Dua Ngaʼötö 26:1-23
26 Ba fefu niha mbanua Yehuda lafataro Usia+ tobali razo fangali namania Amasia.+ Me luo daʼö, 16 fakhe ndröfinia.
2 Me no mate Razo,*+ ifuli ihaogö mbanua Geloti andrö Usia ba ibaliʼö tana khö Yehuda mangawuli.+
3 Faʼalawa ndröfi Usia+ me tobali ia razo yaʼia daʼö 16 fakhe, ba 52 fakhe mamatörö ia ba Yeruzalema. Töi ninania yaʼia daʼö Yekholia moroi ba Yeruzalema.+
4 Lö iböhöli wamalua satulö föna Yehowa simane nifalua namania Amasia.+
5 Lö iböhöli wangalui Lowalangi sagötö faʼauri Zakharia samahaʼö yaʼia ba wangataʼufi Lowalangi sindruhu. Sagötö iʼalui Yehowa, ifahowuʼö ia Lowalangi sindruhu.+
6 Möi ia fasuwö ba wolawa niha Wilisiti+ ba idudugö göli Gata,+ öli Yabene+ awö göli Gasoto.+ Aefa daʼö, ifazökhi mbanua ba Gasoto hegöi ba gotalua niha Wilisiti.
7 Lö tebulö itolo ia Lowalangi sindruhu ba wolawa niha Wilisiti, niha Garabi+ si toröi ba Guribaʼali hegöi niha Moini.
8 Baero daʼö, labörögö ira niha Gamoni+ ba wameʼe beʼelö khö Usia. Tehöngö ia irugi Miserai börö waʼebua kuasonia.
9 Ifazökhi malige+ ba Yeruzalema ahatö ba Mbawa Göli Watalinga,+ ahatö ba Mbawa Göli Ndraso,+ ba ahatö ba Duwu-tuwu. Ba ahori ikölini maʼafefu.
10 Ifazökhi göi malige+ ba danö si mate ba oya ikhao* mbaʼa nidanö börö me oya gurifönia. Ifalua göi zimane daʼö ba Zefela hegöi ba danö sohili. So khönia zohalöwö ba danö ba sohalöwö ba kabu nagu ba hili hegöi ba Garimeli, börö me omasi ia wohalöwö ba danö.
11 Baero daʼö, so zaradadu khö Usia si no mamaʼanö ba wasuwöta. Möi ira fasuwö ba laföfögö ira tobali hauga ngawawa. Laʼerai ba ifasuraʼö döira+ Yeieli sekretaris andrö,+ simanö göi Maʼaseya sohalöwö. Wa tola lafalua daʼö börö wanuturu lala moroi khö Hanania, samösa sondröniaʼö khö razo.
12 Faʼato zondröniaʼö ba nösi nomo zatua ira matua 2.600 niha fefu.
13 So 307.500 niha nidöniaʼöra, si no mamaʼanö yaʼira ba gotalua zaradadu solohe fangöna, saradadu sagabölö sanolo razo ba wolawa udu.+
14 Idozigö fefu zaradadunia Usia wameʼe baluse, toho,+ takula, baru wasuwöta,+ fana nifosinali, ba kara niʼogunaʼö ba ribo-ribo.+
15 Ifazökhi wakake wasuwöta ba Yeruzalema nihaogö ndra sagatua-tua. Idozigö wameʼe misa ba malige fakake daʼö+ awö ba watalinga dowa, ba tola laʼefasi nono wana hegöi kara segebua. Tehöngö ia misa ba zaröu börö me ato zanolo yaʼia ba monönö waʼabölönia.
16 Hizaʼi, me no monönö waʼabölönia, so khönia wayawasa irege daʼö zi tobali börö waʼatekikonia. Faröi ia khö Lowalanginia Yehowa, yaʼia me möi ia ba gosali Yehowa ba wanunu sumange somuhua ba naha wanunu sumange somuhua.+
17 Iʼanemaiʼö iʼoʼö ia Ere Asaria ba 80 gere Yehowa tanö böʼö si barani.
18 Laʼondrasi Razo Usia ba lamane, ”He Usia, tenga yaʼugö zinangea manunu sumange somuhua khö Yehowa!+ Ha ira ere zi tola mamalua daʼö börö me ngaʼötö Gaʼaroni ira,+ niha si no muʼamoniʼö. Hetaʼö ba naha niʼamoniʼö andre. No faröi ndraʼugö, ba börö daʼa wa lö ötema lakhömi moroi khö Lowalangi Yehowa.”
19 Me luo daʼö, no igogohe naha mbo galitö Usia, edöna itunu zumange somuhua. Ba mofönu ia,+ ihangöi ndra ere. Lua-luania, göna mbou auri+ ba gangangonia föna ndra ere ba nomo Yehowa, ba zinga naha wanunu sumange somuhua.
20 Me ifaigi ia Asaria kafalo gere andrö ba fefu ndra ere, laʼila wa no göna mbou auri gangangonia! Iʼanemaiʼö laʼohe ia baero, ba iʼaliokö göi weʼamöi baero, börö me no ibözi ia Yehowa.
21 Lö aheta khö Razo Usia mbou auri irugi waʼamatenia, ba toröi ia ba nomo si no mufasafi ba niha sofökhö bou auri.+ Lö latehegö khönia weʼamöi ba nomo Yehowa. Ononia Yotamo zondrorogö gödo razo ba yaʼia zanguhuku ba soi daʼö.+
22 Fefu waö-waö tanö böʼö sanandrösa khö Usia, iʼotarai wamobörö irugi gafuriata, no isura Yesaya samaʼeleʼö andrö,+ ono Gamosi.
23 Ba gafuriata, mate Usia* ba lakoʼo ia ba zinga ndra tuania, hizaʼi tenga ba lewatö ndra razo börö me lamane niha, ”No göna ia bou auri.” Aefa daʼö, ononia Yotamo+ zi tobali razo fangalinia.
Nisura ba gahe zura
^ Sin.: ”lafadölö namania Amasia ba ngai ndra tuania”.
^ Mazui ”itaba ba wamazökhi”, te manaba kara.
^ Sin.: ”lafadölö Usia ba ngai ndra tuania”.
