Dua Ngaʼötö 24:1-27
24 Fitu fakhe ndröfi Yehoasi me tobali ia razo,+ ba 40 fakhe mamatörö ia ba Yeruzalema. Töi ninania yaʼia daʼö Sibia moroi ba Mbere-seba.+
2 Lö iböhöli wamalua satulö Yehoasi föna Yehowa sagötö faʼauri Gere Yehoyada.+
3 Darua woʼomo Yehoasi nifili Yehoyada ba tumbu khönia nono matua ba ono alawe.
4 Lö ara aefa daʼö, tumbu ba dödö Yehoasi wangehaogö omo Yehowa.+
5 Andrö iʼowuloi ndra ere awö niha Lewi imane, ”Miʼaeʼe ba mbanua Yehuda ba miʼowuloi gefe ba ndraono Gizaraʼeli fefu, soguna ba wangehaogö omo Lowalangimi+ ero röfi. Miʼaliokö wamalua.” Hizaʼi, lö iʼanemaiʼö lafalua daʼö ira niha Lewi.+
6 Börö daʼö, ifakaoniʼö Yehoyada kafalo gere andrö Razo imane,+ ”Hana wa lö öʼandrö ba niha Lewi enaʼö laʼowuloi pajak niʼamoniʼö moroi ba Yehuda hegöi ba Yeruzalema, simane niʼoroisi Moze+ enoni Yehowa andrö, yaʼia daʼö pajak niʼamoniʼö ba ndraono Gizaraʼeli sato, soguna ba nose si so Famaduhuʼö?+
7 No lafakiko nomo Lowalangi sindruhu+ iraono Gatalia,+ ira alawe si lö sökhi andrö, ba no laʼogunaʼö fefu gama-gama niʼamoniʼö si so ba nomo Yehowa ba wamosumange lowalangi Mbaʼali.”
8 Simane si no iʼoroisi Razo, lafazökhi naha wameʼe tolo-tolo+ ba lafedadao baero ba mbawa göli nomo Yehowa.+
9 Aefa daʼö, laʼombakhaʼö misa ba zi sagörö Yehuda hegöi ba Yeruzalema ba wolohe pajak niʼamoniʼö+ khö Yehowa, simane niʼoroisi Moze enoni Lowalangi sindruhu andrö ba ndraono Gizaraʼeli ba danö si mate.
10 Omuso dödö ndra sondröniaʼö ba fefu nono mbanua,+ ba lö laböhöli wolohe tolo-tolo si no aoha gölö ba labeʼe bakha ba naha andrö irege afönu.*
11 Ero afönu naha dolo-tolo andrö, laʼohe daʼö ira niha Lewi ba latouʼö ba danga Razo. Tohare sekretaris Razo ba enoni gafalo gere, laheta fefu nösi naha dolo-tolo andrö+ ba lafuli zui lafedadao ba nahiania. Daʼö nifaluara ero maʼökhö, ba oya sibai gefe si no laʼowuloi.
12 Ba tohare Razo faoma Yehoyada, labeʼe gefe andrö khö ndra sondröniaʼö halöwö ba nomo Yehowa, ba lagazi niha sanaba kara ba tuka sogonekhe sangehaogö omo Yehowa,+ simanö göi duka ziʼöli ba tembaga ba wamazökhi omo Yehowa.
13 Labörögö wohalöwö ira sondröniaʼö ba latohugö wangehaogö irege awai ba aro nomo Lowalangi sindruhu andrö simane me mböröta.
14 Me no awai, lafuli latouʼö gefe si töra ba danga Razo hegöi Yehoyada. Ba gefe daʼö lafazökhi wakake ba nomo Yehowa, fakake ba wangai halöwö, ba wameʼe sumange nitunu, mako, ba fakake moroi ba ganaʼa hegöi firö.+ Sagötö faʼauri Yehoyada, lö laböhöli wameʼe sumange nitunu+ ba nomo Yehowa.
15 Me no atua Yehoyada ba ahono dödönia sandrohu faʼaurinia, mate ia me 130 fakhe ndröfinia.
16 Lakoʼo ia ba Mbanua Dawido ba zinga ndra razo,+ börö zi sökhi nifaluania ba ndraono Gizaraʼeli+ khö Lowalangi sindruhu hegöi ba nomonia andrö.
17 Me no mate Yehoyada, tohare ndra sondröniaʼö niha Yehuda ba mangalulu ira khö Razo, ba ifondrondrongo wehedera Razo.
18 Ibörögö lö laʼameʼegö tödö nomo Yehowa Lowalangi ndra tuara. Lafosumange döla-döla niʼamoniʼö* awö nadu irege mofönu Lowalangi* khö Yehuda hegöi ba Yeruzalema börö zalara andrö.
19 Ifatenge khöra ndra samaʼeleʼö Yehowa ba wolohe yaʼira mangawuli khönia, ba lö laböhöli ira samaʼeleʼö andrö wamangelama yaʼira.* Hizaʼi, lö lafondrondrongo.+
20 Itema geheha Lowalangi Zakharia ono Gere Yehoyada.+ Mozizio ia ba nahia sabölö alawa ba imane, ”No iwaʼö Lowalangi sindruhu, ’Hana wa misawö goroisa Yehowa? Lö mofozu nifaluami! Börö me no miröi Yehowa, daʼö mbörö göi wa iröi ami.’”+
21 Hizaʼi, mamagölö ira ba wolawa yaʼia,+ ba Razo zangumaʼö khöra enaʼö latebu ia faoma kara irege mate ba golayama nomo Yehowa.+
22 Olifu Razo Yehoasi waʼomasi si lö faröi niforomaʼö Yehoyada ama Zakharia, ba ibunu nono Yehoyada andrö. Imane Zakharia me arakhagö mate ia, ”Yaʼisulöni khöu Yehowa nifaluamö andrö.”+
23 Me tebörögö ndröfi si bohou, lasuwö Yehoasi ira saradadu Ziria ba lasuwö göi Yehuda awö Yeruzalema.+ Labunu fefu zondröniaʼö+ ba soi daʼö ba lafaʼoheʼö zi no larabu andrö khö razo Ndramaseko.
24 Hewaʼae lö ato zaradadu Ziria si möi fasuwö, ifemöna ira Yehowa ba wolawa saradadu sato sibai,+ börö me no laʼerogö Yehowa Lowalangi ndra tuara ira niha Yehuda. Simane daʼö wamalua niha Ziria fanguhuku si göna Yehoasi.
25 Me laröi ia ba waʼebua zokhonia,* mangosara ndra sawuyunia ba wolawa yaʼia börö me no iduwagö ndro nono Gere Yehoyada.+ Labunu ia ba naha wemörönia.+ Daʼö mbörö waʼamatenia ba lakoʼo ia ba Mbanua Dawido,+ hizaʼi tenga ba lewatö ndra razo.+
26 Niha sangosara+ ba wolawa yaʼia töira yaʼia daʼö Sabada ono Zimeata ira alawe Gamoni, ba Yosabada ono Zimeriti ira alawe Moabi.
27 Sanandrösa ba ndraononia, famakaonia soya sibai,+ ba sanandrösa ba wangehaogö omo Lowalangi sindruhu,+ no tesura daʼö ba Mbuku Razo-Razo. Ba ononia Amasia zi tobali razo fangalinia.
Nisura ba gahe zura
^ Mazui te ”irege fatutu ira labeʼe zamösana”.
^ Faigi Geluaha Ngawua Wehede.
^ Sin.: ”irege alua wönu”.
^ Mazui ”wamaduhuʼö khöra”.
^ Mazui ”ba wökhönia”.
