2 Moze 25:1-40
25 Imane Yehowa khö Moze,
2 ”Waʼö ba ndraono Gizaraʼeli enaʼö labeʼe khögu dolo-tolo. Owuloi dolo-tolo andrö si no labeʼe ira niha si terou tödö.+
3 Daʼa dolo-tolo sinangea öʼowuloi moroi khöra: anaʼa,+ firö,+ tembaga,+
4 bana sobalau, nukha si ungu laʼa-laʼa,* bana soyo,* nukha si sökhi, bu nambi,
5 uli mbiri-biri si matua si no laʼoyoni, uli nasu nasi, eu akasia,+
6 fanikha wandru,+ fanikha famataro*+ awö zumange somuhua,+
7 kara una, ba kara tanö böʼö nibeʼe ba nukha gere*+ hegöi balu-balu dötöʼa.+
8 Mifazökhi khögu naha niʼamoniʼö, ba toröi ndraʼo ba gotaluami.+
9 Uforomaʼö khöu dania duma-duma ba wamazökhi ose Lowalangi awö gama-gamania. Fazökhi fefu daʼö simane niforomaʼögu khöu.+
10 ”Fazökhi dawöla* moroi ba geu akasia. Faʼanaunia 111 sentimeter, faʼebolonia 67 sentimeter, ba faʼalawania 67 sentimeter.*+
11 Foʼuli tanö bakha hegöi tanö baero faoma anaʼa si sökhi.+ Fazökhi lesi-lesi moroi ba ganaʼa ba zi fasui detenia tanö yawa.+
12 Fazökhi öfa ngawua galadanga moroi ba ganaʼa ba öbeʼe ba gahe dawöla andrö si öfa rozi, dombu-dombua fatambai.
13 Fazökhi göi mbea-bea moroi ba geu akasia ba foʼuli faoma anaʼa.+
14 Öfatörö mbea-bea daʼö bakha ba galadanga si so ba gahe Dawöla enaʼö tola mufazawa.
15 Tebai miheta mbea-bea daʼö moroi ba galadanga si so ba Dawöla.+
16 Bakha ba Dawöla andrö beʼe Wamaduhuʼö* nibeʼegu khöu dania.+
17 ”Fazökhi lagö-lagönia moroi ba ganaʼa si sökhi. Faʼanaunia 111 sentimeter ba faʼebolonia 67 sentimeter.*+
18 Fazökhi dombua wamaedo kerubi moroi ba ganaʼa ba mbalö lagö-lagönia.+ Niböbözi wamazökhi yaʼia.
19 Fazökhi sambua kerubi ba mbalö si tambai ba sambua tö kerubi ba mbalö si tambai.
20 Faoma fatahö kerubi si dombua ba no lafaöndrö ira wangotahögö lagö-lagö andrö. No labologö gafira numalö miyawa ba wolumöʼö lagö-lagö daʼö.+
21 Beʼe lagö-lagö+ ba Dawöla, ba bakha ba Dawöla andrö beʼe dania Wamaduhuʼö nibeʼegu khöu.
22 Tohare dania ndraʼo ba dete lagö-lagö ba fahuhuo ndraʼo khöu.+ Ba gotalua kerubi si so ba dawöla Famaduhuʼö, ba daʼö dania ufatunö khöu goroisa nifaʼemau ba ndraono Gizaraʼeli.
23 ”Ba fazökhi göi meza+ moroi ba geu akasia. Faʼanaunia 89 sentimeter, faʼebolonia 44,5 sentimeter, ba faʼalawania 67 sentimeter.*+
24 Foʼuli meza daʼö faoma anaʼa si sökhi ba fazökhi lesi-lesi moroi ba ganaʼa ba zi fasui dete meza andrö.
25 Fazökhi zinga meza faʼebolonia ezai laluʼa.* Fazökhi lesi-lesi moroi ba ganaʼa ba zi fasui zinga meza andrö.
26 Fazökhi öfa ngawua galadanga moroi ba ganaʼa ba öbeʼe ba gahenia si öfa rozi, ahatö ba watalinga meza.
27 Fasa galadanga andrö ba zinga meza. Bea-bea famazawa meza andrö lafatörö dania bakha ba galadanga daʼö.
28 Fazökhi mbea-bea andrö moroi ba geu akasia ba foʼuli ia faoma anaʼa. Ogunaʼö daʼö ba wamazawa meza.
29 ”Fazökhi mato hauga ngawua wiga, mako, teko hegöi tambala niʼogunaʼö ba wamataula sumange nibadu. Fazökhi daʼö fefu moroi ba ganaʼa si sökhi.+
30 Böi böhöli wameʼe ba meza andrö roti nibaliʼö sumange tanö fönagu.+
31 ”Fazökhi naha wandru+ moroi ba ganaʼa si sökhi. Niböbözi wamazökhi yaʼia. Fazökhi döla-döla naha wandru daʼö ba öfodane-dane, modaha, so zi hulö mako, so zi hulö mbene, ba so zi hulö mbunga. Fazökhi naha wandru andrö moroi ba zi safoto anaʼa ba horigö fakhai fefu.+
32 Ba döla-döla wandru andrö so önö rozi ndraha, tölu rozi ba gambölö ba tölu rozi ba gabera.
33 Ero sara ndrahania, so tölu ngawua zi hulö mako simane bowo mbunga almond,* tölu ngawua göi mbene hegöi bungania. Fasoli wamaʼanö yaʼia. Simane daʼö wamazökhi daha si öfa rozi andrö, he ba gambölö hegöi ba gabera.
34 Ba döla-döla wandru andrö, fazökhi öfa ngawua zi hulö mako simane bowo mbunga almond, öfa ngawua mbene hegöi bungania. Fasoli wamaʼanö yaʼia.
35 So sambua mbowo ba narö ndraha si oföna, sambua mbowo ba narö ndraha si dua, ba sambua tö mbowo ba narö ndraha si tölu. Simane daʼö zi önö rozi ndraha andrö ba dölania.
36 Bene, daha, ba fefu ngawalö naha wandru andrö mufazökhi moroi ba ganaʼa si sökhi. Niböbözi wamazökhi yaʼia+ ba horigö fakhai fefu.
37 Fazökhi fitu ngawua wandru ba beʼe ba naha wandru andrö. Na mutunu wandru daʼö ba ihagaini fefu tanö föna.+
38 Fazökhi göi wolazi tali wandru awö naha mbo galitö moroi ba ganaʼa si sökhi.+
39 Fazökhi naha wandru daʼö ba fefu gama-gamania moroi ba ganaʼa si sökhi, faʼabuania 34,2 kilogram.*
40 Fazökhi fefu daʼö simane famaedo niforomaʼögu khöu ba hili andre.+
Nisura ba gahe zura
^ Mazui ”sobowo doru”.
^ Mazui ”kirimisi”.
^ Sin.: ”famayoini”.
^ Mazui ”efod”. Daʼa mbaru sebua si so tanö föna ba tanö furi.
^ Mazui ”weti”.
^ Eluahania kara wanura si so oroisa Lowalangi.
^ Mazui ”badam”.
