Dua Ngaʼötö 15:1-19
-
Famohouni nifalua Asa (1-19)
15 Samuza maʼökhö, itema geheha Lowalangi Asaria ono Godedi.
2 Börö daʼö, möi ia ifalukhaisi Asa ba imane, ”Mifondrondrongo niwaʼögu, yaʼugö Asa ba fefu niha Yehuda awö Mbeniami! Lö faröi khömi Yehowa na lö faröi ami khönia.+ Na miʼalui ia, itehegö misöndra ia.+ Hizaʼi na miröi ia, hasambalö iröi ami.+
3 No ara lö hadöi Lowalangi sindruhu ba ndraono Gizaraʼeli, lö hadöi ere samahaʼö, ba lö hadöi oroisa.+
4 Hizaʼi ba ginötö waʼatosasa, lafuli ira khö Yehowa Lowalangi ndraono Gizaraʼeli ba laʼalui ia irege itehegö lasöndra ia.+
5 Me luo daʼö, lö faʼahono dödö ba niha sofanö hegöi sangawuli börö me tola teʼala waʼaurira me oya sibai waʼafawuka ba gotalua nono mbanua soi daʼö.
6 Adudu soi si sambua ibeʼe soi si sambua, adudu mbanua si sambua ibeʼe banua si sambua, börö me lö iböhöli wamawukaisi yaʼira Lowalangi ba oya ngawalö gabula dödö salua.+
7 Hizaʼi, moguna barani ami ba böi awuwu*+ börö me tefahowuʼö dania nifaluami.”
8 Me irongo wehede daʼö hegöi nifaʼeleʼö Godedi, barani Asa ba idudugö fefu nadu niʼogorofi Lowalangi ba zi sagörö Yehuda+ awö Mbeniami hegöi ba mbanua si so ba hili Geferai si no irabu. Ifuli iʼehaogö naha wanunu sumange khö Yehowa si so föna kaki lima nomo Yehowa.+
9 Iʼowuloi göi fefu nono mbanua Yehuda awö Mbeniami, simanö göi niha si fatewu si fao khöra moroi ba Geferai, Manase, ba Simeoni.+ Me aboto ba dödöra wa fao khönia Lowalanginia Yehowa, faʼawö ira khönia ba laröi Gizaraʼeli.
10 Owulo ira ba Yeruzalema ba mbaŵa si tölu me no 15 fakhe mamatörö Asa.
11 Ba zi maʼökhö daʼö, labeʼe zumange khö Yehowa 700 ngaʼeu zawi ba 7.000 mbiri-biri si no larabu.
12 Aefa daʼö lafalua mbuʼusa li ba wangalui Yehowa Lowalangi ndra tuara, soroi ba dödö hegöi nosora* maʼasambua.+
13 Haniha zi lö mangalui Yehowa Lowalangi ndraono Gizaraʼeli hasambalö labunu, iraono, satua, ira matua hegöi ira alawe.+
14 Laʼebuaʼö lira weʼamöi ba hölu khö Yehowa, muʼao ira si fao faʼomuso dödö, ba lafoli dorofe nifazökhi moroi ba dandru awö dorofe tanö böʼö.
15 Omuso dödö niha Yehuda maʼafefu ba hölura andrö, börö me no möi ira ba hölu soroi ba dödö, laforege wangalui yaʼia, ba itehegö khöra ba wanöndra yaʼia.+ Lö aetu-aetu iʼefaʼö ira Yehowa ba danga nudu samasui yaʼira.+
16 Iheta nenenia Maʼakha+ andrö Razo Asa moroi ba dadaoma salawa* börö me no ifazökhi nadu sogoro ita niʼogunaʼö ba wamosumange döla-döla niʼamoniʼö.*+ Idudugö nadu andrö Asa, irasa, ba itunu ba Ndraso Kidorona.+
17 Hizaʼi, lö ihori naha wamosumange*+ ba Gizaraʼeli.+ Hewaʼae simanö, lö tebulö iʼosambuaʼö dödönia ba wamosumange Lowalangi sandrohu faʼaurinia.+
18 Ibeʼe ba nomo Lowalangi sindruhu gama-gama si no iʼamoniʼö awö gama-gama niʼamoniʼö namania simane firö, anaʼa hegöi ngawalö fakake tanö böʼö.+
19 Irugi me 35 fakhe mamatörö Asa, lö irai alua wasuwöta.+
Nisura ba gahe zura
^ Sin.: ”böi mitehegö adada dangami”.
^ Faigi Geluaha Ngawua Wehede.
^ Sin.: ”ba dadaoma waʼaratu”.
^ Faigi Geluaha Ngawua Wehede.
^ Sin.: ”nahia sagalawa”.
