Dua Ngaʼötö 9:1-31
9 Me irongo ratu moroi ba Zeba+ duria sanandrösa ba waʼatehöngö Zelomo, andrö wa möi ia ba Yeruzalema itandraigö Zelomo ba wameʼe fanofu sagabua.*+ Ato sibai zi fao khönia, so gondra solohe fanikha famayoini, anaʼa soya hegöi kara sebua böli. Iʼondrasi Zelomo ba ibeʼe wanofu si so ba dödönia.+
2 Ibeʼe wanema li Selomo ba ngawalö zinofunia ba ihaogö wanutunö. Lö hadöi sabua* khönia.
3 Me iʼila ratu moroi ba Zeba waʼatua-tua Zelomo,+ omo nifazökhinia,+
4 ö si so ba mezania,+ famöfögö naha wedadao ndra sohalöwö khönia, lagu ndra sawuyunia ba wameʼe gö ba meza hegöi fonukhara, solohe önia idanö hegöi fonukhara awö zumange nitunu si lö tebulö ibeʼe ba nomo Yehowa,+ ahöli-höli sibai dödönia.*
5 Andrö wa imane khö Razo, ”Atulö nirongogu ba soigu sanandrösa ba waʼatua-tuamö hegöi ngawalö zi no öfalua.*
6 Awena faduhu dödögu me uʼondrasi ndraʼugö ba uʼila samösa daʼö.+ Ambö matonga naʼi niʼombakhaʼöra khögu!+ Abölö atua-tua ndraʼugö moroi ba zi no urongo.+
7 Owua-wua sibai dödö nono mbanuamö awö ndra enonimö si fao khöu, börö me lö aetu-aetu lafondrondrongo waʼatua-tuamö!
8 Yatesuno Yehowa Lowalangimö andrö sangomasiʼö yaʼugö, irege ifataro ndraʼugö ba dadaomania tobali razo khö Yehowa Lowalangimö. Börö me iʼomasiʼö ndraono Gizaraʼeli Lowalangimö,+ ba omasi ia na lö tebulö ira sagötö faʼara, andrö wa ibaliʼö ndraʼugö razo ba wamalua sindruhu hegöi satulö.”
9 Aefa daʼö, ibeʼe mbuala khö Razo Selomo 4,104 ton* ganaʼa,+ kara sebua böli, ba oya sibai wanikha famayoini. Lö hadöi saʼae solohe fanikha famayoini simane faʼoya niʼohe ratu moroi ba Zeba khö Razo Selomo.+
10 Baero ganaʼa niʼohe moroi ba Gofiri,+ laʼohe geu cendana hegöi kara segebua böli+ ira enoni Hiramo awö genoni Zelomo.
11 Iʼogunaʼö geu andrö Razo ba wamazökhi ora soguna ba nomo Yehowa+ hegöi ba gödo razo,+ ba wamazökhi harafa ba fakake zinunö nifosinali khö ndra sanunö.+ Lö irai so zimane daʼö ba Yehuda.
12 Ibeʼe Razo Selomo fefu niʼandrö ratu moroi ba Zeba awö ngawalö zomasi ia, töra* moroi ba niʼohenia khö Razo. Aefa daʼö, mangawuli ratu andrö ba soinia, fao ira ndra enoninia.+
13 Laʼohe ganaʼa khö Zelomo 22,8 ton* ero röfi,+
14 baero nasa niʼohe ndra saniaga, sogale, ba fefu ndra razo niha Garabi awö ndra gubernur ba soi daʼö solohe anaʼa ba firö khö Zelomo.+
15 Ifazökhi göi Selomo 200 ngawua mbaluse sebua moroi ba ganaʼa si no mufaruka,+ ero sambua baluse faʼabuania 6,84 kilogram.*+
16 Baero daʼö, ifazökhi 300 ngawua mbaluse side-ide* moroi ba ganaʼa si no mufaruka, ero sambua baluse faʼabuania 1,7 kilogram.* Aefa daʼö, möi Razo wameʼe daʼö fefu ba Nomo Gatua Libano.+
17 Ifazökhi göi Razo dadaoma sebua moroi ba nifö gaza aefa daʼö ifoʼuli faoma anaʼa si sökhi.+
18 So önö ngawua mbosi nora föna dadaoma andrö, ba so dane-dane gahe si no fakhai ba dadaoma daʼö. So göi naha danga ba dadaoma andrö faoma fatambai, ba so dua ngaʼeu wamaedo zingo+ si no mufozizio ba zingania.
