Dua Korindro 13:1-14
13 Daʼa zi medölu kali ufaʼanö ndraʼo weʼamöi khömi. So ayati sangumaʼö, ”Awena aro gamatunöwa na so darua mazui datölu zamaduhuʼö.”+
2 Hewaʼae na lö yaʼo ba daʼö iadaʼa, hulö mendrua kali no so ndraʼo ba daʼö. Andrö oföna ubeʼe wamangelama ba niha samalua horö ba zilalö hegöi khömi fefu: Lö zi lö ubeʼe khöra degu-degu na tohare ndraʼo.
3 Na simanö, uʼombakhaʼö khömi dandra wa no fahuhuo khögu Keriso si lö ambö faʼabölö ba no iforomaʼö khömi waʼabölönia.
4 Sindruhu sa wa no mate ia ba döla geu famakao börö me ambö faʼabölönia, iadaʼa teʼorifi ia börö waʼabölö Lowalangi.+ Simane yaʼia, ambö göi faʼabölöma iadaʼa hizaʼi auri ndraʼaga awönia dania+ börö waʼabölö Lowalangi andrö sohalöwö ba dödömi.+
5 Böi miböhöli wanekhegö tödömi na samati ami. Mitatugöi hewisa zindruhunia ami.+ Hadia lö aboto ba dödömi wa teʼosambuaʼö ami khö Yesu Keriso? Sindruhunia aboto ba dödömi, hatö na lö itema ami Lowalangi.
6 Utötöna khömi enaʼö aboto ba dödömi wa itema ndraʼaga Lowalangi.
7 Mangandrö ndraʼaga khö Lowalangi enaʼö lö mifalua gofu hadia ia zala. Ohitö dödöma tenga enaʼö latema ndraʼaga niha, hizaʼi enaʼö mifalua zi sökhi hewaʼae na lö latemaʼö ndraʼaga.
8 Tebai malawa zindruhu. Mafalua hadia ia ha ba zindruhu.
9 Lö aetu waʼomuso dödöma na abeʼe wamatimi, hewaʼae na ambö faʼabölöma. Mangandrö göi ndraʼaga enaʼö mifaudugö lala wangera-ngerami.
10 Andrö wa usura zura andre ba ginötö lö yaʼo ba gotaluami enaʼö lö abeʼe wehedegu na so ndraʼo khömi, börö me Soʼaya zameʼe khögu kuaso+ ba wamarou tödö tenga ba wangawuwu.
11 Safuriania yaʼami ira talifusö, böi miböhöli waʼomuso dödömi, mifaudugö lala wangera-ngerami, mitema wondrara dödö,+ yahasara dödömi,+ ba yaʼatulö ami.+ Na mifalua zimanö, fao khömi Lowalangi safönu faʼomasi ba faʼatulö.+
12 Mihaogö wanemaʼö awömi zamösana.
13 Laʼowai ami fefu ira niha niʼamoniʼö.
14 Yafao khömi waʼasökhi dödö sebua* moroi khö Zoʼaya yaʼita Yesu Keriso, faʼomasi Lowalangi, hegöi howu-howu si otarai geheha niʼamoniʼö.
Nisura ba gahe zura
^ Faigi Geluaha Ngawua Wehede.
