataʼufi Lowalangi.+
11 Yaʼahono ndra alawe ba gangowuloa mbanua niha Keriso na lafahaʼö ira ba si fao foloʼö.+
12 Lö utehegö na mamahaʼö ndra alawe mazui lafatörö ndra matua. Si sökhinia enaʼö lahonogö ira,+
13 börö me oföna tewöwöi Gadamo awena Khawa.+
14 Mendrua manö, tenga Adamo zi telimo, hizaʼi ira alawe andrö nilimo+ irege ifalua horö.
15 Hewaʼae simanö, telumöʼö ndra alawe na moʼono ia,+ asala iʼaroʼö* wamatinia, faʼomasi, fangamoniʼö, ba iʼila ifatimbaisi hadia ia.+
Nisura ba gahe zura
^ Sin.: ”laʼaroʼö”.
