Dua Ngaʼötö 29:1-36
29 Faʼalawa ndröfi Hizikia+ me tobali ia razo yaʼia daʼö 25 fakhe, ba 29 fakhe mamatörö ia ba Yeruzalema. Töi ninania yaʼia daʼö Abia ono Zakharia.+
2 Lö tebulö ifalua zatulö Hizikia föna Yehowa,+ simane sibai tuania Dawido.+
3 Me döfi siföföna wamatörönia, me baŵa si sara, ibokai fefu mbawandruhö nomo Yehowa ba ifuli ihaogö.+
4 Aefa daʼö, iʼowuloi ndra ere awö niha Lewi ba golayama sebolo tanö ba gatumbukha.
5 Imane khöra, ”Yaʼami niha Lewi, mifondrondrongo niwaʼögu. Miʼamoniʼö ami iadaʼa,+ miʼamoniʼö nomo Yehowa Lowalangi ndra tuami, ba miheta ngawalö zi raʼiö ba nahia niʼamoniʼö.+
6 No faröi ndra amada ba lafalua zi lö sökhi föna Lowalangida Yehowa.+ Laʼerogö ia, laʼosiwawöi nose Yehowa, ba no laböhöli wangotahögö yaʼia.+
7 No laduhö göi mbawandruhö kaki lima+ ba labunu fefu wandru.+ Labato wanunu sumange somuhua+ awö zumange nitunu+ ba nahia niʼamoniʼö khö Lowalangi ndraono Gizaraʼeli.
8 Börö daʼö, mofönu sibai Yehowa ba niha Yehuda hegöi Yeruzalema,+ irege ibaliʼö ira fametaʼu niha ba si hokha mbu zamaigi, laʼoʼaya ira* simane niʼilami samösa.+
9 Daʼö mbörö wa mate ndra tuada ba mbawa ziʼöli,+ ba laʼoloiʼö ndraonoda awö woʼomoda ira alawe.+
10 Iadaʼa, omasido fawuʼu li khö Yehowa Lowalangi ndraono Gizaraʼeli+ enaʼö alö wönunia khöda.
11 Yaʼami iraonogu, tenga inötönia iadaʼa wombato halöwö,* börö me no ifili ami Yehowa ba wezizio fönania, ba wangai halöwö khönia,+ ba wanunu sumange irege numalö miyawa zimbo.”+
12 Ba mosindro niha Lewi me larongo daʼö. Moroi ba ngaʼötö Gahati:+ Mahata ono Gamasai awö Yoeli ono Gasaria; moroi ba ngaʼötö Merari:+ Kisi ono Gabidi awö Gasaria ono Yehaleleli; moroi ba ngaʼötö Gereso:+ Yoa ono Zima awö Gedena ono Yoa;
13 moroi ba ngaʼötö Gelisafa: Simeri ba Yeueli; moroi ba ngaʼötö Gasafo:+ Zakharia ba Matania;
14 moroi ba ngaʼötö Hemano:+ Yehieli ba Simeʼi; ba moroi ba ngaʼötö Yedutuno:+ Semaya ba Usieli.
15 Laʼowuloi ndra talifusöra, laʼamoniʼö ira, ba möi ira wangamoniʼö omo Yehowa, simane niwaʼö razo moloʼö taromali Yehowa.+
16 Ba möi ndra ere bakha ba nomo Yehowa. Laʼamoniʼö ba laheta ngawalö zi raʼiö ba gosali Yehowa, labeʼe ba golayama+ nomo Yehowa. Aefa daʼö, laʼohe ira niha Lewi ba Ndraso Kidorona.+
17 Labörögö wangamoniʼö andrö ba ngaluo siföföna ba mbaŵa siföföna. Me no irugi walu hari ba mbaŵa daʼö, ofeta ba kaki lima nomo Yehowa wangamoniʼö andrö.+ Walu hari laʼamoniʼö nomo Yehowa, ba awai ba ngaluo si 16 ba mbaŵa siföföna.
18 Aefa daʼö, laʼondrasi Razo Hizikia ba lamane, ”No awai maʼamoniʼö fefu nomo Yehowa, naha wanunu sumange+ ba fefu gama-gamania,+ awö meza ba wameʼe roti nifalaete*+ ba fefu gama-gamania.
19 No mafaʼanö ba maʼamoniʼö+ fefu gama-gama niheta Razo Gahasi me faröi ia khö Lowalangi+ sagötö mamatörö ia. Ahori so fefu tanö föna naha wanunu sumange khö Yehowa.”
20 Ahulö sibai maoso Razo Hizikia ba iʼowuloi ndra sondröniaʼö ba mbanua enaʼö möi ira ba nomo Yehowa.
21 Laʼohe fitu ngaʼeu zawi si matua, fitu ngaʼeu mbiri-biri si matua, fitu ngaʼeu nono mbiri-biri si matua, ba fitu ngaʼeu nambi si matua, labeʼe tobali sumange fameta horö ba wamatörö andrö, ba naha niʼamoniʼö, hegöi ba Yehuda.+ Iwaʼö khö ndra ere ngaʼötö Gaʼaroni enaʼö laʼohe fefu daʼö ba naha wanunu sumange khö Yehowa.
