Dua Korindro 11:1-33
11 Utötöna enaʼö ebolo dödömi khögu, hewaʼae na hulö zambö tödö ndraʼo. Faduhu dödögu wa ebolo dödömi khögu!
2 Uʼameʼegö tödö sibai ami simane foʼameʼegö tödö Lowalangi yaʼami, börö me no ufamatua ami khö Keriso, ba ubeʼe sumangenia ami tobali ono alawe niʼamoniʼö.*+
3 Ataʼu ndraʼo na lafaelungu gera-erami, simane me telimo Khawa ba waʼonekhe gulö,+ irege faröi mazui lö teʼamoniʼö* ami föna Keriso.+
4 Sindruhunia, na so zanuriaigö Yesu tanö böʼö, si faböʼö moroi ba nituriaigöma, mazui so waʼabölö sondrönisi era-erami si faböʼö moroi ba waʼabölö zondröniaʼö yaʼami barö daʼa, mazui so duria somuso dödö si faböʼö moroi ba zi no mitema,+ ba iʼanemaiʼö faduhu dödömi ba daʼö.
5 Moloʼö yaʼo, maʼifu na kala ndraʼo moroi ba zinenge si pade andrö khömi.+
6 Hewaʼae na lö onekhe ndraʼo fahuhuo,+ so khögu waʼaboto ba dödö. No mahaogö wangombakha khömi fefu hadia ia ba oya lala nifaluama.
7 Hadia fasala ndraʼo na omasido wanuriaigö turia somuso dödö khömi moroi khö Lowalangi hewaʼae lö böli gölögu, ba uʼide-ideʼö ndraʼo enaʼö teʼalawaʼö ami?+
8 No utema wanolo moroi ba mbanua niha Keriso tanö böʼö, hulö zorabu ndraʼo khöra enaʼö tola ufalua halöwögu khömi.+
9 Me fao ndraʼo khömi ba so zinangea moguna khögu, lö ufoʼömö gofu haniha börö me no labeʼe fefu zoguna khögu ira talifusö si tohare moroi ba Makedonia.+ Uforege enaʼö lö tobali noro dödömi ndraʼo ba lö uböhöli zimane daʼö.+
10 Sagötö tobali ndraʼo soloʼö khö Keriso, lö uböhöli wohöni daʼa+ ba mbanua Nakhaya.
11 Hadia mbörö? Hadia börö me lö uʼomasiʼö ami? Iʼila Lowalangi wa uʼomasiʼö ami.
12 Lö uböhöli wamalua daʼa+ enaʼö lö saʼae si tobali dane-dane wohöni-höni ba niha somasi mamagölösi yaʼira khöma.
13 Yaʼira andrö sinenge sofaya, si falimo ba labaliʼö ira sinenge Keriso.+
14 Lö ahöli dödögu, börö me Satana andrö itagö gamuata malaʼika haga.+
15 Andrö lö ahöli dödöda ndra enoninia na latagö gamuata genoni sindruhu. Ba gafuriata latema zulö moloʼö amuatara zamösana.+
16 Sakali tö uwaʼö: Böi so zangumaʼö wa sambö tödö ndraʼo. Na miwaʼö zimane daʼö, mitema ndraʼo simane niha sambö tödö, enaʼö tola usuno ndraʼo maʼifu.
17 Fahuhuo ndraʼo iadaʼa tenga moloʼö duma-duma nibeʼe Zoʼaya. Fahuhuo ndraʼo hulö niha sambö tödö, somasi manuno yaʼia ba sabeʼe tödö.
18 Börö me ato zohöni ösi gulidanö, andrö göi usuno ndraʼo ba zimanö.
19 Na sindruhu ”motödö ami”, hewisa wa tola mitema niha sambö tödö?
20 Mitema gofu haniha zangosawuyu yaʼami, sangai hare khömi, sorabu okhötami, sangalawaʼö yaʼia ba khömi, ba sanafari bawami.
21 Aila ndraʼo wangumaʼö daʼa khömi, börö me lawalinga ahou ndraʼaga ba wangai angetula.
Hizaʼi, na barani niha böʼö, barani göi ndraʼo, hewaʼae na hulö niha sambö tödö ndraʼo na fahuhuo.
22 Hadia niha Heberaiʼo ira? Simanö göi ndraʼo.+ Hadia iraono Gizaraʼeli ira? Simanö göi ndraʼo.+ Hadia maʼuwu Gaberahamo ira? Simanö göi ndraʼo.
23 Hadia enoni Keriso ira? Fahuhuo ndraʼo hulö niha sowöhö, abölö pade ndraʼo moroi khöra: No uforege wohalöwö,+ asese labeʼe ndraʼo ba gurunga,+ hauga kali labözi irege tebai laʼerai, ba asese arakhagö mate.+
24 Sara ambö 40 mbözi-bözi nitemagu moroi ba niha Yahudi ba zi melima kali.+
25 Tölu kali labözi ndraʼo faoma siʼo,+ sakali latebu kara,+ tölu kali arakhagö ahöndrö göfama,+ ba sara luo sara wongi ndraʼo ba dalu nasi.
26 Asese mofanödo misa ba falukha ndraʼo gametaʼuö ba nungo nidanö, khö ndra sorabu, moroi ba niha si sambua soi khögu+ hegöi soi böʼö,+ ba mbanua sebua,+ ba danö si mate, ba nasi, ba gotalua dalifusö sofaya.
27 Uforege wohalöwö irege marase ndraʼo, asese lö mörö,+ olofo ba owökhi dödö,+ asese lö manga,+ oʼafu ba lö famohani.*
28 Baero daʼö, so wökhö gera-eragu ero maʼökhö, yaʼia daʼö faʼaombö dödögu ba mbanua niha Keriso misa.+
29 Ambö faʼabölögu na so göi zambö faʼabölö, ba aukhu dödögu na so zawuwu.
30 Na usuno ndraʼo, usuno ngawalö zangoromaʼö wa ambö faʼabölögu.
31 Lowalangi, yaʼia daʼö Ama moroi khö Zoʼaya yaʼita Yesu, sinangea musuno ia sagötö faʼara, ba iʼila wa lö falimo ndraʼo.
32 Ba mbanua Ndramaseko, gubernur si so barö mbawa gamatöröwa Razo Areta, no ifataro zozago ba mbawa göli ba wondraʼu yaʼo,
33 hizaʼi ladada ndraʼo ba raga-raga sebua, lafatörö ba zandrela göli mbanua andrö,+ irege aefa ndraʼo ba dangania.
