Dua Korindro 12:1-21
12 Sinangea usuno ndraʼo, hewaʼae lö moguna ia khögu. Hizaʼi iadaʼa ufatunö sanandrösa ba gangilata+ hegöi nifaʼeleʼö Zoʼaya.+
2 Uʼila samösa ndra matua si ha sambua ba khö Keriso, me 14 fakhe silalö iʼanemaiʼö teʼohe ia ba zorugo si tölu. Lö uʼila na teʼohe mbotonia mazui löʼö. Ha Lowalangi zangila.
3 Uʼila niha daʼö hizaʼi lö uʼila hadia teʼohe mbotonia mazui löʼö. Ha Lowalangi zangila.
4 Iʼanemaiʼö teʼohe ia ba waradaiso ba irongo wehede si tebai mutötöi mazui si tebai lawaʼö niha.
5 Usuno niha daʼö, hizaʼi sanandrösa khögu usuno ngawalö zangoromaʼö wa ambö faʼabölögu.
6 Hewaʼae na usuno ndraʼo, tenga niha sambö tödö ndraʼo börö me sindruhu niwaʼögu. Lö omasido usuno ndraʼo, enaʼö misuno ndraʼo ha moloʼö niʼilami ba nirongomi moroi khögu,
7 tenga börö wamaʼeleʼö sahöli-höli dödö si no teʼombakhaʼö khögu.
Enaʼö lö fayawa ndraʼo, tebeʼe khögu ndroi bakha ba mbotogu,+ hulö na so malaʼika Zatana sanafari yaʼo,* enaʼö lö fayawa ndraʼo.
8 No tölu kali uʼandrö khö Lowalangi enaʼö aheta khögu ndroi daʼö.
9 Imane khögu, ”No tobönö waʼasökhi dödö sebua nibeʼegu khöu, börö me moʼahonoa waʼabölögu khöu me ambö faʼabölömö.”+ Si fao faʼomuso dödö usuno ndraʼo börö me ambö faʼabölögu, enaʼö ilumöʼö ndraʼo faʼabölö Keriso simane ose.
10 Omuso dödögu me ambö faʼabölögu, me laʼoʼaya ndraʼo, me moʼamböta, me göna ndraʼo famakao, mazui faʼatosasa börö Keriso. Na sambö faʼabölö ndraʼo, ba daʼö abölödo.+
11 No sambö tödö ndraʼo. Börö ami daʼa, sinangeania menaʼö mitutunö zi sökhi sanandrösa khögu. Hewaʼae si lö eluaha ndraʼo, ba maʼifu lö kala ndraʼo moroi ba zinengemi si pade andrö.+
12 No miʼila wa sinenge ndraʼo, börö me anau gölögu+ ba oya dandra hegöi sahöli-höli dödö awö halöwö safönu faʼabölö nifaluagu.+
13 Hadia so zoʼamböta ami moroi ba mbanua niha Keriso tanö böʼö, baero me lö ufoʼömö ami?+ Uʼandrö waʼebolo dödömi ba zala nifaluagu andre.
14 Sindruhunia, no tölu kali ufaʼanö ndraʼo weʼamöi khömi. Ba zi sakali daʼa lö omasido na tobali noro dödömi ndraʼo, börö me tenga haratomi zomasido,+ hizaʼi yaʼami samösa. Tenga iraono+ zangowuloi harato khö zatua, hizaʼi satua zangowuloi harato ba ndraono.
15 Na yaʼo, soroi ba dödögu wameʼe fefu hadia ia ba utehegö waʼaurigu* khömi.+ Uʼomasiʼö sibai ami, börö daʼö hadia sinangea na ambö miʼomasiʼö ndraʼo?
16 Hewaʼae simanö, lö ubusi dödömi.+ Hizaʼi, miwaʼö wa ”onekhe” ndraʼo ba no uʼakali ami ba ”walimosa”.
17 Hadia uhalö haregu khömi moroi ba niha nifatengegu?
18 Me ufatenge khömi Dito ba so samösa nawönia, hadia ihalö harenia khömi? Löʼö.+ Hadia tenga ha sambua gera-erama? Hadia lö fagölö lala nitöröma?
19 Hadia mimane tödömi, si fabuʼa-buʼa ndraʼaga? Tenga simanö. Matörö zindruhu na fahuhuo ndraʼaga föna Lowalangi, börö me teʼosambuaʼö ndraʼaga khö Keriso. Sindruhunia yaʼami ira talifusö niʼomasiʼö, fefu nifaluama andre ba wamarou tödömi.
20 So khögu wangiwa dödö na tohare ndraʼo dania, tenga simane nitötönagu zalua khömi, ba tenga göi simane nitötönami ndraʼo. Aombö dödögu alai na so zi faʼudu, safökhö tödö, sofönu, fatötöisa, sangoʼaya niha böʼö, famatou-tou awö, si fayawa, ba faʼafawuka.
21 Te na tohare ndraʼo dania, iʼailasi ndraʼo Lowalangi na faodo khömi, ba abu sibai dödögu börö me ato me föna zamalua horö si lö nasa mamalalini era-era moroi ba zi raʼiö, amuata wohorö,* ba amuata si lö faʼaila.*
Nisura ba gahe zura
^ Mazui ”samözi yaʼo”.
^ Mazui ”nosogu”.
^ Ba li Yunani: porneia. Faigi Geluaha Ngawua Wehede.
^ Mazui ”amuata si lö mangila wetahögö”. Ba li Yunani: aselgeia. Faigi Geluaha Ngawua Wehede.
