Dua Ngaʼötö 5:1-14
5 Ba me no awai ifazökhi nomo Yehowa andrö Selomo,+ iʼohe fefu gama-gama si no iʼamoniʼö amania Dawido.+ Iʼohe wirö, anaʼa ba fefu gama-gama ba naha wangiröʼö harato ba nomo Lowalangi sindruhu.+
2 Aefa daʼö, iʼowuloi ndra sondröniaʼö Gizaraʼeli andrö Selomo, fefu zatua ba zi sambu-sambua mado awö zondröniaʼö ba nösi nomo zatua ira matua. Möi ira ba Yeruzalema ba wolohe miyawa tawöla amabuʼula li Yehowa moroi ba Mbanua Dawido+ yaʼia daʼö Siona.+
3 Owulo fefu ndraono Gizaraʼeli föna Razo me mufalua gowasa* ba mbaŵa si fitu.+
4 Tohare fefu zondröniaʼö iraono Gizaraʼeli, ba lafazawa Dawöla+ ira niha Lewi.
5 Laʼohe Dawöla andrö hegöi ose waʼowulo ira ere awö niha Lewi,*+ simanö göi ngawalö gama-gama niʼamoniʼö si so ba nose andrö.
6 Razo Selomo hegöi iraono Gizaraʼeli maʼafefu si no mukaoni ba weʼamöi khönia, laʼiagö föna Dawöla andrö. Oya sibai mbiri-biri hegöi sawi nibeʼe tobali sumange+ irege tebai muʼerai.
7 Aefa daʼö, laʼohe dawöla amabuʼula li Yehowa no mege ira ere ba labeʼe barö gafi kerubi+ si so ba mbateʼe tanö bakha ba nomo andrö yaʼia daʼö ba Nahia Wondrege Niʼamoniʼö.
8 No tebologö gafi kerubi andrö yawa Dawöla irege tebalugö Dawöla awö mbea-beania+ niʼogunaʼö ba wamazawa yaʼia.
9 Anau sibai mbea-bea daʼö irege oroma mbalönia ba Nahia Niʼamoniʼö si so tanö föna mbateʼe tanö bakha, hizaʼi lö oroma moroi baero. So manö nasa daʼö irugi iadaʼa.
10 Si so bakha ba Dawöla andrö ha kara wanura si dua ngaʼörö. Moze zameʼe ba daʼö me so ia ba Horebi,+ me fawuʼu li+ Yehowa ba ndraono Gizaraʼeli me aheta ira ba danö Miserai.+
11 Fefu ndra ere si tohare no laʼamoniʼö ira+ gofu hezo moroi ngawawara.+ Me möi baero ndra ere moroi ba nahia niʼamoniʼö,
12 ira sanunö moroi ba mado Lewi+ si sambua ngawawa khö Gasafo,+ Hemano,+ Yedutuno+ awö ndraono hegöi ira talifusöra, laʼohe ziʼöli nifaondra wamözi,* fakake zinunö nifosinali, ba harafa. Lafake nukha si sökhi ba mosindro ira tanö ba gatumbukha naha wanunu sumange. Fao khöra ndra ere si 120 samoli torofe.+
13 Me laʼosambuaʼö lira samoli torofe hegöi sanunö ba wanuno Yehowa ba laʼandrö saohagölö khönia, ba me larongo li dorofe, siʼöli nifaondra wamözi,* awö wakake zinunö tanö böʼö me lasuno Yehowa, ”börö me si sökhi tödö ia; lö tebulö waʼomasinia si lö faröi sagötö faʼara”,+ ihawui lawuo nomo andrö, omo Yehowa.+
14 Tebai latohugö halöwöra ira ere ba daʼö, börö me afönu lakhömi Yehowa nomo Lowalangi sindruhu andrö.+
Nisura ba gahe zura
^ Eluahania Owasa Nose Ndraha Geu.
^ Mazui ”ira ere Lewi”.
^ Mazui ”simbal”. Daʼa alat musik moroi ba ziʼöli, si hulö wiga niʼogaolo, lafaondra wamözi yaʼia na muʼogunaʼö.
^ Mazui ”simbal”. Daʼa alat musik moroi ba ziʼöli, si hulö wiga niʼogaolo, lafaondra wamözi yaʼia na muʼogunaʼö.
