Dua Razo 11:1-21
11 Ba me iʼila Atalia+ ina Gahaseya wa no mate nononia,+ ibunu fefu ngaʼötö razo.+
2 Ba maoso Yoseba ono Razo Yoramo ono alawe, talifusö Gahaseya, ibiniʼö wangai Yehoasi+ ono Gahaseya moroi ba ngaʼötö razo sedöna mubunu. Iʼohe ba mbateʼe tanö bakha awö zondrorogö yaʼia. Aʼozu labiniʼö ia moroi khö Gatalia irege lö labunu ia.
3 Lö tebulö fao khönia Yehoasi ba no önö fakhe labiniʼö ia ba nomo Yehowa, sagötö mamatörö Gatalia ba soi daʼö.
4 Me no fitu fakhe, ifatenge niha Yehoyada ba wogaoni ira kumandru zi daotu, yaʼira andrö sondröniaʼö saradadu sozago razo* hegöi sozago gödo razo.*+ Lafakaoniʼö ira enaʼö laʼondrasi Yehoyada ba nomo Yehowa. Fawuʼu li* khöra Yehoyada ba fahölu ira ba nomo Yehowa, aefa daʼö iʼombakhaʼö khöra nono razo.+
5 Ifaretakö ira, ”Daʼa zi lö tola löʼö mifalua: Mifohalöwö zi sambua niʼotölu moroi ba gotaluami ba luo Sabato ba enaʼö lahaogö wozago gödo razo,+
6 mifataro göi zi sambua niʼotölu ba wozago Bawa Göli Wondrasi, ba si sambua niʼotölu tö ba mbawa göli tanö furi ndra sozago gödo razo. Mifalali-lali ami ba wozago gödo razo.
7 Si dombua ngawawa si lö mohalöwö ba luo Sabato, moguna lahaogö wozago omo Yehowa enaʼö telumöʼö Razo.
8 Miʼiagö ba zinga Razo, mifasui ia ba migogohe wangönami ero samösa. Mibunu gofu haniha zanöndragö yaʼia ba wolawa yaʼami. Böi mifabali khö Razo gofu hezo möi ia.”*
9 Lafalua daʼö ira kumandru zi daotu+ simane si no iwaʼö Ere Yehoyada. Laʼohe zaradadura zamösana, he sohalöwö hegöi si lö mohalöwö ba luo Sabato ba wamalukhaisi Ere Yehoyada.+
10 Aefa daʼö, ibeʼe Yehoyada khö ndra kumandru zi daotu andrö doho hegöi baluse sowulo-wulo niʼokhögö Razo Dawido si so ba nomo Yehowa.
11 Laʼiagö nahara zamösana ira sozago gödo razo,+ he ba gambölö hegöi ba gabera nomo, sahatö ba naha wanunu sumange+ hegöi ba nomo andrö yaʼia daʼö ba zi fasui Razo, ba oi so wangöna ba dangara zamösana.
12 Ba iʼohe baero nono razo andrö+ Yehoyada ba ibeʼe dakula ba högö hegöi Famaduhuʼö,*+ ba labaliʼö ia razo. Labayoini ia ba labörögö wamözi tawo-tawo lamane, ”Yaʼanau nosou Razo!”+
13 Me irongo Atalia li niha si fagohi-gohi, iʼanemaiʼö iʼondrasi niha sato si so ba nomo Yehowa.+
14 Iʼila wa no mozizio Razo ba ngai gehomo simane si toʼölö nifalua razo tanö böʼö.+ Fao göi ndra sondröniaʼö hegöi samoli torofe+ khö Razo, ba fefu nono mbanua ba soi daʼö omuso dödöra ba lafoli dorofe. Me iʼila daʼö Atalia, isika nukhania ba muʼao ia, ”Si manga mböli! Si manga mböli!”
15 Hizaʼi, ibeʼe fareta Ere Yehoyada khö ndra kumandru zi daotu+ nifataro ba wondröniaʼö ira saradadu, ”Miʼohe baero ndra alawe daʼö moroi ba gotalua niha si no tefaʼoli, ba gofu haniha zoloʼö yaʼia hasambalö mubunu faoma föda!” No irai iwaʼö ere andrö, ”Böi mibunu ia ba nomo Yehowa.”
16 Laraʼu ia, ba lafatörö ia ba lala sasese itörö kudo si so ba gödo razo,+ ba daʼö labunu ia.
17 Aefa daʼö, ifazökhi mbuʼusa li Yehoyada ba gotalua Yehowa faoma Razo hegöi ono mbanua+ wa lö tebulö tobali ira ono mbanua Yehowa. Ifazökhi göi mbuʼusa li ba gotalua Razo awö nono mbanua.+
18 Lö ara, möi fefu nono mbanua ba soi daʼö ba nahia wamosumange Baʼali+ ba ladudugö naha wanunu sumange awö nadu si so ba daʼö.+ Labunu Matana föna naha wanunu sumange, yaʼia andrö ere khö Mbaʼali.+
Ifataro göi ndra sondröniaʼö Ere Yehoyada ba nomo Yehowa.+
19 Aefa daʼö, iʼohe ndra kumandru zi daotu,+ ira sondröniaʼö saradadu sozago razo,* sozago gödo razo+ hegöi ono mbanua maʼafefu enaʼö fao ira khö Razo moroi ba nomo Yehowa. Möi ira ba gödo razo latörö mbawa göli ndra sozago gödo razo, ba modadao Razo ba dadaomania.+
20 Ba oi somuso tödö niha ba soi daʼö ba lö ametaʼuö saʼae börö me no mubunu Gatalia faoma föda ba gödo razo.
21 Fitu fakhe ndröfi Yehoasi+ me tobali ia razo.+
Nisura ba gahe zura
^ Sin.: ”niha Garia”.
^ Sin.: ”si fagohi”.
^ Mazui ”Mangosara”.
^ Sin.: ”na möi ia baero ba na möi ia bakha”.
^ Te gölu-gölu zura Goroisa Lowalangi.
^ Sin.: ”niha Garia”.
