Dua Ngaʼötö 23:1-21
23 Ba me no fitu fakhe, lö faʼataʼu khö Yehoyada ba fawuʼu li* ia khö ndra kumandru zaradadu si daotu+ yaʼia daʼö Asaria ono Yeroha, Simaʼeli ono Yohanano, Asaria ono Gobedi, Maʼaseya ono Gadaya, ba Elisafati ono Zikhiri.
2 Mofanö ira ba zi sagörö tanö Yehuda ba laʼowuloi niha Lewi+ moroi ba mbanua Yehuda fefu, simanö göi ndra sondröniaʼö ba nösi nomo zatua ira matua ba ndraono Gizaraʼeli. Me larugi Yeruzalema,
3 fawuʼu li+ fefu niha si no owulo khö Razo ba nomo Lowalangi sindruhu. Aefa daʼö, imane khöra Yehoyada,
”Mamatörö dania nono Razo simane nifabuʼu Yehowa sanandrösa ba nono Dawido.+
4 Daʼa zi lö tola löʼö mifalua: Sambua niʼotölu moroi ba gotalua ndra ere hegöi niha Lewi, mohalöwö ira+ dania ba ngaluo Sabato tobali sanaro bawandruhö,+
5 sambua niʼotölu göi zanaro ba gödo razo,+ ba sambua niʼotölu tö ba Mbawa Göli Wondrasi, ba fefu nono mbanua sato owulo ira ba golayama nomo Yehowa.+
6 Böi mitehegö so zi möi bakha ba nomo Yehowa baero ndra ere awö niha Lewi sohalöwö.+ Tola möi ira bakha börö me ngawawa niʼamoniʼö ira, ba fefu niha tanö böʼö enaʼö laʼoʼö nifakhoi Yehowa.
7 Enaʼö laʼiagö ba zinga Razo ira niha Lewi, lafasui ia ba lagogohe wangönara ero samösa. Mibunu gofu haniha zanöndragö yaʼia ba nomo andrö. Böi mifabali khö Razo gofu hezo möi ia.”*
8 Lafalua daʼö ira niha Lewi ba fefu niha Yehuda simane sibai niʼoroisi Gere Yehoyada. Laʼohe zaradadura zamösana, he sohalöwö hegöi si lö mohalöwö ba luo Sabato,+ börö me lö iʼefaʼö ira+ ba halöwö andrö Ere Yehoyada.
9 Aefa daʼö, ibeʼe Yehoyada khö ndra kumandru zaradadu si daotu+ andrö doho, baluse side-ide,* hegöi baluse sowulo-wulo niʼokhögö Razo Dawido,+ si so ba nomo Lowalangi sindruhu.+
10 Aefa daʼö, ifataro fefu ndra saradadu ba gambölö nomo daʼö hegöi ba gabera, sahatö ba naha wanunu sumange hegöi ba nomo andrö, yaʼia daʼö ba zi fasui Razo, ba oi so wangöna* ba dangara zamösana.
11 Ba laʼohe baero nono razo,+ labeʼe dakula ba högönia hegöi Famaduhuʼö,*+ ba labaliʼö ia razo. Ibayoini ia Yehoyada awö ndraononia ba lamane, ”Yaʼanau nosou Razo!”+
12 Me irongo Atalia li niha si fagohi-gohi ba lasuno-suno Razo, iʼanemaiʼö iʼondrasi niha sato si so ba nomo Yehowa.+
13 Iʼila wa no mozizio Razo ba ngai gehomo ahatö mbawandruhö si numalö bakha. Fao göi ndra sondröniaʼö+ hegöi samoli torofe khö Razo, ba fefu nono mbanua ba soi daʼö omuso dödöra+ ba lafoli dorofe. Ladöniaʼö* wanuno Lowalangi ira sanunö si fao fakake zinunö. Me iʼila daʼö Atalia, isika nukhania ba muʼao ia, ”Si manga mböli! Si manga mböli!”
14 Tohare Gere Yehoyada, iʼohe baero ndra kumandru zaradadu si daotu nifataro ba wondröniaʼö ira saradadu, ”Miʼohe baero ndra alawe daʼö moroi ba gotalua niha si no tefaʼoli, ba gofu haniha zoloʼö yaʼia hasambalö mubunu faoma föda!” No irai iwaʼö ere andrö, ”Böi mibunu ia ba nomo Yehowa.”
15 Börö daʼö, laraʼu ia ba laʼohe ba lala si numalö ba Mbawa Göli Kudo ba gödo razo, ba daʼö labunu ia.
16 Ba fawuʼu li Yehoyada khö Razo hegöi ba niha mbanua fefu, wa lö tebulö tobali ira ono mbanua Yehowa.+
17 Aefa daʼö mofanö fefu niha mbanua, möi ira ladudugö naha wamosumange Baʼali,+ ladudugö naha wanunu sumange awö nadu soya.+ Labunu Matana föna naha wanunu sumange, yaʼia andrö ere khö Mbaʼali.+
18 Ba ifataro ndra ere awö niha Lewi andrö Yehoyada ba wondrorogö omo Yehowa. No iföfögö Dawido haniha manö ngawawa zondrorogö omo Yehowa ba sameʼe sumange nitunu khö Yehowa,+ simane si no tesura ba Goroisa Moze.+ Laʼanunöisi göi zinunö nihonogöi* Dawido si fao faʼomuso dödö.
19 Ifataro göi zanaro bawa göli+ ba nomo Yehowa, enaʼö lö möi bakha niha si raʼiö.
20 Iʼohe ndra kumandru zaradadu si daotu,+ ira tuhenöri, samatörö, hegöi ono mbanua maʼafefu enaʼö fao ira khö Razo moroi ba nomo Yehowa. Möi ira ba gödo razo latörö mbawa göli tanö yawa ba lafedadao Razo ba dadaoma+ waʼarazo.+
21 Ba oi somuso tödö niha ba soi daʼö ba lö ametaʼuö saʼae börö me no mubunu Gatalia faoma föda.
Nisura ba gahe zura
^ Mazui ”mangosara”.
^ Sin.: ”na mofanö ia ba na ifuli ia yomo”.
^ Baluse si toʼölö laʼohe si möi fafana.
^ Mazui ”doho”.
^ Te gölu-gölu zura Goroisa Lowalangi.
^ Mazui ”Labeʼe dandra ba”.
^ Mazui ”nifazökhi”.
