Dua Ngaʼötö 33:1-25
33 Faʼalawa ndröfi Manase+ me tobali ia razo yaʼia daʼö 12 fakhe, ba 55 fakhe mamatörö ia ba Yeruzalema.+
2 Lö iböhöli wamalua si lö sökhi Manase föna Yehowa. Iʼoʼö zi toʼölö lafalua soi böʼö sogoro Yehowa nifofanönia föna ndraono Gizaraʼeli.+
3 Ifuli ihaogö naha wamosumange* si no idudugö amania Hizikia.+ Ifazökhi göi naha wanunu sumange khö Mbaʼali awö döla-döla niʼamoniʼö.* Mangalulu ia khö ndra saradadu zorugo ba ifosumange ira.+
4 Ifazökhi göi naha wanunu sumange ba nomo Yehowa+ hewaʼae no iwaʼö Yehowa, ”Ba Yeruzalema so döigu sagötö faʼara.”+
5 Ba zi dombua olayama nomo Yehowa,+ ifazökhi naha wanunu sumange ba daʼö Manase khö ndra saradadu zorugo maʼafefu.
6 Itunu nononia tobali sumange+ ba Ndraso Ndraono Hinomo,+ fakelemu,+ mamaʼeleʼö, ifalua waetasa, ifataro zogaoni bekhu awö zamaʼeleʼö.+ Oya zi lö sökhi nifalua Manase si möi fangafökhö dödö Yehowa.
7 Iʼohe ba nomo Lowalangi sindruhu+ gambara nadu nifazökhinia, hewaʼae no iwaʼö Lowalangi khö Dawido faoma khö nononia Selomo, ”Ba nomo daʼa hegöi ba Yeruzalema, banua nifiligu moroi ba mado ndraono Gizaraʼeli, ba daʼö dania ubeʼe döigu sagötö faʼara.+
8 Lö saʼae ufawuʼa gahe ndraono Gizaraʼeli ba danö si no uhonogöigö khö ndra tuara, asala soroi ba dödöra woloʼö niwaʼögu, fefu Goroisa, amakhoita, ba angetula si no ufaʼema khö Moze.”
9 Lö iböhöli Manase wamaelungu Yehuda awö mbanua Yeruzalema. Abölö ebua horö nifaluara moroi ba soi böʼö nihori Yehowa föna ndraono Gizaraʼeli.+
10 Lö iböhöli Yehowa wahuhuosa khö Manase hegöi ba nono mbanuania. Hizaʼi, lö lafondrondrongo.+
11 Andrö itehegö Yehowa khö ndra kumandru zaradadu razo Asiria wolawa yaʼira, irege laraʼu Manase, ladöni ia faoma khai-khai,* dua rozi rate tembaga famöbönia, ba laʼohe ia ba Mbabilona.
12 Me tosasa ia, iʼandrö waʼahakhö dödö Lowalanginia Yehowa ba mangide-ngideʼö ia föna Lowalangi ndra tuania.
13 Lö iböhöli wangandrö, irege terou dödö Lowalangi wamondrondrongo fangandrönia ba iforomaʼö waʼahakhö dödö. Iʼohe ia Lowalangi mangawuli ba Yeruzalema ba ifuli ifataro tobali razo.+ Awena aboto ba dödö Manase wa Yehowa andrö Lowalangi sindruhu.+
14 Aefa daʼö, ifazökhi dowa tanö baero salawa sibai ba Mbanua Dawido+ tanö ba gaekhula Gihona,+ si so ba ndraso. Ifazökhi dowa andrö ofeta ba Mbawa Göli Giʼa,+ ifasui mbanua sofeta ba Gofeli.+ Ifataro gumandru zaradadu misa ba mbanua nifoʼöli ba Yehuda.
15 Ibeʼe baero lowalangi tanö böʼö awö nadu ba nomo Yehowa,+ simanö göi fefu naha wanunu sumange nifazökhinia ba hili nomo Yehowa+ hegöi ba Yeruzalema, itiboʼö daʼö baero mbanua.
16 Ifuli ihaogö göi naha wanunu sumange khö Yehowa,+ ba ibeʼe ba daʼö zumange fangatulö+ awö zumange fangandrö saohagölö.+ Ifarou dödö niha Yehuda ba wamosumange Yehowa Lowalangi ndraono Gizaraʼeli.
17 Hewaʼae simanö, lö laböhöli niha sato wameʼe sumange ba nahia sagalawa, hizaʼi labeʼe daʼö ha khö Yehowa Lowalangira.
18 Fefu waö-waö tanö böʼö sanandrösa khö Manase, he fangandrönia khö Lowalangi hegöi fehede zangiʼila si fahuhuo khönia ba döi Yehowa Lowalangi ndraono Gizaraʼeli, no tesura daʼö ba waö-waö razo ndraono Gizaraʼeli.
19 Baero daʼö, no lasura göi ira sangiʼila andrö khönia fefu waö-waö wangandrönia+ ba hewisa me tefondrondrongo gangandröwania, horö nifaluania hegöi me faröi ia,+ hezo ifasindro naha wamosumange,* döla-döla niʼamoniʼö*+ awö nadu nifoe fatua lö sangide-ngideʼö ia.
20 Ba gafuriata, mate Manase* ba lakoʼo ia ahatö ba nomonia, ba ononia Amoni zi tobali razo fangalinia.+
21 Faʼalawa ndröfi Gamoni+ me tobali ia razo yaʼia daʼö 22 fakhe, ba dua fakhe mamatörö ia ba Yeruzalema.+
22 Lö iböhöli wamalua si lö sökhi föna Yehowa, simane si no irai ifalua amania Manase.+ Ibeʼe zumange nitunu ba nadu nifoe andrö nifazökhi namania Manase,+ ba lö iböhöli wamosumange adu.
23 Lö mangide-ngideʼö ia+ föna Yehowa+ simane amania Manase. Monönö waʼoya horö nifalua Gamoni.
24 Ba gafuriata, mangosara ndra enoninia ba wolawa yaʼia+ irege labunu ia ba nomonia samösa.
25 Hizaʼi, labunu fefu zolawa Razo Amoni+ ira niha mbanua daʼö, ba ononia Yosia+ nifataro tobali razo fangalinia.
Nisura ba gahe zura
^ Sin.: ”nahia sagalawa”.
^ Faigi Geluaha Ngawua Wehede.
^ Mazui te ”laraʼu ia ba gotalua gara”.
^ Faigi Geluaha Ngawua Wehede.
^ Sin.: ”nahia sagalawa”.
^ Sin.: ”lafadölö Manase ba ngai ndra tuania”.
