2 Moze 16:1-36
16 Ba mofanö fefu ndraono Gizaraʼeli moroi ba Gelima. Sara waŵa me no aheta ira moroi ba danö Miserai yaʼia daʼö ba ngaluo si 15 ba mbaŵa si 2, larugi Danö si Mate Sini,+ si so ba gotalua Gelima faoma Sinaʼi.
2 Ba fatahi-tahi* fefu ndraono Gizaraʼeli khö Moze hegöi khö Gaʼaroni ba danö si mate.+
3 Lamane khöra iraono Gizaraʼeli, ”Abölö sökhi matega ba danga Yehowa me so ndraʼaga ba danö Miserai, me abusoga wemanga nagole faoma roti.+ Iadaʼa, midönisi ndraʼaga ba danö si mate andre enaʼö matega waʼolofo.”+
4 Ba imane Yehowa khö Moze, ”Utorugö dania roti moroi ba mbanua si yawa simane teu+ ba akha lahalö zoguna khöra ba zi maʼökhö daʼö ero samösa.+ Ba daʼö dania utandraigö ira hadia laʼoʼö goroisagu mazui löʼö.+
5 Hizaʼi, ba ngaluo si önö+ enaʼö laʼowuloi dua kali faʼoya moroi ba zi toʼölö.+ Aefa daʼö, larino fefu.”
6 Ba lamane ira Moze hegöi Aʼaroni ba ndraono Gizaraʼeli sato, ”Na bongi dania, ba daʼö aboto ba dödömi wa Yehowa zangeheta yaʼami ba danö Miserai.+
7 Ero sihulö wongi miʼila dania lakhömi Yehowa börö me no irongo Yehowa watahisami khönia. Haniha ndraʼaga andre irege fatahi ami khöma?”
8 Imane nasa Moze, ”Na bongi ibeʼe ömi Yehowa nagole, na moluo ibeʼe ömi roti irege abuso ami. Ba aboto dania ba dödömi wa no irongo Yehowa watahisami khönia. Haniha ndraʼaga andre? Sindruhunia tenga khöma fatahi ami, hizaʼi khö Yehowa.”+
9 Imane Moze khö Gaʼaroni, ”Fatunö ba ndraono Gizaraʼeli maʼafefu, ’No irongo Yehowa watahisami.+ Börö daʼö, miʼowuloi ami ba daʼa.’”
10 Me awena sibai awai fahuhuo Gaʼaroni ba ndraono Gizaraʼeli, lafakhölö ira wamaigi tanö si mate, ba oroma lakhömi Yehowa bakha ba döla lawuo.+
11 Fahuhuo Yehowa khö Moze,
12 ”No urongo watahisa ndraono Gizaraʼeli.+ Fatunö khöra, ’Ba zi tanö owi* nagole gömi, ba zihulö wongi miʼa roti irege abuso ami.+ Awena dania aboto ba dödömi haniha Yehowa Lowalangimi andrö.’”+
13 Ba zi bongi daʼö, oya sibai wofo* irege lahawui nose,+ ba sihulö wonginia, fefu danö ba zi fasui ose afönu namo.
14 Me no taya namo andrö, ba so ngawua side-ide simane faʼebua damböni si hulö esi sombalugö tanö ba danö si mate.+
15 Me lafaigi daʼö iraono Gizaraʼeli, ba lö laʼila hadia daʼö. Faoma lamane, ”Hadia daʼa?” Imane khöra Moze, ”Daʼa roti nibeʼe Yehowa si tobali ömi.+
16 No iwaʼö Yehowa: ’Iʼowuloi hawaʼoya zoguna khönia ero samösa. Miʼowuloi moloʼö faʼato niha si so ba nose khömi, 2,2 liter*+ ero samösa.’”
17 Ba lafalua daʼö iraono Gizaraʼeli. So zoya mangai ba so göi zangai ha maʼifu.
18 Hewaʼae oya lahalö mazui löʼö, ahori dozi niha roti daʼö me lasuʼa.+ Oi zara laʼowuloi moloʼö soguna khöra zamösana.
19 Imane khöra Moze, ”Böi mitenagö daʼö irugi sihulö wongi.”+
20 Hizaʼi, lö larongo niwaʼö Moze. So zangiröʼö ofeta mahemolu sihulö wongi, irege aböu oboula roti daʼö ba moʼulö-ulö. Ba mofönu sibai khöra Moze.
