Dua Fetero 3:1-18
3 Yaʼami ira talifusö niʼomasiʼö, ba zuragu si mendrua nibeʼegu khömi simane suragu si oföna, ufarou ami enaʼö miʼokhögö wangera-ngera si sökhi ba wamasugi ba dödö nibeʼegu,+
2 enaʼö itörö tödömi wehede si no irai lafaʼema ira samaʼeleʼö niʼamoniʼö, hegöi oroisa Zoʼaya ba Sangorifi yaʼita nifaʼema ndra sinenge.
3 Böi zi lö aboto ba dödömi ba ngaluo safuria dania, ato niha sangoʼaya ba lafalua zomasi dödöra,+
4 ba lamane, ”Hezo gamabuʼula li ba waʼatoharenia andrö?+ Iʼotarai ndra tuama si no mate* me föna, ba lö manö si tebulö fefu iʼotarai me tewöwöi gulidanö.”+
5 Laʼodödögö wangositengagö sindruhu wa iʼotarai mböröta so mbanua si yawa, ba börö wehede Lowalangi, andrö fabali nidanö moroi ba danö, ba ifasui ia idanö.+
6 Börö daʼö wa alua molö sabölö-bölö mböröta ba wamakiko niha gulidanö me luo daʼö.+
7 Simane daʼö göi, börö wehede Lowalangi wa tehori ba galitö mbanua si yawa awö danö si so iadaʼa, ba itehegö manö so irugi luo wanguhuku ba fangohori niha si lö mamosumange Lowalangi.+
8 Hewaʼae simanö, yaʼami ira talifusö niʼomasiʼö, böi olifu ami wa si maʼö-maʼökhö no timba zi saribu fakhe khö Yehowa,* ba si saribu fakhe timba zi maʼö-maʼökhö.+
9 Lö iʼaragö ginötö Yehowa* ba wamalua si no ifabuʼu,+ simane niwaʼö niha ösa. Hizaʼi, ebolo dödönia khömi börö me lö omasi ia na tekiko fazamösa. Omasi ia enaʼö dozi lafalalini gera-erara.+
10 Hulö weʼaso zanagö+ waʼatohare luo Yehowa.*+ Ba luo daʼö izumaigö taya mbanua si yawa+ börö weʼugu-ugu sabölö-bölö. Fefu zi so ba dalu mbanua hegöi ba danö ahori ariri fefu börö waʼaukhu, simanö göi halöwö nifalua ba daʼö ahori tefakiko ba galitö.+
11 Börö me simane daʼö waʼadudunia fefu, miʼangeragö hewisa ami sindruhunia. Miforege wamalua amuata satulö ba mifosumange Lowalangi soroi ba dödö,
12 midöna-döna ba böi taya ba gera-erami* waʼatohare ngaluo Yehowa.*+ Na luo daʼö, akhozi mbanua si yawa+ ba oi ariri fefu börö waʼaukhu sabölö-bölö!
13 Ba tadöna-döna mbanua si yawa si bohou ba tanö si bohou dali gamabuʼula li Lowalangi,+ ba daʼö dania fahöna waʼatulö.+
14 Andrö yaʼami ira talifusö niʼomasiʼö, börö me midöna-döna daʼa, miforege enaʼö lö mosinegu ami föna Lowalangi, lö taʼunö, ba sökhi wahuwusami khönia.+
15 Aefa daʼö, mibaliʼö fangorifimi waʼebolo dödö Lowalangi andrö, simane nisura Waulo khömi, talifusö niʼomasiʼöda, dali waʼatua-tua andrö nibeʼe khönia.+
16 Daʼö nidunö-dunönia bakha ba zurania andrö fefu. Hizaʼi, so ösa zi lö muʼila eluaha ba lafuyuʼö daʼö niha sambö faʼaboto ba dödö ba sambö famati. Lafalua göi zimane daʼö ba faosatö Mbuku Niʼamoniʼö tanö böʼö irege tehori ira.
17 Börö daʼö, yaʼami ira talifusö niʼomasiʼö, me no tohöna miʼila daʼa iʼotarai mböröta, miʼangelama enaʼö böi elungu ami ba wamahaʼöra nifaʼema niha sanawö huku, enaʼö aro ami ba wamati.+
18 Andrö, böi miböhöli wangalui faʼasökhi dödö sebua* hegöi faʼaboto ba dödö sanandrösa khö Zoʼaya yaʼita Yesu Keriso ba Sangorifi yaʼita. Khönia lakhömi iʼotarai iadaʼa irugi zi lö aetu. Yaduhu.
Nisura ba gahe zura
^ Sin.: ”si no mörö ba waʼamate”.
^ Mazui ”enaʼö omasi sibai ami”. Sin.: ”mifangaösö”.
^ Faigi Geluaha Ngawua Wehede.
