Dua Razo 10:1-36
10 So 70 nono matua khö Gahabi+ ba Zamaria. Börö daʼö, ifaʼoheʼö zurania Yehu ba Zamaria khö ndra sondröniaʼö ba Yezereʼeli, satua mbanua+ hegöi ba niha sondrorogö ono Gahabi. Imane,
2 ”Ba daʼö so khömi nono zokhö yaʼami, simanö nasa gureta wasuwöta, kudo hegöi banua si no mufasui öli. Na ofeta khömi zura daʼa,
3 mifili samösa zabölö sökhi ba sabölö tefaudu ba gotalua nono matua khö zokhö yaʼami, mibaliʼö ia razo ba dadaoma namania. Aefa daʼö, miʼaeʼe fasuwö salahi nösi nomo zokhö yaʼami.”
4 Hizaʼi, ataʼu ira ba lamane, ”Na tebai lalawa ia razo si darua andrö,+ mendrua manö saʼae ita.”
5 Ira sondröniaʼö ba gödo razo, ira gubernur ba mbanua andrö, ira satua mbanua hegöi sondrorogö ono razo, lafaʼoheʼö goroisa khö Yehu, ”Enonimö ndraʼaga, Pa. Fefu niwaʼöu khöma hasambalö mafalua. Lö matuyu gofu haniha enaʼö tobali razo. Falua fefu zi sökhi ba wamaigimö.”
6 Isura zurania si mendrua Yehu, ”Na faʼawö ami khögu ba miʼoʼö niwaʼögu, miʼohe högö ndraono matua khö zokhö yaʼami mahemolu ba Yezereʼeli, simane daʼa waʼalawa luo.”
No fao zi 70 ndraono matua khö razo ba niha nifosumange ba mbanua daʼö, sangebuaʼö yaʼira.
7 Me latema zura daʼö, laʼanemaiʼö labunu nono razo si 70.+ Labeʼe högöra bakha ba raga-raga ba laʼohe daʼö khö Yehu ba Yezereʼeli.
8 Aefa daʼö laʼombakhaʼö khö Yehu, ”No laʼohe ba daʼa högö ndraono razo.” Imane Yehu, ”Mibeʼe daʼö ba mbawa göli mbanua irugi sihulö wongi, ba mifodombua nahia.”
9 Ba zihulö wongi, möi baero Yehu ba mozizio ia föna niha sato ba imane, ”Lö nifaluami zala. Sindruhu wa no mamagölö ndraʼo ba no ubunu zokhö yaʼo,+ hizaʼi haniha zamunu yaʼira andre?
10 Yaʼaboto ba dödömi wa hasambalö itörö* fefu daromali Yehowa,+ si no iwaʼö Yehowa sanandrösa ba nösi nomo Gahabi. Ifalua Yehowa hadia zi no ifaʼema khö genoninia Elia.”+
11 Möi Yehu wamunu ösi nomo Gahabi si toröi si so ba Yezereʼeli, tefarahu ba daʼö niha nifosumange, si fahuwu khönia hegöi ere sangai halöwö khönia+ irege lö hadöi sauri ibeʼe.+
12 Aefa daʼö, möi Yehu ba Zamaria. Ba dalu lala, so nomo niʼogunaʼö ndra kubalo ba woguti bu mbiri-biri.*
13 Ba daʼö, falukha ia ndra talifusö Gahaseya+ razo Yehuda. Manofu ia khöra, ”Haniha ami?” Lamane, ”Yaʼaga andre talifusö Gahaseya, möiga masofu hewisa duria ndraono razo hegöi iraono böʼö khö nina razo.”*
14 Iʼanemaiʼö imane Yehu, ”Miraʼu ira!” Laraʼu zi 42 niha andrö ba labunu ba mbaʼa nidanö sahatö ba nomo woguti bu mbiri-biri. Samösa lö sauri ibeʼe.+
15 Me mofanö ia moroi ba daʼö, falukha ia khö Yonadabi+ ono Rekhabi,+ si möi mamalukhaisi yaʼia. Me iʼowai* ia Yonadabi, imane khönia Yehu, ”Hadia lö faröi dödömö khögu simane faʼalöfaröi dödögu khöu?”
Imane Yonadabi, ”Löʼö.”
Imane Yehu, ”Na simanö, oroʼö dangau.”
Iʼoroʼö dangania, ba isöbi ia yawa Yehu ba gureta wasuwötania.
16 Imane Yehu, ”Fao khögu ba faigi hewisa wangohorigu niha si no faröi khö Yehowa.”*+ Iʼohe ia Yehu wefao khönia yawa ba gureta wasuwöta.
17 Me irugi Zamaria, ibunu fefu niha si toröi moroi ba nösi nomo Gahabi. Ihori ira maʼafefu+ simane niwaʼö Yehowa khö Gelia.+
18 Aefa daʼö, iʼowuloi fefu niha si so ba daʼö Yehu ba imane khöra, ”Lö iforege Ahabi ba wamosumange Baʼali.+ Hizaʼi, hasambalö uforege wamosumange Baʼali.
19 Börö daʼö, miʼowuloi fefu zamaʼeleʼö khö Mbaʼali,+ fefu niha samosumange yaʼia hegöi ira ere sohalöwö ba daʼö.+ Böi so zi lö möi, börö me ubeʼe zumange soya sibai khö Mbaʼali. Gofu haniha zi lö möi, hasambalö mubunu.” Sindruhunia, daʼö lala niʼogunaʼö Yehu ba wangohori niha samosumange Baʼali.
