Sara Timoteo 3:1-16
3 Tola mufaduhusi tödö wehede daʼa: Na so ndra matua sangodödögö ba wangai halöwö tobali sondröniaʼö ba mbanua niha Keriso,+ no halöwö si sökhi niʼaluinia.
2 Sondröniaʼö andrö enaʼö lö mosinegu, böi samodombua donga, sangila mamatörö faʼaurinia, sangila mamatimbaisi hadia ia,+ ahono, lö abua gölönia wanemaʼö tome,+ onekhe mamahaʼö,+
3 tenga samadu-madu tuo,+ tenga si faʼudu-udu, lö fatandro,+ tenga si fakara-kara,+ tenga sangomasiʼö kefe,+
4 ira matua sondröniaʼö* ösi nomonia ba zi sökhi, si so iraono soloʼö-loʼö ba si sökhi amuata+
5 (na so ndra matua si lö mangila mondröniaʼö* ösi nomonia samösa, hewisa wa tola irorogö nono mbanua Lowalangi?),
6 tenga sawena mubayagö idanö,+ enaʼö lö fayawa ia, lua-luania itema wanguhuku simane si göna khö Gafökha.
7 Baero daʼö, enaʼö si sökhi duriania* baero mbanua niha Keriso,+ enaʼö lö teʼoʼaya* ia ba itandrawaisi ia Afökha.
8 Simanö göi genoni enaʼö sangodödögö fohalöwö, böi si dua lela,* tenga samadu-madu tuo, lö fakhögusa ba wangalui hare si lö atulö,+
9 lö faröi ia ba zi tobini niʼamoniʼö andrö sanandrösa ba wamati si fao tödö side-ide si lö sinegu.+
10 Baero daʼö, mutandraigö ira ua sakali na sinangea, ba na lö hadöi niböbögö khöra, awena tola lafataro ira tobali enoni.+
11 Simanö göi ndra alawe, enaʼö sangodödögö fohalöwö, lö laʼobousi nawöra,+ sangila mamatörö faʼaurinia, ba lö faröi ba ngawalö hadia ia.+
12 Enoni andrö böi samodombua donga, sondröniaʼö iraononia hegöi ösi nomonia ba zi sökhi.
13 Ira matua sangodödögö halöwönia isöndra döi si sökhi, ba lö aiwö ia wahuhuosa ba wamati sanandrösa khö Keriso Yesu.
14 Usura khömi fefu daʼa hewaʼae omasido na falukha ita ba waʼalio,
15 hewaʼae na ahou waʼatoharegu, aboto ba dödömi hewisa zinangeania gamuatami ba nomo Lowalangi,+ yaʼia daʼö banua niha Keriso khö Lowalangi sauri, si tobali ehomo, ba sotuhini sindruhu.
16 Sindruhunia, moguna sibai zi tobini andrö niʼamoniʼö sanandrösa ba wamosumange Lowalangi soroi ba dödö: ’Oroma me tobali ia niha,+ lafaduhuʼö wa satulö ia me tobali eheha,+ ifalukhaisi ndra malaʼika,+ laturiaigö ba gotalua soi fefu,+ faduhu dödö niha gulidanö,+ latemaʼö ia ba zorugo ba tefolakhömi.’
Nisura ba gahe zura
^ Mazui ”samatörö”.
^ Mazui ”mamatörö”.
^ Mazui ”nidunö-dunö sanandrösa khönia”.
^ Mazui ”teʼailasi”.
^ Mazui ”böi si falimo”.
