Dua Razo 12:1-21
12 Me no fitu fakhe mamatörö Yehu,+ mufataro Yehoasi+ tobali razo ba 40 fakhe mamatörö ia ba Yeruzalema. Töi ninania yaʼia daʼö Sibia moroi ba Mbere-seba.+
2 Lö iböhöli wamalua satulö Yehoasi föna Yehowa sagötö ibeʼe khönia wanuturu lala Ere Yehoyada.
3 Hizaʼi, lö ihori naha wamosumange*+ ba lö tebulö möi niha ba daʼö ba wanunu sumange irege numalö miyawa zimbo.
4 Imane Yehoasi khö ndra ere, ”Mihalö fefu gefe si no mubeʼe ba nomo Yehowa si tobali sumange niʼamoniʼö,+ yaʼia daʼö pajak si no lahonogöi ero samösa,+ kefe moroi ba niha si no fawuʼu li, ba kefe niʼohe ba nomo Yehowa si no aoha gölö fameʼe.+
5 Latema daʼö ira ere ba niha sameʼe tolo-tolo khöra* ba laʼogunaʼö gefe daʼö ba wangaʼazökhi si no tekiko* ba nomo andrö.”+
6 Hizaʼi, me no irugi 23 fakhe wamatörö Razo Yehoasi, lö manö nasa nihaogö ndra ere ngawalö zi no tekiko ba nomo andrö.+
7 Börö daʼö, ifatenge niha Razo Yehoasi ba wogaoni Ere Yehoyada+ hegöi ere tanö böʼö imane, ”Hana wa lö mifazökhi zi no tekiko ba nomo andrö? Böi mitema gefe ba niha sameʼe tolo-tolo baero na miʼogunaʼö daʼö ba wangaʼazökhi si no tekiko ba nomo andrö.”+
8 Fao dödö ndra ere ba lö saʼae latema gefe moroi ba nono mbanua, ba lö laʼonorogö tödö ba wangaʼazökhi omo daʼö.
9 Aefa daʼö, ihalö naha wameʼe tolo-tolo Ere Yehoyada+ ba itölaʼö lagö-lagönia, ibeʼe ba zinga naha wanunu sumange si so tanö ba gambölö niha na möi ira ba nomo Yehowa. Ira ere nifataro ba wozago bawandruhö, yaʼira zameʼe bakha ba daʼö fefu gefe niʼohe ba nomo Yehowa.+
10 Ero afönu naha dolo-tolo andrö, möi sekretaris Razo hegöi ere sebua, laʼowuloi* ba laʼerai gefe niʼohe ba nomo Yehowa.+
11 Na no aefa laʼerai, labeʼe gefe daʼö khö ndra sondröniaʼö halöwö ba nomo Yehowa. Laʼogunaʼö gefe daʼö ba wameʼe gazi tuka geu hegöi tuka sohalöwö ba nomo Yehowa,+
12 simanö göi zanoto kara hegöi tuka zanaba kara. Baero daʼö, laʼöli geu awö gara si no latataba ba wangaʼazökhi si no tekiko ba nomo Yehowa. Laʼogunaʼö göi gefe daʼö ba wamuʼa fefu soguna tanö böʼö sagötö wamazökhi omo andrö.
13 Hizaʼi, lö laʼogunaʼö gefe niʼohe ba nomo Yehowa ba wamazökhi karawa moroi ba wirö, famunu galitö, mako, torofe+ mazui gama-gama tanö böʼö moroi ba ganaʼa mazui firö ba nomo Yehowa.+
14 Ha khö ndra sondröniaʼö labeʼe gefe daʼö, ba laʼogunaʼö ia ba wangaʼazökhi omo Yehowa.
15 Aefa daʼö, ira sondröniaʼö zameʼe khö ndra sohalöwö. Gofu hadia nifalua ndra sondröniaʼö lö lazofu-zofu börö me no lafaduhusi tödö ira.+
16 Hizaʼi, lö laʼohe ba nomo Yehowa gefe sumange fameta zala+ hegöi kefe sumange fameta horö. Tana khö ndra ere daʼö.+
17 Me luo daʼö, tohare Hazaeli+ razo Siria ba wanuwö banua Gata+ ba irabu mbanua andrö. Aefa daʼö, ihalö gangetula ba wanuwö Yeruzalema.+
18 Ihalö fefu zumange niʼamoniʼö Yehoasi razo Yehuda si no laʼamoniʼö ira tuania, razo-razo Yehuda, yaʼia daʼö Yozafati, Yoramo hegöi Ahaseya. Ihalö göi zumange si no iʼamoniʼö awö ganaʼa maʼafefu si so ba nahia wangiröʼö harato ba nomo Yehowa hegöi ba gödo razo. Ifaʼoheʼö daʼö fefu khö Hazaeli razo Siria,+ irege lö aʼozu lasuwö Yeruzalema.
19 Fefu waö-waö tanö böʼö sanandrösa khö Yehoasi awö nifaluania, no tesura daʼö ba mbuku razo-razo niha Yehuda.
20 Hizaʼi, mamagölö ndra enoni Yehoasi ba wolawa yaʼia+ ba labunu ia ba nomo si so ba Hili-Hili,*+ ba naere-naere saekhu ba Zila.
21 Ira enoninia sotöi Yozakhari ono Zimeata, ba Yosabada ono Zomeri zamunu yaʼia.+ Lakoʼo ia ba lewatö ndra tuania ba Mbanua Dawido, ba ononia Amasia zi tobali razo fangalinia.+
Nisura ba gahe zura
^ Sin.: ”nahia sagalawa”.
^ Mazui ”si faʼila khöra”.
^ Mazui ”si no agasila”.
^ Mazui ”labeʼe ba mbola-bola”. Sin.: ”laböbö”.
^ Mazui ”ba Mbeti-milo”.