20 Imane nasa Yehu, ”Ombakhaʼö* gangowuloa si tohude nifalua khö Mbaʼali.” Ba lafalua daʼö.
21 Me no ifaʼoheʼö goroisania Yehu ba ndraono Gizaraʼeli, tohare zamosumange Baʼali maʼafefu. Samösa lö si toröi furi. Möi ira bakha ba nahia wamosumange Baʼali,+ afönu nahia daʼö irugi mbalö faföfö.
22 Imane Yehu khö zamaigi-maigi naha wangiröʼö nukha, ”Beʼe baero nukha niʼogunaʼö ndra samosumange Baʼali andrö maʼafefu.” Ifalua niwaʼö khönia andrö.
23 Aefa daʼö, möi Yehu hegöi Yonadabi+ ono Rekhabi ba nahia wamosumange Baʼali. Imane Yehu ba niha samosumange Baʼali, ”Mihaogö mifaigi hadia lö hadöi samosumange Yehowa ba daʼa, enaʼö ha samosumange Baʼali manö fefu.”
24 Ibörögö labeʼe zumange nitaba ba sumange nitunu. Hizaʼi, no ifataro baero 80 nono buania Yehu ba imane khöra, ”Na moloi samösa niha nibeʼegu ba dangami, yaʼami zi mate fangalinia.”*
25 Me no awai labeʼe zumange nitunu, imane Yehu khö ndra sanaro* hegöi khö ngoni-ngoni razo, ”Miʼae bakha, mibunu ira! Böi so zoloi.”+ Labunu fefu zamosumange Baʼali faoma föda ba lafazaumba ira baero. Möi ira irugi ba nahia niʼamoniʼö si so tanö bakha* ba nahia wamosumange Baʼali.
26 Ba laʼohe baero fefu gehomo niʼamoniʼö*+ si so ba nahia wamosumange Baʼali, ba latunu daʼö.+
27 Ladudugö gehomo niʼamoniʼö*+ khö Mbaʼali hegöi nahia wamosumange Baʼali,+ ba labaliʼö daʼö nahia ba waniboʼö si taʼunö irugi iadaʼa.
28 Daʼö nifalua Yehu ba wangohori niha samosumange Baʼali ba Gizaraʼeli.
29 Hizaʼi, lö iböhöli Yehu ba wamalua horö nifalua ndraono Gizaraʼeli me no ifaelungu ira Yerobeamo ono Nebati. Lö idudugö nadu ono zawi anaʼa si so ba Mbetieli hegöi si so ba Dano.+
30 Imane Yehowa khö Yehu, ”Sökhi gamuatau, ba no öfalua zatulö fönagu. No öfalua hadia zomasido ufalua menaʼö ba nösi nomo Gahabi.+ Börö daʼö, mamatörö ngaʼötöu ba dadaoma waʼarazo Gizaraʼeli irugi öfa ngaʼötö.”+
31 Hizaʼi, tenga soroi ba dödö Yehu woloʼö Oroisa Yehowa, Lowalangi ndraono Gizaraʼeli.+ Lö iröi wamalua horö nifalua ndraono Gizaraʼeli me no ifaelungu ira Yerobeamo.+
32 Me luo daʼö, itehegö Yehowa na larabu mbanua ndraono Gizaraʼeli ero sambu-sambua.* Lö iböhöli Hazaeli ba wanuwö banua ndraono Gizaraʼeli maʼafefu,+
33 iʼotarai ba gatumbukha Nungo Nidanö Yoridano, yaʼia daʼö fefu mbanua Gileadi niʼiagö niha Gado, Rubeno ba Manase,+ tefarahu ba daʼö Naroeri sahatö ba Ndraso Garono irugi ba mbanua Gileadi hegöi Bazana.+
34 Fefu waö-waö tanö böʼö sanandrösa khö Yehu, tefarahu ba daʼö nifaluania awö zi no ikhamö, no tesura daʼö ba mbuku razo-razo ndraono Gizaraʼeli.
35 Ba gafuriata, mate Yehu* ba lakoʼo ia ba Zamaria. Aefa daʼö, ononia Yoahasi+ zi tobali razo fangalinia.
36 Mamatörö Yehu tobali razo ndraono Gizaraʼeli ba Zamaria 28 fakhe waʼara.
Nisura ba gahe zura
^ Mazui ”sambua lö saekhu ba danö”.
^ Te nahia wamesu biri-biri na laguti mbu.
^ Yaʼia daʼö Ratu Izebela, ina Razo Yoramo.
^ Sin.: ”ifahowuʼö”.
^ Mazui ”hewisa me lö faʼawö ndraʼo ba niha si fahindri khö Yehowa”.
^ Sin.: ”Amoniʼö”.
^ Mazui ”nosomi zi tobali fangali nosonia”.
^ Sin.: ”khö zi fagohi”.
^ Sin.: ”irugi ba mbanua sebua”, te tomosa si no mufoʼöli.
^ Faigi Geluaha Ngawua Wehede.
^ Faigi Geluaha Ngawua Wehede.
^ Mazui ”itugu iʼide-ideʼö mbanua ndraono Gizaraʼeli Yehowa”.
^ Sin.: ”lafadölö Yehu ba ngai ndra tuania”.
