Dua Razo 13:1-25
13 Me no 23 fakhe mamatörö Yehoasi+ ono Gahaseya+ razo Yehuda, mufataro Yoahasi ono Yehu+ tobali razo ndraono Gizaraʼeli ba Zamaria, ba 17 fakhe mamatörö ia.
2 Lö aetu ifalua zi lö sökhi föna Yehowa, ba lö iböhöli wamalua horö nifalua ndraono Gizaraʼeli me no ifaelungu ira Yerobeamo ono Nebati.+ Lö labato wamalua daʼö.
3 Mofönu sibai Yehowa+ ba ndraono Gizaraʼeli,+ irege lö aetu itouʼö ira ba danga Hazaeli+ razo Siria hegöi ba danga Mbeni-hada+ ono Hazaeli.
4 Ba gafuriata, iʼandrö Yoahasi waʼahakhö dödö Yehowa. Börö me iʼila wa tefakao sibai ndraono Gizaraʼeli ba danga razo Siria, andrö wa ifondrondrongo wangandrönia Yehowa.+
5 Ba iʼasogö zangorifi+ iraono Gizaraʼeli Yehowa enaʼö teʼefaʼö ira ba danga Ziria irege lasöndra waʼahono dödö simane nirasoira ba wamobörö.
6 Hizaʼi, lö laböhöli wamalua horö nifalua nösi nomo Yerobeamo si no mamaelungu iraono Gizaraʼeli ba wamalua horö.+ Lö labato wamalua daʼö ba so manö döla-döla niʼamoniʼö*+ ba Zamaria.
7 Ato sibai zaradadu Yoahasi si no ihori razo Siria,+ si no ihundra-hundra simane gawu-gawu ba naha wamöbörö gandru.+ Ha daʼö zi toröi 50 zaradadu si fakudo, 10 rozi gureta wasuwöta ba 10.000 zaradadu sanörö tanö.
8 Fefu waö-waö tanö böʼö sanandrösa khö Yoahasi, tefarahu ba daʼö nifaluania awö zi no ikhamö, no tesura daʼö ba mbuku razo-razo ndraono Gizaraʼeli.
9 Ba gafuriata, mate Yoahasi* ba lakoʼo ia ba mbanua Zamaria.+ Aefa daʼö, ononia Yehoasi zi tobali razo fangalinia.
10 Me no 37 fakhe mamatörö Yehoasi razo Yehuda, mufataro Yehoasi+ ono Yoahasi tobali razo ndraono Gizaraʼeli ba Zamaria, ba 16 fakhe mamatörö ia.
11 Lö aetu ifalua zi lö sökhi föna Yehowa, ba lö iböhöli wamalua horö nifalua ndraono Gizaraʼeli me no ifaelungu ira Yerobeamo ono Nebati.+ Lö ibato wamalua daʼö.
12 Fefu waö-waö tanö böʼö sanandrösa khö Yehoasi, tefarahu ba daʼö nifaluania awö zi no ikhamö hegöi me fasuwö ia khö Gamasia razo Yehuda,+ no tesura daʼö ba mbuku razo-razo ndraono Gizaraʼeli.
13 Ba gafuriata, mate Yehoasi* ba lakoʼo ia ba Zamaria ba lewatö razo ndraono Gizaraʼeli.+ Aefa daʼö, Yerobeamo*+ zi tobali razo fangalinia.
14 Samuza maʼökhö, mofökhö Gelisa+ irege daʼö zi möi börö waʼamatenia ba gafuriata. Möi Yehoasi razo ndraono Gizaraʼeli ba mege-ege ia imane, ”He Pa, he Pa! Hiza gureta wasuwöta awö zaradadu ndraono Gizaraʼeli si fakudo!”*+
15 Imane khönia Elisa, ”Ae halö wana sinali hegöi ono wanania.” Ba möi ia ihalö.
16 Imane Elisa khö razo ndraono Gizaraʼeli, ”Gogohe wana sinali andrö.” Igogohe wana daʼö ba ifalaete dangania Elisa ba danga Razo.
17 Imane, ”Bokai zandrela tanö ba gatumbukha.” Ifalua daʼö Razo ba imane Elisa, ”Efasi nono wana andrö!” Ba iʼefasi. Itohugö wangumaʼö Elisa, ”Ono wana waʼamöna* moroi khö Yehowa, ono wana waʼamöna* ba Ziria! Ökalaisi dania Ziria ba Gafeka+ irege tehori ira.”
18 Imane nasa Elisa, ”Ae halö nono wana andrö.” Ba möi ia ihalö. Aefa daʼö imane khönia Elisa, ”Bözi danö faoma ono wana andrö.” Ha medölu kali ifalua daʼö ba ibato.
19 Ba mofönu genoni Lowalangi sindruhu andrö ba imane, ”Sindruhunia, lima mazui önö kali menaʼö öbözi danö! Na öfalua daʼö tola öhori niha Ziria. Hizaʼi, iadaʼa ha medölu kali ökalaisi niha Ziria.”+
20 Aefa daʼö, mate Gelisa ba lakoʼo ia. Ero böröta ndröfi, tohare zorabu+ moroi ba Moabi möi ira ba soi daʼö. Alua daʼö me no mate Gelisa.
21 Samuza maʼökhö, so ösa niha si möi mogoʼo si mate ba laʼila zorabu andrö. Laʼanemaiʼö latiboʼö ba lewatö Gelisa mboto ndra matua si no mate andrö ba lalau moloi. Ifuli auri niha si no mate andrö+ ba ilau mosindro me göna mbotonia ba döla Gelisa.
22 Sagötö famatörö Yoahasi, lö iböhöli Hazaeli+ razo Siria ba wamakao iraono Gizaraʼeli.+
23 Hizaʼi, iforomaʼö Yehowa waʼasökhi dödö hegöi faʼahakhö dödö+ ba iʼameʼegö tödö ira börö mbuʼusa linia khö Gaberahamo,+ Izaʼaki+ hegöi Yakobo.+ Lö itehegö tehori ira ba lö itiboʼö ira fönania irugi iadaʼa.
24 Me mate Hazaeli razo Siria, ononia Beni-hada zi tobali razo fangalinia.
25 Ba maoso Yehoasi ono Yoahasi, irabu mangawuli mbanua ndraono Gizaraʼeli moroi khö Mbeni-hada ono Hazaeli, banua si no irabu Hazaeli me fasuwö ira Yoahasi ba zilalö. Tölu kali kala Mbeni-hada ibeʼe Yehoasi+ ba ifuli ihalö mbanua andrö.
Nisura ba gahe zura
^ Faigi Geluaha Ngawua Wehede.
^ Sin.: ”lafadölö Yoahasi ba ngai ndra tuania”.
^ Sin.: ”lafadölö Yehoasi ba ngai ndra tuania”.
^ Eluahania Yerobeamo II.
^ Te daʼö geluahania ba wangandrö tolo khö Lowalangi mazui khö zalahinia.
^ Mazui ”wangorifi”.
^ Mazui ”wangorifi”.
