Dua Korindro 4:1-18
4 Börö me no matema halöwö moroi khö Lowalangi moloʼö faʼahakhö dödönia, andrö wa lö awuwu ndraʼaga.
2 Matimbagö gamuata fangaila si no tobini, ba lö matörö walimosa mazui mafuyuʼö daromali Lowalangi.+ Mahaogö wanutunö sindruhu irege tola mafaduhuʼö ba dödö niha fefu wa satulö nifaluama föna Lowalangi.+
3 Na tebalu duria somuso dödö niʼombakhaʼöma andre, tebalu ia ba niha sedöna mufakiko,
4 yaʼia daʼö niha si lö famati börö me no ibalugö gera-erara lowalangi si sagötö* tanö andre,+ irege lö laʼila haga moroi ba duria somuso dödö solakhömi,+ turia sanandrösa khö Keriso si no amaedola khili-khili Lowalangi.+
5 Tenga sa yaʼaga niʼombakhaʼöma, hizaʼi Yesu Keriso si no tobali Soʼaya, ba sawuyumi ndraʼaga börö Yesu.
6 No iwaʼö Lowalangi me mböröta, ”Yatumbu haga moroi ba zogömi-gömi”,+ ba no ihagaini dödöda+ iadaʼa faoma faʼaboto ba dödö solakhömi sanandrösa khönia soroma moroi ba zikhala Keriso.
7 Hewaʼae na hulö mbowoa tanö ndraʼaga,+ ba khöma tebeʼe harato andrö,+ ba daʼö oroma wa moroi khö Lowalangi waʼabölöma sahöli-höli dödö, tenga moroi khöma samösa.+
8 Lafalala wamakao yaʼaga ba lö taraso. Lö maʼila hadia nifaluama, hizaʼi so manö lala.*+
9 Tefakao ndraʼaga, hizaʼi tenga zi lö sanolo.+ Laböbözi ndraʼaga irege tegaölö tou ba danö, ba lö mate.+
10 Matörö wamakao safökhö si möi börö waʼamate simane nitörö Yesu,+ irege oroma ba mbotoma waʼauri Yesu.
11 Yaʼaga sauri andre, lö aetu tefatörö khöma waʼamate+ börö Yesu, irege oroma waʼauri Yesu ba mbotoma.
12 Lö aetu matörö waʼamate, eluahania daʼö faʼauri ba khömi.
13 Börö me fagölö wamatima simane si no tesura ba ayati, ”Mamati ndraʼo, andrö wa tola fahuhuo ndraʼo”,+ mamati göi ndraʼaga irege tola fahuhuoga.
14 No aboto ba dödöma wa Lowalangi zanusugi Yesu, ba isusugi göi ndraʼaga si fao khö Yesu ba iʼohe ita föna Yesu.+
15 Fefu daʼö soguna khömi, börö na itugu ato niha samolakhömi Lowalangi+ ba wangandrö saohagölö khönia, ba daʼö fahöna waʼasökhi dödönia sebua.*
16 Andrö lö awuwu ita. Hewaʼae itugu tebai mbotoda, ba ero maʼökhö tebohouni dödö hegöi era-erada.
17 Hewaʼae lö abölö-bölö wamakaoda* andrö ba lö arara, iʼasogö khöda lakhömi sebua ba si lö aetu.+
18 Tenga soroma andrö nifaigida, hizaʼi si lö oroma,+ börö me soroma andrö lö arara, ba si lö oroma andrö irugi zi lö aetu.
Nisura ba gahe zura
^ Faigi Geluaha Ngawua Wehede.
^ Mazui te ”lö afatö dödöma”.
^ Faigi Geluaha Ngawua Wehede.
^ Mazui ”wanandraigö”.
