Dua Razo 1:1-18
-
Ifa’ele’ö Elia wa’amate Gahaseya (1-18)
1 Me no mate Gahabi, mamadaö niha Moabi+ ba ndraono Gizaraʼeli.
2 Samuza maʼökhö aekhu Gahaseya moroi ba mbumbu nomonia ba Zamaria ba gamaudu zara-zara eu. Ifatenge ngoni-ngoninia ba imane khöra, ”Miʼae misofu khö Mbaʼali-zebubi lowalangi Nekerona+ hadia tola döhö ndraʼo mazui löʼö.”+
3 Hizaʼi, imane malaʼika Yehowa khö Gelia*+ niha Disebe, ”Faoso, ae falukhaisi ngoni-ngoni razo Zamaria ba ömane khöra, ’Hadia lö hadöi Lowalangi ndraono Gizaraʼeli irege manofu ami khö Mbaʼali-zebubi lowalangi Nekerona?+
4 Daʼa niwaʼö Yehowa khö Razo, ”Tebai öfazawa ndraʼugö moroi ba naha wemöröu. Hasambalö mate ndraʼugö.”’” Ba mofanö Gelia.
5 Me mangawuli ngoni-ngoninia imane Razo, ”Hana wa mifuli ami?”
6 Lamane, ”So samösa ndra matua samalukhaisi yaʼaga, imane khöma, ’Mifuli ami khö razo samatenge yaʼami. Miʼombakhaʼö khönia, ”Daʼa niwaʼö Yehowa, ’Hadia lö hadöi Lowalangi ndraono Gizaraʼeli irege öfatenge ngoni-ngonimö ba wanofu khö Mbaʼali-zebubi lowalangi Nekerona? Börö daʼö, tebai öfazawa ndraʼugö ba naha wemöröu. Hasambalö mate ndraʼugö.’”’”+
7 Manofu Razo, ”Hewisa zikhala niha samalukhaisi yaʼami andrö ba sangumaʼö fehede daʼö khömi?”
8 Lamane, ”No ifake nukha moroi ba mbu gurifö+ ba böbö löwinia moroi ba guli gurifö.”+ Iʼanemaiʼö imane Razo, ”Elia daʼö niha Disebe.”
9 Aefa daʼö, ifatenge Razo samösa gumandru zaradadu si 50 awö nono buania si 50 niha ba wamalukhaisi Elia. Me tohare gumandru andrö, si yawa ba zuzu hili so Gelia ba no modadao ia ba daʼö. Imane khö Gelia, ”He enoni Lowalangi sindruhu,+ iʼandrö Razo enaʼö möiʼö khönia.”
10 Hizaʼi, imane Elia khö gumandru andrö, ”Na enoni Lowalangi sindruhu ndraʼo, atoru galitö moroi ba mbanua+ ba ikhozi ndraʼugö awö nono buau si 50 niha.” Atoru galitö moroi ba mbanua ba ikhozi gumandru daʼö awö nono buania si 50 niha.
11 Aefa daʼö, ifatenge zui Razo samösa gumandru zaradadu si 50 tanö böʼö awö nono buania si 50 niha. Mofanö gumandru daʼö ba imane khö Gelia, ”He enoni Lowalangi sindruhu, iʼandrö Razo enaʼö möiʼö khönia ba waʼalio.”
12 Imane Elia, ”Na enoni Lowalangi sindruhu ndraʼo, atoru galitö moroi ba mbanua ba ikhozi ndraʼugö awö nono buau si 50 niha.” Itorugö galitö Lowalangi moroi ba mbanua ba ikhozi gumandru daʼö awö nono buania si 50 niha.
13 Ba zi medölu kali, ifuli zui ifatenge Razo samösa gumandru zaradadu si 50 awö nono buania si 50 niha. Möi ba hili gumandru si medölu andrö ba ituhi danö föna Gelia. Iʼandrö waʼahakhö dödö khö Gelia imane, ”He enoni Lowalangi sindruhu, uʼandrö khöu enaʼö öhakhösi tödö waʼaurigu hegöi faʼauri nono buagu si 50 niha andre.
14 No aekhu galitö moroi ba mbanua ba no ikhozi darua gumandru zaradadu si 50 niha fatua lö yaʼo awö nono buara maʼafefu. Iadaʼa, uʼandrö khöu enaʼö öhakhösi tödö waʼaurigu.”
15 Imane malaʼika Yehowa khö Gelia, ”Aeʼe mitou awönia. Böi öʼataʼufi ia.” Fao khönia Gelia weʼamöi mitou ba wamalukhaisi Razo.
16 Imane Elia khö Razo, ”Daʼa niwaʼö Yehowa, ’No öfatenge ngoni-ngonimö ba wanofu khö Mbaʼali-zebubi lowalangi Nekerona.+ Hadia lö hadöi Lowalangi ndraono Gizaraʼeli?+ Hana wa tenga khönia manofuʼö? Na simanö, tebai öfazawa ndraʼugö ba naha wemöröu. Hasambalö mate ndraʼugö.’”
17 Mate Razo Ahaseya, itörö niwaʼö Yehowa si no ifaʼema Elia. Börö me lö hadöi ono matua khö Gahaseya, akhinia Yoramo+ zi tobali razo fangalinia. Alua daʼö me no dua fakhe mamatörö Yoramo+ ono Yozafati razo Yehuda.
18 Fefu waö-waö tanö böʼö sanandrösa khö Gahaseya,+ tefarahu ba daʼö nifaluania, no tesura daʼö ba mbuku razo-razo ndraono Gizaraʼeli.
Nisura ba gahe zura
^ Eluahania ”Lowalangigu Yehowa”.
