Dua Fetero 2:1-22
2 Hewaʼae simanö, so ba gotalua nono mbanua Lowalangi me föna zamaʼeleʼö sofaya, ba hasambalö so göi zamahaʼö sofaya ba gotaluami.+ Lafasindro ngawalö agama si möi börö wamaʼudu ba laʼosilöʼögö zangefaʼö yaʼira,+ irege tehori ira ba zi lö ara tö.
2 Baero daʼö, ato zoloʼö amuatara si lö faʼaila,*+ ba börö ira wa laʼoʼaya lala sindruhu andrö.+
3 Lafakhai walimosa ba wangakali niha böʼö börö me lö ahono dödöra ba zi no so. Hizaʼi, lö ahou wanguhuku si göna khöra si no mutatugöi iʼotarai mböröta,+ hasambalö tehori ira.+
4 Lö alimagö khö Lowalangi wanguhuku ira malaʼika samalua horö,+ hizaʼi itiboʼö ira ba Darataro,*+ irate ira ba zogömi-gömi,* itaha irugi luo wanguhuku.+
5 Lö alimagö khö Lowalangi wanguhuku ulidanö ba götö föna.+ Iʼasogö deu sabölö-bölö irege anönö danö idanö ba niha si lö mamosumange yaʼia,+ hizaʼi iʼorifi Noakhi, sanuriaigö sindruhu+ ba dafitu niha tanö böʼö.+
6 Aefa daʼö, Lowalangi zanguhuku banua Zodoma awö Gomora irege hatö awu,+ enaʼö tobali famangelama ba zalua dania ba niha si lö mamosumange yaʼia.+
7 Iʼorifi göi Loti, niha satulö+ si tefakao börö gamuata si lö faʼaila* nifalua niha si lö sökhi.
8 Ero maʼökhö, tefakao niha satulö andrö börö zi lö sökhi niʼilania hegöi nirongonia sagötö feʼasonia ba gotaluara.
9 Iʼila Yehowa* hewisa wangefaʼö niha samosumange yaʼia soroi ba dödö moroi ba wamakao,+ ba itaha niha si lö sökhi enaʼö tehori ira na luo wanguhuku,+
10 mendrua manö zangodödögö famalua horö ba niha enaʼö raʼiö ira+ ba sangositengagö ira samatörö.+
Barani sibai ira wamalua somasi dödöra, ba lö khöra faʼataʼu ba wangoʼaya niha solakhömi,*
11 ira malaʼika manö sebua kuaso ba sabölö moroi khö ndra samahaʼö sofaya andrö, lö irai lafobahulu ira faoma fehede fangoʼaya, börö me lafosumange Yehowa.*+
12 Ira niha daʼa hulö gurifö si lö tödö, si tumbu enaʼö laraʼu ba labunu, laʼoʼaya zi lö aboto ba dödöra.+ Tehori dania ira börö gamuatara si lö sökhi,
13 latema luo wanguhuku börö waʼalösökhira.
He ba zi maʼökhö, laʼomuso-musoiʼö manö dödöra ba zomasi ira.+ Hulö ndraʼi ba taʼunö ira, omasi sibai ira ladunö-dunö wamahaʼö selungu na falulu manga ami.+
14 Omasi ira wamalua fohorö,+ lö labato wamalua sala ba ladönisi dödö niha sambö famati. Tefahaʼö dödöra ba gamuata fakhögusa. Yaʼira andre si göna fangelifi.
15 Laröi lala sindruhu irege elungu ira. Laʼoʼö lala Mbileamo+ ono Mbeori somasi manema sulö ba wamalua sala,+
16 hizaʼi göna ia degu-tegu börö zala nifaluania.+ Sageu galide si lö li, tola fahuhuo ia simane niha ba wanaha faʼowöhö zamaʼeleʼö andrö.+
17 Hulö gumbu si lö idanö ira, simane sau nitöri nangi, ba toröi ira ba naha sogömi-gömi.+
18 Labeʼe wehede sadöni dödö hizaʼi sindruhunia lö eluaha. Börö gamuatara si lö faʼaila* hegöi faʼomasi nösi ba wamalua horö,+ ladönisi dödö niha si bohou mondröi lala zamalua horö.+
19 Lafabuʼu wangefaʼö hizaʼi yaʼira samösa sawuyu horö.+ Na so zamatörö si samösa niha, daʼö zangosawuyu yaʼia.+
20 Me no laheta ira ba waʼaraʼiö gulidanö+ börö me so khöra waʼaboto ba dödö si tefaudu sanandrösa khö Zoʼaya Yesu Keriso ba Sangorifi yaʼita, na lafuli ira ba gamuata si raʼiö andrö, abölö lö sökhi ira moroi ba zi oföna.+
21 Abölö sökhi lö laʼila lala sindruhu andrö moroi na laʼila, aefa daʼö laröi goroisa niʼamoniʼö si no latema.+
22 Tefaudu khöra gamaedola daʼa: ”Asu samuli yaʼia ba gutania, ba bawi si no mufemondri sangawuli ba getuna.”+
Nisura ba gahe zura
^ Mazui ”amuatara si lö mangila wetahögö”. Ba li Yunani: aselgeia. Faigi Geluaha Ngawua Wehede.
^ Mazui te ”ifazaumba ira ba dögi”.
^ Faigi Geluaha Ngawua Wehede.
^ Mazui ”gamuata si lö mangila wetahögö”. Ba li Yunani: aselgeia. Faigi Geluaha Ngawua Wehede.
^ Eluahania sondröniaʼö ba mbanua niha Keriso.
^ Mazui ”gamuatara si lö mangila wetahögö”. Ba li Yunani: aselgeia. Faigi Geluaha Ngawua Wehede.