21 Ero sihulö wongi laʼowuloi. Oi zara laʼowuloi moloʼö soguna khöra zamösana. Na ibörögö aukhu zino ba tobali idanö ngawua si so ba danö andrö.
22 Ba ngaluo si önö, laʼowuloi dua kali faʼoya moroi ba zi toʼölö,+ 4,4 liter* ero samösa niha. Tohare fefu zondröniaʼö ono mbanua ba lafatunö khö Moze zalua andrö.
23 Imane khöra Moze, ”No iwaʼö Yehowa, mahemolu ginötö wolombase, sabato niʼamoniʼö khö Yehowa.+ Mifaga zinangea mifaga ba mirino zinangea mirino,+ ba miʼiröʼö zi toröi irugi mahemolu.”
24 Simane niwaʼö Moze, laʼiröʼö zi toröi irugi sihulö wongi mahemolunia. Lö aböu oboula roti daʼö ba lö moʼulö-ulö.
25 Imane Moze, ”Miʼa roti daʼö maʼökhö, börö me luo sabato maʼökhö khö Yehowa. He na miʼalui ia dania ba lö misöndra ba danö.
26 Tola miʼowuloi roti daʼö sagötö zi önö hari, hizaʼi lö tesöndra ia ba ngaluo si fitu, luo Sabato.”+
27 Hewaʼae simanö, so niha si möi baero ba wangozaragö roti ba ngaluo si fitu. Hizaʼi, lö lasöndra hadia ia.
28 Ba imane Yehowa khö Moze, ”Hawaʼara miböhöli wolawa oroisagu ba miʼoʼö faretagu?+
29 Böi olifu ami wa yaʼo Yehowa no uhenaigö khömi luo Sabato.+ Daʼö mbörö wa ba ngaluo si önö, ubeʼe khömi roti soguna ba zi dua hari. Ba ngaluo si fitu, enaʼö ahono fefu niha ba nahiara zamösana ba tebai so zofanö.”
30 Ba lafalua Zabato* iraono Gizaraʼeli ba ngaluo si fitu.+
31 Lafotöi iraono Gizaraʼeli roti daʼö ”mana”.* Hulö ngawua ketumbar safusi mana daʼö ba faʼaminia hulö kue sanifi si no labeʼe wewani.+
32 Imane Moze, ”No iwaʼö Yehowa: ’Mihalö 2,2 liter* mana ba miʼiröʼö daʼö soguna khömi hegöi ba ngaʼötömi,+ enaʼö tola laʼila roti nibeʼegu khömi ba danö si mate, me uheta ami ba danö Miserai.’”
33 Imane Moze khö Gaʼaroni, ”Halö sambua rumbi ba beʼe bakha mana 2,2 liter.* Aefa daʼö, beʼe föna Yehowa enaʼö laʼiröʼö daʼö soguna khömi hegöi ba ngaʼötömi.”+
34 Simane niwaʼö Yehowa khö Moze, ba ihalö daʼö Aʼaroni ba ibeʼe föna Wamaduhuʼö,+ enaʼö so irugi zi lö aetu.
35 Laʼa mana iraono Gizaraʼeli sagötö zi 40 fakhe+ irege larugi mbanua si so niha.+ Laʼa mana irege ofeta ira ba nola danö Ganaʼana.+
36 Sambua omeri fagölö ira zi sambua niʼofulu efa.*
Nisura ba gahe zura
^ Mazui ”mukökö-kökö”.
^ Te me no aekhu luo, fatua lö ogömi.
^ Sin.: ”puyuh”. Fofo side-ide, mato 18 cm waʼanau. Ami sibai nagolenia, simane nagole manu.
^ Mazui ”wolombase”.
^ Te moroi ba li Heberaiʼo döi daʼa, eluahania ”Hadia daʼa?”
