Dua Korindro 7:1-16
7 He yaʼami ira talifusö niʼomasiʼö, börö me no tatema mbuʼusa li andrö,+ dataʼehaogö ita moroi ba ngawalö zi tola manaʼunöisi botoda hegöi fangera-ngerada,+ enaʼö itugu moʼahonoa ita ba wangataʼufi Lowalangi.
2 Mifonaha ndraʼaga ba dödömi.+ Lö si fasala ndraʼaga ba niha, lö nifaelunguma niha, ba lö falimoga ha enaʼö masöndra hare.+
3 Wa uwaʼö daʼa tenga ba wanguhuku yaʼami. Simane niwaʼögu ba zilalö, ba dödöma so ami irege tobali ami awöma ba waʼauri hegöi ba waʼamate.
4 Lö taha-tahagu ba wahuhuosa khömi ba omuso dödögu ba khömi. Sindruhu-ndruhu wa terara dödögu, ba fahöna khögu waʼomuso dödö hewaʼae oya mataögö wamakao.+
5 Lö ahono dödöma me no marugi Makedonia,+ ba lö tebato mataögö ngawalö wamakao. So wolohi moroi baero ba so waʼataʼu moroi bakha.
6 Lö tebulö Lowalangi ba wameʼe fondrara dödö ba niha sabu tödö,+ irara dödöma ba weʼaso Dito.
7 Tenga ha me no tohare ia wa terara dödöma, hizaʼi börö wondrara dödö nitemania moroi khömi. Ifatunö khöma hewisa wa edöna sibai ami falukha khögu, faʼabu dödömi sabölö-bölö, ba foʼameʼegö tödömi yaʼo soroi ba dödö,* irege monönö waʼomuso dödögu.
8 Hewaʼae abu dödömi ba zuragu andre ba lö maniasado.+ Uʼila wa abu dödömi ba zura daʼö, hizaʼi ha sabata. Hewaʼae maniasa ndraʼo ba wamobörö,
9 ba omuso dödögu iadaʼa, tenga börö me abu dödömi, hizaʼi faʼabu dödömi andrö zamarou tödömi ba wamalalini era-era. Faʼabu dödömi andrö tefaudu ba zomasi Lowalangi irege lö mafaʼala ami.
10 Faʼabu dödö si tefaudu ba zomasi Lowalangi lua-luania famalalini era-era solohe ba wangorifi, si lö faniasa,+ hizaʼi faʼabu dödö ba gulidanö andre iʼasogö waʼamate.
11 Tefaudu sibai waʼabu dödömi andrö ba zomasi Lowalangi, irege miʼodödögö wamalua sindruhu. Mifaduhuʼö wa lö fasala ami, maniasa ami börö zala nifaluami, so khömi waʼataʼu, so waʼedönami, owölö-ölö ami, mihaogö gamuatami enaʼö lö mifalua zala!+ Ba daʼa, no mifalua zatulö.*
12 Me luo daʼö, ufaʼoheʼö khömi zura tenga soguna ba niha samalua sala+ mazui niha nifaʼala. Ufaʼoheʼö khömi zura enaʼö miʼoromaʼö föna Lowalangi wa omasi ami mifondrondrongo ndraʼaga.
13 Daʼö mbörö wa terara dödöma.
Baero daʼö nasa, monönö waʼomuso dödöma me omuso dödö Dito börö me fefu ami miʼokafui dödönia.
14 No irai usuno ami khö Dito ba lö ailado. Atulö fefu zi no matutunö khönia, simanö göi nifatunöma sanandrösa khömi.
15 Baero daʼö, itugu iʼomasiʼö ami Tito börö me itörö tödönia hewisa woloʼömi+ ba no mitemaʼö ia si fao sumange.
16 Omuso dödögu börö me ba ngawalö hadia ia tola ufaduhusi tödö ami.*
Nisura ba gahe zura
^ Mazui ”faʼaterou dödömi khögu”.
^ Mazui ”lö fasala ami”.
^ Mazui te ”tola teʼaroʼö ndraʼo börö ami”.
