Dua Korindro 5:1-21
5 Aboto ba dödöda wa tedudugö dania nomoda ba gulidanö andre,+ yaʼia daʼö botoda si hulö nose, ba ibeʼe khöda Lowalangi nomo ba zorugo si lö tebulö irugi zi lö aetu,+ tenga nifazökhi niha.
2 Ba nomoda* iadaʼa, mangarö-ngarö ita bakha ba dödö, börö me omasi sibai ita wangogunaʼö si no tehenaigö khöda* ba zorugo,+
3 na no taʼonukha ia ba tenga saʼae si lö balu-balu ita.
4 Sindruhunia, yaʼita si so ba nose andre mangarö-ngarö ita bakha ba dödö ba abua sibai noroda, börö me lö omasi ita taheta daʼa,+ hizaʼi taʼonukha zi sambua andrö enaʼö tefalalini mboto si tola mate faoma faʼauri.+
5 Si no mamaʼanö yaʼita ba waʼauri andrö yaʼia daʼö Lowalangi,+ sameʼe khöda eheha si tobali tandra* ba zalua andrö dania.+
6 Börö daʼö, faduhu dödöda ba taʼila wa sagötö faʼatoröida ba mboto andre, fandröndröu ita khö Zoʼaya.+
7 Börö me ba wamati auri ita, tenga dali niʼila hörö.
8 Faduhu dödöda ba abölö omasi ita na fao ita khö Zoʼaya moroi na toröi ita ba mboto andre.+
9 Andrö he na fao ita mazui fandröndröu ita khönia, taforege wangomusoiʼö tödönia.
10 Fefu ita dania mozizio föna gurusi wanguhuku khö Keriso, irege itema zamösana zulö nifaluania sagötö faʼatoröinia ba mboto andre, he si sökhi hegöi si lö sökhi.+
11 Börö me no aboto ba dödöma geluaha wangataʼufi Soʼaya, lö maböhöli wamaduhuʼö ba niha böʼö, hizaʼi aboto ba dödö Lowalangi haniha ndraʼaga. Hewaʼae simanö, utötöna göi enaʼö aboto ba dödömi side-ide haniha ndraʼaga.
12 Lö mafuli mafaduhuʼö ndraʼaga khömi. Omasiga mafarou dödömi enaʼö omuso dödömi ba khöma irege tola mitema li niha sanuno yaʼia ba zoroma andrö,+ tenga si so ba dödö.
13 Na hulö zowöhö mowa ndraʼaga,+ daʼö no khö Lowalangi. Ba na hulö zi so era-era ndraʼaga ba no khömi daʼö.
14 Tefarou dödöma börö waʼomasi Keriso. Angetulama yaʼia daʼö: Samösa zi mate salahi zato,+ börö me sindruhunia no ahori mate fefu niha.
15 Mate ia salahi zato enaʼö niha sauri tenga saʼae khöra waʼaurira,+ hizaʼi khö Keriso si no tesusugi ba si no mate salahira.
16 Andrö, iʼotarai iadaʼa, lö matatugöi gofu haniha moloʼö famaigi niha.+ Hewaʼae no irai masuʼa tödöma Keriso moloʼö famaigi niha, ba tenga simane daʼö wamaigima yaʼia saʼae.+
17 Börö daʼö, gofu haniha zi ha sambua ba khö Keriso, tobali ia niwöwöi si bohou.+ No numalö zi tohöna andrö, ba si bohou zi so iadaʼa.
18 Fefu daʼö moroi khö Lowalangi si no mangatulöʼö yaʼaga khönia börö Keriso,+ ba ibeʼe khöma halöwö ba wangatulö,+
19 yaʼia daʼö halöwö fanuriaigö wa Keriso niʼogunaʼö Lowalangi ba wangatulöʼö niha khönia,+ lö iʼerai zala nifaluara+ ba no ifaduhusi tödö khöma duria fangatulö andrö.+
20 Börö daʼö, yaʼaga andre tenge-tenge+ si möi salahi Keriso,+ hulö na iʼogunaʼö ndraʼaga Lowalangi ba wogaoni niha. Börö me salahi Keriso ndraʼaga, maʼandrö khömi enaʼö, ”Miʼatulöʼö ami khö Lowalangi.”
21 No ibaliʼö sumange fameta horöda* zi lö horö+ andrö Lowalangi, enaʼö tobali ita niha satulö khönia börö Keriso.+
Nisura ba gahe zura
^ Mazui ”Ba nahia waʼatoröida”.
^ Mazui ”tehenaigö ba nahia waʼatoröida”.
^ Mazui ”weʼe-weʼe dödö”.
^ Sin.: ”ibaliʼö horöda”.
