Dua Ngaʼötö 21:1-20
21 Aefa daʼö, mate Yozafati* ba lakoʼo ia ba ngai ndra tuania ba Mbanua Dawido, ba ononia Yoramo zi tobali razo fangalinia.+
2 Ono Yozafati tanö böʼö yaʼia daʼö Asaria, Yehieli, Zakharia, Asaria, Mikhaʼeli, ba Sefatia. Yaʼira andrö fefu nono Yozafati razo ndraono Gizaraʼeli.
3 Oya mbuala nibeʼe namara khöra simane firö, anaʼa, gama-gama sebua böli, hegöi banua nifoʼöli ba Yehuda.+ Hizaʼi, ononia Yoramo+ nifataronia tobali razo börö me yaʼia ziaʼa.
4 Me no mamatörö Yoramo ba mbanua nifatörö namania, iʼaroʼö dadaomania. Ihalö wödania ba ibunu fefu ndra talifusönia+ fabaya ira sondröniaʼö ösa ba Gizaraʼeli.
5 Faʼalawa ndröfinia me tobali ia razo yaʼia daʼö 32 fakhe, ba walu fakhe mamatörö ia ba Yeruzalema.+
6 Itörö lala razo-razo ndraono Gizaraʼeli,+ simane nifalua nösi nomo Gahabi, börö me ono Gahabi woʼomonia.+ Lö iböhöli wamalua si lö sökhi föna Yehowa.
7 Hizaʼi, lö omasi Yehowa ba wangohori ngaʼötö Dawido börö mbuʼusa linia khö Dawido.+ No ifabuʼu khönia Lowalangi wa lö tebulö mamatörö ngaʼötönia* irugi zi lö aetu.+
8 Ba götö Yoramo, mamadaö niha Gedomo ba wolawa famatörö Yehuda,+ ba latuyu samösa razora.+
9 Börö daʼö, möi Yoramo hegöi ira kumandru zaradadunia ba Gedomo, fao fefu zaradadunia solohe kureta wasuwöta. Ba zi bongi, möi ia ikalaisi niha Gedomo si no mamaʼuʼu yaʼia awö gumandru zaradadu solohe kureta wasuwöta.
10 Hizaʼi, lö iböhöli wamadaö Edomo ba wolawa Yehuda irugi maʼökhö. Me luo daʼö, fao göi Libena+ ba wamadaö börö me no iʼerogö Yehowa Lowalangi ndra tuania.+
11 Ifazökhi göi naha wamosumange*+ ba hili Yehuda irege faröi mbanua Yeruzalema khö Lowalangi,* ba ifaelungu Yehuda.
12 Ba gafuriata, itema zura moroi khö Gelia+ samaʼeleʼö. Ösi zurania yaʼia daʼö, ”Daʼa niwaʼö Yehowa, Lowalangi duamö Dawido: ’Lö öʼoʼö lala namau Yozafati+ mazui lala Asa+ razo Yehuda.
13 Hizaʼi, öʼoʼö lala razo-razo ndraono Gizaraʼeli.+ Yaʼugö zamaelungu niha Yehuda awö Yeruzalema irege faröi ira khö Lowalangi,*+ simane ösi nomo Gahabi.+ Öbunu nasa ndra talifusöu,+ ösi nomo namau, sabölö sökhi moroi khöu.
14 Börö daʼö, ibözi nono mbanuamö Yehowa, iraonou matua, foʼomomö, ba fefu gokhötamö.
15 Ero maʼökhö, tefakao ndraʼugö ba wökhö soya ngawalö, simane fökhö mbetuʼa irege möi baero mbetuʼamö börö wökhö daʼö.’”
16 Aefa daʼö, idönisi*+ dödö niha Wilisiti+ Yehowa hegöi niha Garabi+ sahatö ba zi fasui niha Gaitiofia ba wolawa Yoramo.
17 Lasuwö Yehuda, lafaso weʼamöi bakha, ba larabu fefu harato ba gödo razo,+ simanö göi ndraononia matua awö woʼomonia. Hatö Yoahasi*+ ononia siakhi zi toröi.
18 Me no alua fefu daʼö, ibeʼe khönia wökhö mbetuʼa Yehowa, fökhö si lö dalu-dalu.+
19 Me no aefa zi dua fakhe, möi baero mbetuʼania börö wökhö daʼö ba marase sibai ia. Fökhö daʼö mbörö waʼamatenia. Lö lafewuaʼö khönia galitö iraono mbanuania simane nifaluara khö duania.+
20 Faʼalawa ndröfinia me tobali ia razo yaʼia daʼö 32 fakhe, ba walu fakhe mamatörö ia ba Yeruzalema. Lö sabu tödö me mate ia. Lakoʼo ia ba Mbanua Dawido+ hizaʼi tenga ba lewatö razo.+
Nisura ba gahe zura
^ Sin.: ”lafadölö Yozafati ba ngai ndra tuania”.
^ Sin.: ”wa ibeʼe khönia wandru hegöi ba ngaʼötönia”.
^ Sin.: ”nahia sagalawa”.
^ Mazui ”irege lafalua wohorö ba wamati”.
^ Mazui ”irege lafalua wohorö ba wamati”.
^ Mazui ”ifehulu”.
^ Töi böʼö khö Gahaseya.
