Dua Ngaʼötö 17:1-19
17 Aefa daʼö, ononia Yozafati+ zi tobali razo fangalinia. Iʼaroʼö dadaomania ba Gizaraʼeli.
2 Ifataro zaradadu ba mbanua nifoʼöli si so ba Yehuda maʼafefu, ba ifazökhi naha wanaro ndra saradadu ba Yehuda hegöi ba mbanua si so ba Geferai nirabu namania Asa.+
3 Lö faröi Yehowa khö Yozafati, börö me iʼoʼö lala duania Dawido+ ba lö ifosumange lowalangi Mbaʼali.
4 Iʼalui Lowalangi nifosumange namania+ ba iʼoʼö goroisania. Lö iʼoʼö gamuata ndraono Gizaraʼeli.+
5 Aro dadaoma andrö ba dangania ibeʼe Yehowa.+ Baero daʼö, fefu niha Yehuda lö aetu labeʼe khönia mbuala irege kayo sibai ia ba tefolakhömi.+
6 Lö ataʼu ia woloʼö lala Yehowa. Idudugö naha wamosumange*+ hegöi döla-döla niʼamoniʼö*+ ba Yehuda.
7 Me no tölu fakhe mamatörö ia, ikaoni fefu zondröniaʼö yaʼia daʼö Beni-haili, Obadia, Zakharia, Netaneʼeli hegöi Mikhaya, enaʼö mamahaʼö ira ba mbanua Yehuda.
8 So göi niha Lewi si fao khöra, yaʼia daʼö Semaya, Netania, Sebadia, Azaheli, Semiramoto, Yehonata, Adonia, Tobia, Tobi-adonia, hegöi Elisama awö Yoramo sangai halöwö tobali ere.+
9 Labörögö wamahaʼö ba Yehuda laʼohe mbuku Goroisa Yehowa.+ Latöröi fefu mbanua Yehuda ba wamahaʼö niha.
10 Fefu wamatörö si so ba zi fasui Yehuda, ataʼu ira khö Yehowa ba lö barani lalawa Yozafati.
11 Laʼohe mbuala awö gefe khö Yozafati ira niha Wilisiti si tobali beʼelö. Laʼohe khönia ira niha Garabi 7.700 ngaʼeu mbiri-biri si matua ba 7.700 ngaʼeu nambi si matua moroi ba ngawawa guriföra.
12 Itugu abölö Yozafati,+ ba lö iböhöli wamazökhi banua nifoʼöli+ hegöi banua wangiröʼö+ ba Yehuda.
13 Oya halöwö sebua nifaluania ba Yehuda. So göi khönia zaradadu sagabölö ba Yeruzalema.
14 Daʼa wangerai yaʼira moloʼö ösi nomo zatuara ira matua: kumandru zi saribu moroi ba Yehuda yaʼia daʼö Adena nifili tobali sondröniaʼö. Fao khönia 300.000 zaradadu sagabölö.+
15 Si tobali ngoni-ngoninia yaʼia daʼö Yohanano nifili tobali kumandru. Fao khönia 280.000 niha.
16 Ngoni-ngoninia tanö böʼö yaʼia daʼö Amasia ono Zikhiri, si no molulu faʼaurinia ba wamosumange Yehowa. Fao khönia 200.000 zaradadu sagabölö.
17 Moroi ba Mbeniami:+ Eliada andrö samösa saradadu sabölö. Fao khönia 200.000 niha solohe fana sinali hegöi baluse.+
18 Si tobali ngoni-ngoninia yaʼia daʼö Yosabada. Fao khönia 180.000 zaradadu solohe fangöna.
19 Yaʼira andre zangai halöwö khö Razo, lö nasa si farahu niha nifataro Razo ba mbanua nifoʼöli ba zi sagörö Yehuda.+
