Dua Ngaʼötö 10:1-19
-
Molawa ndraono Gizara’eli khö Rehabeamo (1-19)
10 Möi Rehabeamo ba Zikhema+ ba möi göi ndraono Gizaraʼeli ba daʼö ba wamataro yaʼia tobali razo.+
2 Me irongo daʼö Yerobeamo+ ono Nebati, ba Miserai nasa toröi ia börö me no moloi ia föna Razo Selomo,+ andrö wa mangawuli ia moroi ba Miserai.
3 Ba so samösa nifatenge ba wogaoni yaʼia, ba möi Yerobeamo awö ndraono Gizaraʼeli fefu wamalukhaisi Rehabeamo lamane,
4 ”Abua sibai noro nibeʼe namau khöma.+ Na öʼalösi noro awö halöwö sabua nibeʼenia khöma, hasambalö tobaliga enonimö.”
5 Imane Razo, ”Mifuli ami ba daʼa tölu hari tö.” Ba mofanö ira.+
6 Aefa daʼö manofu Razo Rehabeamo khö ndra satua mbanua, yaʼia daʼö ira sanuturu lala khö Zelomo me lö si mate nasa Zelomo. Imane, ”Moloʼö yaʼami, hadia wanema li nibeʼegu khö ndra niha daʼa?”
7 Lamane, ”Na öfalua zi sökhi khö ndra niha daʼö, öʼomusoiʼö dödöra, ba sökhi wameʼeu fanema li khöra, lö tebulö tobali ira enoniu.”
8 Hizaʼi, lö iʼoʼö mene-mene nibeʼe ndra satua mbanua andrö khönia ba iʼandrö mbua gera-era zi bohou ebua si fagölö döfi khönia, si no tobali enoninia.+
9 Manofu ia, ”Moloʼö yaʼami, hadia wanema li si tefaudu na so zanofu khögu, ’Alösi noro awö halöwö sabua nibeʼe namau khöma’?”
10 Lamane ira si bohou ebua si fagölö döfi khönia andrö, ”Na so niha sangumaʼö, ’Abua sibai noro nibeʼe namau khöma, hizaʼi maʼandrö khöu enaʼö öʼalösi noro nibeʼenia andrö,’ ömane khöra: ’Abölö abeʼe ndraʼo nasa moroi khö namagu.*
11 Ibeʼe amagu khömi noro sabua, hizaʼi hasambalö unönö nasa daʼö. Ihuku ami amagu si fao bözi-bözi si toʼölö, na yaʼo uhuku ami faoma bözi-bözi sodoi.’”
12 Ba ngaluo si tölu, möi Yerobeamo awö ndraono Gizaraʼeli ba wangondrasi Razo Rehabeamo börö me no irai iwaʼö daʼa Razo ba zilalö, ”Mifuli ami ba daʼa tölu hari tö.”+
13 Hizaʼi, lö sökhi wanema Razo fehedera. Lö iʼoʼö Razo Rehabeamo mene-mene nibeʼe ndra satua mbanua.
14 Iʼoʼö mene-mene ndra si bohou ebua ba imane, ”Unönö wameʼe khömi noro sabölö abua. Ihuku ami amagu si fao bözi-bözi si toʼölö, ba yaʼo uhuku ami faoma bözi-bözi sodoi.”
15 Lö ifondrondrongo Razo niwaʼöra. Lowalangi sindruhu mbörö wa alua daʼö+ fefu irege itörö niwaʼö Yehowa khö Yerobeamo ono Nebati nifaʼemania khö Gahia+ niha Zilo andrö.
16 Lamane iraono Gizaraʼeli börö me lö ifondrondrongo Razo niwaʼöra, ”Lö hadöi urusama khö Dawido. Lö hadöi ondröita nibeʼe nono Gizaʼi andrö khöma. Yaʼami iraono Gizaraʼeli, miʼangawuli khö lowalangimi zamösana. Yaʼami ngaʼötö Dawido, miʼurusai samösa ami!”+ Mangawuli fefu ndraono Gizaraʼeli ba nomora.*+
17 Lö tebulö mamatörö Rehabeamo ba ndraono Gizaraʼeli si toröi ba mbanua Yehuda.+
18 Aefa daʼö, ifatenge Hadoramo andrö Razo Rehabeamo,+ samaigi-maigi niha nifaso ba wohalöwö, hizaʼi latebu ia kara iraono Gizaraʼeli irege mate. Moloi Razo Rehabeamo ba Yeruzalema itörö gureta wasuwöta.+
19 Irugi maʼökhö, mamadaö ndraono Gizaraʼeli ba ngaʼötö Dawido.
Nisura ba gahe zura
^ Sin.: ”Abölö esolo durugu siakhi moroi ba löwi-löwi namagu”.
^ Sin.: ”ba nosera”.
