Dua Korindro 3:1-18
3 Hadia mafuli zui mafaduhuʼö khömi haniha ndraʼaga? Hadia simane niha böʼö ndraʼaga moguna khöma zura wanuno moroi khömi mazui nifaʼoheʼö khömi?
2 Yaʼami zurama,+ si no tesura ba dödöma, niʼila ba nibaso niha fefu.
3 No oroma wa sura Keriso ami, si no masura börö me no tobali ndraʼaga sangai halöwö khö Lowalangi.+ Tesura ami tenga faoma tawa, hizaʼi faoma eheha Lowalangi sauri, tenga ba gara wanura+ hizaʼi ba dödö.+
4 So khöma waʼafaduhu dödö simane daʼa khö Lowalangi börö Keriso.
5 Lö mawaʼö wa tola mafalua halöwö daʼa börö waʼabölöma samösa. Sindruhunia sa, wa tola mafalua daʼa börö wanolo moroi khö Lowalangi,+
6 irege tola tobali ndraʼaga sangai halöwö ba zi sambua amabuʼula,+ tenga börö wanuturu lala moroi ba goroisa si no tesura,+ hizaʼi börö wanuturu lala moroi ba geheha niʼamoniʼö. Solohe ba waʼamate goroisa si no tesura,+ ba solohe ba waʼauri geheha niʼamoniʼö.+
7 Oroisa solohe ba waʼamate nisura ba gara,+ tohare si fao lakhömi sebua, irege tebai latöngö mbawa Moze iraono Gizaraʼeli börö haga lakhömi mbawania,+ yaʼia daʼö lakhömi si taya dania.
8 Hadia tenga mendrua manö geheha niʼamoniʼö+ andrö tebeʼe si fao lakhömi sabölö ebua?+
9 Na molakhömi+ goroisa solohe ba waʼamate andrö,+ tatu abölö molakhömi halöwö si möi fangatulö niha!+
10 Oroisa solakhömi andrö mböröta lö eluahania na mufaedogö ba lakhömi gamabuʼula li si bohou.+
11 Na oroisa si lö ara tö taya andrö tebeʼe ia faoma lakhömi,+ tatu manö abölö molakhömi gamabuʼula li si so iadaʼa!+
12 Börö me so khöda wanötöna simane daʼö,+ andrö wa lö alawö ita fahuhuo,
13 ba tenga simane Moze sombalugö bawania faoma nukha,+ enaʼö lö laʼila iraono Gizaraʼeli hewisa lua-lua goroisa si lö ara tö taya andrö.
14 No teduhö gera-erara me mböröta,+ ba irugi iadaʼa no teduhö manö gera-erara faoma nukha daʼö irege lö aboto ba dödöra gamabuʼula li siföföna,+ börö me ha Keriso zi tola mangeheta nukha andrö.+
15 Irugi iadaʼa, ero labaso Goroisa Moze,+ no teduhö dödöra faoma nukha.+
16 Hizaʼi, na ifuli ia khö Yehowa* si samösa niha, aheta khönia nukha andrö.+
17 Yehowa* andrö Eheha;+ ba zi so eheha Yehowa* ba daʼö so wangefa.+
18 Yaʼita fefu si lö nibalugö bawa, taforomaʼö lakhömi Yehowa* simane ba zörömi. Tefaböʼöni ita enaʼö hulö simane khili-khili Lowalangi, ba taforomaʼö lakhömi si tedou faʼebua, simane sibai nifalua Yehowa,* Eheha andrö.*+
Nisura ba gahe zura
^ Mazui te ”nifalua geheha Yehowa”.
