Dua Ngaʼötö 3:1-17
3 Ibörögö Selomo wamazökhi omo Yehowa+ ba Yeruzalema gamaudu Hili Moria.+ Ba daʼö iforomaʼö ia Yehowa mböröta khö namania Dawido,+ naha si no ihenaigö Dawido ba naha wamöbörö khö Gorana+ niha Yebusi.
2 Ibörögö wamazökhi ba ngaluo si dua me baŵa si dua, me no öfa fakhe mamatörö ia.
3 Faʼanau wondrasi nifazökhi Zelomo ba nomo Lowalangi sindruhu andrö yaʼia daʼö 26,7 meter ba faʼebolonia 8,9 meter,*+ moloʼö suʼa-suʼa niʼogunaʼö me luo daʼö.*
4 Faʼanau kaki lima föna nomo andrö yaʼia daʼö 8,9 meter,* fagölö waʼebolora nomo.* Faʼalawania 120,* ba no lafoʼuli tanö bakha faoma anaʼa si sökhi.+
5 Ifasa wafa eu juniper ba nahia sebua,* ifoʼuli faoma anaʼa si sökhi,+ ba ifazökhi ba daʼö gambara döla geu khorema+ hegöi rate.+
6 Aefa daʼö, ifasa gara si sökhi sebua böli ba nomo daʼö,+ ba iʼogunaʼö ganaʼa+ si otarai Warawaʼi.
7 Ifoʼuli nomo daʼö, simanö göi mbuatö, towa, awö mbawandruhönia faoma anaʼa,+ ba ifazökhi gambara ndra kerubi ba dowa.+
8 Ifazökhi göi Nahia Wondrege Niʼamoniʼö.+ Faʼebolonia fagölö ba waʼebolo nomo andrö, yaʼia daʼö 8,9 meter ba faʼanaunia 8,9 meter.* Ifoʼuli faoma anaʼa si sökhi 20,52 ton.*+
9 Faʼabua ganaʼa si tobali osö-osönia yaʼia daʼö 570 gram.* Ifoʼuli mbateʼe si so ba dete nomo faoma anaʼa.
10 Ba ifazökhi dombua nadu famaedo kerubi ba Nahia Wondrege Niʼamoniʼö, ifoʼuli faoma anaʼa.+
11 Iʼotarai mbalö gafi kerubi+ si oföna ofeta ba mbalö gafi kerubi si dua, faʼanaunia 8,9 meter.* Si tambai gafi kerubi si oföna faʼanaunia mato dua meter* ba fatöfa ba dowa nomo, ba afinia si tambai tö mato dua meter* waʼanau ba fatöfa ba gafi kerubi si dua.
12 Si tambai gafi kerubi si dua faʼanaunia mato dua meter* ba fatöfa ba dowa nomo, ba faʼanau gafinia si tambai tö mato dua meter* ba fatöfa ba gafi kerubi si oföna.
13 Faʼanau gafira me no mubologö 8,9 meter.* Mosindro ira ba no laʼotahögö tanö bakha.*
14 Ifazökhi göi nukha mbaʼa-baʼa+ moroi ba mbana sobalau, nukha si ungu laʼa-laʼa,* bana soyo, ba nukha si sökhi, aefa daʼö ifolaʼa-laʼa faoma gambara kerubi.+
15 Ifazökhi dua rozi gehomo+ föna nomo andrö 15,6 meter* waʼanau, ba ero sambua högö gehomo faʼalawania mato dua meter.*+
16 Ifazökhi göi rate nindrandra tanö yawa gehomo daʼö, aefa daʼö ifazökhi 100 ngawua gambara dalimo ba rate andrö.
17 Ifasindro gehomo daʼö föna gosali, sambua ba gambölö* ba sambua ba gabera.* Tanö ba gambölö ifotöi Yakhino,* ba tanö ba gabera ifotöi Boasi.*
Nisura ba gahe zura
^ Sin.: ”moloʼö faʼanau ziʼu me luo daʼö”. 1 siʼu si toʼölö = 44,5 cm, hizaʼi so zangumaʼö wa ”suʼa-suʼa zi 1 siʼu me luo daʼö” yaʼia daʼö siʼu sanau, 51,8 cm. Faigi Lamp. B14.
^ Mazui ”manganau 20 siʼu ba wolo-wolo nomo”.
^ Lö si tatu zuʼa-suʼa daʼa.
^ Sin.: ”ba nomo sebua”. Te eluahania, Nahia Niʼamoniʼö.
^ Eluahania ba Nahia Niʼamoniʼö.
^ Mazui ”sobowo doru”.
^ Mazui ”tanö raya”.
^ Mazui ”tanö yöu”.
^ Eluahania ”Yaʼiʼaroʼö [yaʼia daʼö Yehowa] Wamataro”.
^ Te eluahania ”Si Fao Faʼabölö”.
