Sura Yohane Siföföna 1:1-10
1 Masura khömi zanandrösa khönia si no so iʼotarai mböröta, si no maʼila faoma höröma, si no anehe ndraʼaga, ba si no mababaya faoma tangama, yaʼia daʼö taromali fangorifi.+
2 (No oroma khöma waʼauri si lö aetu. No maʼila ba mafaduhuʼö khömi iadaʼa+ ba maʼombakhaʼö. Iʼotarai khö Nama waʼauri si lö aetu andre,+ ba no oroma khöma daʼö.)
3 Hadia zi no maʼila ba marongo, daʼö nifatunöma khömi+ enaʼö hasara göi dödömi khöma, eluahania hasara dödömi khö Namada hegöi khö Nononia Yesu Keriso.+
4 Masura daʼa fefu enaʼö moʼahonoa waʼomuso dödöda.
5 Yaʼe duria nirongoma moroi khönia ba mafatunö khömi iadaʼa: Lowalangi andrö umbu haga,+ ba lö hadöi khönia faʼogömi-gömi.
6 Na tawaʼö, ”Hasara dödöda khö Lowalangi,” hizaʼi lö taböhöli wanörö lala sogömi-gömi, eluahania no falimo ita ba lö tatörö zindruhu.+
7 Na mowaö-waö ita ba haga, simane Lowalangi andrö si so ba haga, tola teʼosambuaʼö ita. Tola iʼefaʼö fefu horöda do Nononia Yesu.+
8 Na tawaʼö, ”Lö horöda,” eluahania no talimo ita+ ba lö ba dödöda zindruhu.
9 Lowalangi andrö lö faröi ba satulö. Na tafatunö horö nifaluada, iʼefaʼö horöda ba ihaogö ita moroi ba gamuata si lö sökhi.+
10 Hizaʼi na tawaʼö, ”Lö irai tafalua horö,” hulö no tabaliʼö si falimo Lowalangi andrö, ba lö hadöi bakha ba dödöda taromalinia.