22 Lataba fefu zawi daʼö,+ ba lahalö ndro ira ere, latefeʼö ba dete naha wanunu sumange.+ Aefa daʼö, lataba mbiri-biri si matua ba latefeʼö ndronia yawa ba dete naha wanunu sumange, ba lataba göi nono mbiri-biri si matua, latefeʼö ndronia yawa ba dete naha wanunu sumange.
23 Laʼohe föna razo ba föna nono mbanua fefu nambi si matua andrö si tobali sumange fameta horö, ba latufa tangara nambi daʼö.
24 Lataba nambi andrö ira ere ba labaliʼö sumange fameta horö. Lahalö ndronia, labeʼe ba naha wanunu sumange tobali fangatulö ba ndraono Gizaraʼeli maʼafefu. No iwaʼö Razo enaʼö labeʼe ba ndraono Gizaraʼeli fefu zumange nitunu awö zumange fameta horö.
25 Gasa-gasa daʼö, ifataro niha Lewi ba nomo Yehowa ba wamözi siʼöli nifaondra wamözi,* fakake zinunö nifosinali, ba harafa,+ simane niʼoroiʼö Dawido,+ Gado+ sangiʼila andrö khö Razo hegöi Natano+ samaʼeleʼö. Moroi khö Yehowa goroisa daʼö, nifaʼemania khö ndra samaʼeleʼö.
26 Ba mosindro niha Lewi, lagogohe wakake zinunö khö Dawido, ba mosindro göi ndra ere, lagogohe dorofe.+
27 Iwaʼö Hizikia enaʼö labeʼe zumange nitunu ba naha wanunu sumange.+ Me labörögö wameʼe sumange nitunu, tebörögö zinunö khö Yehowa ba lafoli dorofe, lafaudugö wamalua yaʼia ero lafoli wakake zinunö khö Dawido razo ndraono Gizaraʼeli.
28 Sagötö laʼanunöisi zinunö andrö ba lafoli dorofe, mangalulu fefu nono mbanua. Lafalua daʼö ofeta awai wameʼe sumange nitunu.
29 Me no awai labeʼe zumange, mangalulu Razo awö zi fao khönia fefu ba latuhi danö.
30 Laʼandrö ba niha Lewi ira sondröniaʼö hegöi Razo Hizikia enaʼö lasuno Yehowa faoma fehede Dawido+ ba fehede Gasafo sangiʼila andrö.+ Labeʼe wanuno si fao faʼomuso dödö sebua, mangalulu ira ba latuhi danö.
31 Aefa daʼö imane Hizikia, ”Börö me no mifasafi ami* tobali tana khö Yehowa, miʼaeʼe ba nomo Yehowa ba miʼohe zumange nitunu hegöi sumange fangandrö saohagölö.” Ba labörögö ono mbanua wolohe sumange nitunu hegöi sumange fangandrö saohagölö, ba fefu niha saoha ölö laʼohe göi zumange nitunu.+
32 Faʼoya zumange nitunu niʼohera yaʼia daʼö 70 ngaʼeu zawi, 100 ngaʼeu mbiri-biri si matua, ba 200 ngaʼeu nono mbiri-biri si matua. Fefu daʼö tobali sumange nitunu khö Yehowa.+
33 Faʼoya zumange niʼamoniʼö yaʼia daʼö 600 ngaʼeu zawi ba 3.000 ngaʼeu nambi awö mbiri-biri.
34 Hizaʼi, ambö ato ndra ere zamoʼai uli zumange nitunu ba talifusöra niha Lewi zanolo yaʼira+ irege awai halöwö andrö ba no göi awai mamoni ndra ere.+ Abölö owölö-ölö* niha Lewi ba wamoni moroi khö ndra ere.
35 Baero daʼö, oya nasa zumange nitunu,+ tawö zumange fangatulö,+ ba sumange nibadu na labeʼe zumange nitunu.+ Simane daʼö wamalua mangawuli famosumange ba nomo Yehowa.
36 Omuso dödö Hizikia ba fefu nono mbanua börö nifalua Lowalangi sindruhu ba nono mbanuania.+ Alio sibai awai fefu.
Nisura ba gahe zura
^ Sin.: ”tobali ira tandrösa wikho-wikho”.
^ Mazui ”wolombase”.
^ Daʼa roti nibaliʼö sumange.
^ Mazui ”simbal”. Daʼa alat musik moroi ba ziʼöli, si hulö wiga niʼogaolo, lafaondra wamözi yaʼia na muʼogunaʼö.
^ Sin.: ”no mifönui dangami”.
^ Sin.: ”adölö dödö”.
