Dua Ngaʼötö 30:1-27
-
Ifalua Gowasa Fasa Hizikia (1-27)
30 Ifaʼoheʼö goroisania Hizikia ba zi sagörö tanö Gizaraʼeli+ hegöi ba Yehuda. Ibeʼe zurania khö Geferai hegöi khö Manase+ enaʼö möi ira ba nomo Yehowa ba Yeruzalema ba lafalua Gowasa Fasa khö Yehowa Lowalangi ndraono Gizaraʼeli.+
2 Hewaʼae simanö, no ihalö gangetula Razo hegöi ira sondröniaʼö, ba fefu nono mbanua ba Yeruzalema wa lafalua Gowasa Fasa ba mbaŵa si dua.+
3 Tebai laʼowasaini ba ginötö si no mutatugöi+ börö me lö ato ndra ere si no mamoni,+ ba lö sowulo nono mbanua ba Yeruzalema.
4 Sökhi gangetula daʼa moloʼö Razo hegöi ono mbanua.
5 Börö daʼö, lahalö gangetula ba wangombakha ba zi sagörö tanö Gizaraʼeli, iʼotarai Mbere-seba irugi Dano,+ enaʼö tohare niha mbanua ba lafalua Gowasa Fasa khö Yehowa Lowalangi ndraono Gizaraʼeli ba Yeruzalema. Yaʼira si sambua ngawawa, lö nifaluara moloʼö si no tesura.+
6 Me no ibeʼe goroisania Razo, mofanö denge-tenge* ba zi sagörö tanö Gizaraʼeli hegöi Yehuda. Laʼohe zura moroi khö Razo hegöi ira sondröniaʼö, ösinia yaʼia daʼö, ”Yaʼami iraono Gizaraʼeli, mifuli ami khö Yehowa Lowalangi Gaberahamo, Izaʼaki, ba iraono Gizaraʼeli, enaʼö ifuli ia ba niha si toröi si no aefa ba danga ndra razo Asiria.+
7 Böi mitörö lala ndra tuami hegöi ira talifusömi si no faröi khö Yehowa Lowalangi ndra tuara irege ibaliʼö fametaʼu niha ira, simane niʼilami samösa.+
8 Böi tobali ami sabeʼe högö simane ira tuami.+ Miʼoʼö niwaʼö Yehowa, miʼaeʼe ba nahia niʼamoniʼö khönia+ si no iʼamoniʼö irugi zi lö aetu, ba mifosumange Yehowa Lowalangimi enaʼö alö wönunia khömi.+
9 Na mifuli ami khö Yehowa, latema waʼahakhö dödö ira talifusömi hegöi iraonomi si no muʼoloiʼö+ ba latehegö khöra wangawuli ba soi daʼa,+ börö me sahakhö tödö* Lowalangimi Yehowa ba sebua faʼomasi.+ Lö ibiniʼö mbawania khömi na mifuli ami khönia.”+
10 Mofanö ndra tenge-tenge,* möi ira ba zi sagörö tanö Geferai awö Manase,+ ba simanö göi Zebuloni, hizaʼi laʼoʼaya ira ba maʼiki khöra niha mbanua.+
11 Hewaʼae simanö, so ösa niha Gaseri, Manase, ba Sebuloni sangide-ngideʼö yaʼira, ba möi ira ba Yeruzalema.+
12 Fao Lowalangi sindruhu khö Yehuda enaʼö hasara dödöra ba wamalua oroisa Razo hegöi ira sondröniaʼö, moloʼö taromali Yehowa.
13 Ato niha sowulo ba Yeruzalema ba wangowasaini Owasa Roti si Lö Mufaruka Ragi+ ba mbaŵa si dua.+ Ato sibai nono mbanua daʼö.
14 Laheta fefu naha wanunu sumange ba Yeruzalema.+ Laheta fefu naha wanunu sumange somuhua+ ba latiboʼö ba Ndraso Kidorona.
15 Ba lataba zumange Wasa ba ngaluo si 14 ba mbaŵa si 2. Aila ndra ere hegöi niha Lewi, andrö wa laʼamoniʼö ira ba laʼohe zumange nitunu ba nomo Yehowa.
16 Mozizio ira ba nahia si no latatugöi khöra moloʼö oroisa Moze enoni Lowalangi sindruhu, aefa daʼö latefeʼö ndro+ nitemara moroi ba danga niha Lewi.
17 Ato sibai niha si lö mamoni ba gotalua nono mbanua daʼö. Mohalöwö niha Lewi ba wanaba sumange Fasa ba niha si lö mamoni,+ enaʼö teʼamoniʼö ira föna Yehowa.
18 Ato niha si lö mamoni si manga sumange Fasa, töra-töra niha Geferai, Manase,+ Isasari, ba Sebuloni. Hizaʼi, mangandrö Hizikia salahira, ”He Yehowa Lowalangi si sökhi tödö,+ yaʼöʼefaʼö zala
19 dozi niha si no mamaʼanö tödönia ba wangalui Lowalangi sindruhu,+ yaʼugö Yehowa Lowalangi ndra tuania, hewaʼae lö niʼamoniʼö ia moloʼö si no mutatugöi sanandrösa ba wangamoniʼö.”+
20 Ifondrondrongo Yehowa wangandrö Hizikia ba iʼefaʼö zala* nono mbanua andrö.
21 Fitu hari waʼara lafalua Gowasa Roti si Lö Mufaruka Ragi+ iraono Gizaraʼeli ba Yeruzalema si fao faʼomuso dödö sebua.+ Ero maʼökhö lasuno Yehowa ira niha Lewi hegöi ira ere, laʼebuaʼö wamoli fakake zinunö khö Yehowa.+
22 Baero daʼö, fahuhuo Hizikia ba wamarou tödö niha Lewi sangai angetula si fao faʼatua-tua ba wamosumange Yehowa. Manga ira sagötö famaluara owasa si fitu hari waʼara.+ Labeʼe zumange fangatulö+ ba laʼandrö saohagölö khö Yehowa Lowalangi ndra tuara.
23 Fefu nono mbanua lafuli lahalö gangetula ba wanohugö owasa andrö fitu hari tö. Börö daʼö, lafuli laʼowasaini fitu hari tö si fao faʼomuso dödö.+
24 Mamuala Hizikia razo Yehuda, ibeʼe 1.000 zawi si matua ba 7.000 mbiri-biri soguna ba nono mbanua. Mamuala göi ndra sondröniaʼö, labeʼe 1.000 zawi si matua+ ba 10.000 mbiri-biri soguna ba nono mbanua. Ato sibai gere samoni.+
25 Ba lö mamalö waʼomuso dödö nono mbanua Yehuda fefu, ira ere, niha Lewi, ba fefu nono mbanua si tohare moroi ba danö Gizaraʼeli,+ simanö göi zi fatewu+ si tohare moroi ba Gizaraʼeli hegöi si toröi ba Yehuda.
26 So waʼomuso dödö sebua ba Yeruzalema, börö me iʼotarai ba götö Zelomo ono Dawido razo ndraono Gizaraʼeli, lö irai alua zimane daʼa ba Yeruzalema.+
27 Ba gafuriata, mosindro ndra ere Lewi ba laʼandrö howu-howu soguna ba nono mbanua daʼö.+ Ifondrondrongo wangandröra Lowalangi ba terongo lira ba zorugo ba nahiania niʼamoniʼö.