19 No mufozizio faoma fatambai wamaedo zingo+ ba zi önö ngawua mbosi nora andrö, 12 ngaʼeu fefu. Lö hadöi amatöröwa tanö böʼö samazökhi dadaoma simane daʼö.
20 Moroi ba ganaʼa fefu mako niʼogunaʼö Razo Selomo. Fefu gama-gama si so ba Nomo Gatua Libano, tefazökhi moroi ba ganaʼa si sökhi. Lö hadöi nifazökhi moroi ba wirö, börö me lö moguna sibai wirö me götö Zelomo.+
21 No toʼölö moloyo göfa Razo ba Darisi+ si fao ira enoni Hiramo,+ ba sakali tölu fakhe tohare göfa moroi ba Darisi laʼohe ganaʼa, firö, ifö gaza,+ baʼe hegöi fofo meraki.
22 Abölö kayo ba atua-tua Razo Selomo moroi ba razo tanö böʼö ba zi sagörö ulidanö.+
23 Fefu razo ba gulidanö laʼodödögö wamalukhaisi* Selomo ba wamondrondrongo faʼatua-tuania nibeʼe Lowalangi sindruhu khönia.+
24 Ero röfi, möi ira laʼohe mbuala khönia simane gama-gama moroi ba wirö, anaʼa, nukha,+ fakake wasuwöta, fanikha famayoini, kudo hegöi kalide sebua.*
25 So 12.000 kudo* khö Zelomo+ ba 4.000 gandra kudo awö gureta wasuwöta. Ibeʼe fefu daʼö ba mbanua si no tobali naha wangiröʼö kureta wasuwöta hegöi ba nahia sahatö ba gödo razo ba Yeruzalema.+
26 Yaʼia zamatörö razo fefu iʼotarai Nungo Nidanö Oiferati irugi danö niha Wilisiti, ofeta ba nola danö Miserai.+
27 Faʼoya wirö niʼowuloi Razo ba Yeruzalema simane faʼoya gara, ba faʼoya geu eresi simane faʼoya geu ara gatua ba Zefela.+
28 So göi kudo niʼohe khö Zelomo si otarai Miserai+ hegöi moroi ba soi böʼö.
29 Fefu waö-waö tanö böʼö sanandrösa khö Zelomo,+ iʼotarai wamobörö irugi gafuriata, no tesura daʼö ba zura Natano+ samaʼeleʼö, ba wamaʼeleʼö Gahia+ niha Zilo, hegöi ba zura gangilata khö Gido+ sangiʼila andrö, sanandrösa khö Yerobeamo+ ono Nebati.
30 Mamatörö Zelomo ba Yeruzalema 40 fakhe waʼara ba ndraono Gizaraʼeli.
31 Aefa daʼö, mate Zelomo* ba lakoʼo ia ba Mbanua Dawido, banua namania,+ ba ononia Rehabeamo zi tobali razo fangalinia.+
Nisura ba gahe zura
^ Mazui ”ba wameʼe dahö-dahö”.
^ Sin.: ”si tobini”.
^ Sin.: ”atata dölania”.
^ Mazui ”fehedemö”.
^ Mazui te ”inönö nasa mbuala si fagölö böli”.
^ Baluse si toʼölö laʼohe si möi fafana.
^ Mazui ”laʼodödögö faʼila bawa khö”.
^ Ba li Heberaiʼo eluahania ngaʼötö galide ba kudo.
^ Mazui ”zi fakudo”.
^ Sin.: ”lafadölö Zelomo ba ngai ndra tuania”.
