Dua Razo 15:1-38
15 Me no 27 fakhe mamatörö Yerobeamo* razo ndraono Gizaraʼeli, mufataro Gasaria*+ tobali razo. Yaʼia andrö ono Gamasia+ razo Yehuda.+
2 Faʼalawa ndröfinia me tobali ia razo yaʼia daʼö 16 fakhe, ba 52 fakhe mamatörö ia ba Yeruzalema. Töi ninania yaʼia daʼö Yekholia moroi ba Yeruzalema.
3 Lö iböhöli wamalua satulö föna Yehowa simane nifalua namania Amasia.+
4 Hizaʼi, lö ihori naha wamosumange*+ ba lö tebulö möi niha ba daʼö ba wanunu sumange irege numalö miyawa zimbo.+
5 Ba ifatörö wamakao khö Razo andrö Yehowa ibeʼe mbou auri+ ba lö aheta khönia daʼö irugi waʼamatenia. Toröi ia ba nomo si no mufasafi+ ba ononia Yotamo+ zondrorogö gödo razo ba yaʼia zanguhuku ba soi daʼö.+
6 Fefu waö-waö tanö böʼö sanandrösa khö Gasaria+ awö nifaluania, no tesura daʼö ba mbuku razo-razo niha Yehuda.
7 Ba gafuriata, mate Gasaria* ba lakoʼo ia ba zinga ndra tuania+ ba Mbanua Dawido. Aefa daʼö, ononia Yotamo zi tobali razo fangalinia.
8 Me no 38 fakhe mamatörö Gasaria+ razo Yehuda, mufataro Zakharia+ ono Yerobeamo tobali razo ndraono Gizaraʼeli ba Zamaria, ba mamatörö ia önö waŵa.
9 Ifalua zi lö sökhi föna Yehowa simane nifalua ndra tuania. Lö iböhöli wamalua horö nifalua ndraono Gizaraʼeli me no ifaelungu ira Yerobeamo ono Nebati.+
10 Ba mamagölö Zalumi ono Yabesi ba wolawa Zakharia irege ibunu+ ba Yibelea.+ Aefa daʼö, yaʼia zi tobali razo fangali Zakharia.
11 Fefu waö-waö tanö böʼö sanandrösa khö Zakharia, no tesura daʼö ba mbuku razo-razo ndraono Gizaraʼeli.
12 Itörö niwaʼö Yehowa khö Yehu yaʼia daʼö, ”Mamatörö ngaʼötöu+ ba dadaoma waʼarazo Gizaraʼeli irugi öfa ngaʼötö.”+
13 Me no 39 fakhe mamatörö Usia+ razo Yehuda, mufataro Zalumi ono Yabesi tobali razo, ba mamatörö ia sara waŵa ba Zamaria.
14 Tohare Menahe ono Gadi moroi ba Dirisa+ numalö ba Zamaria ba wamunu Salumi+ ono Yabesi. Aefa daʼö, Menahe zi tobali razo fangalinia.
15 Fefu waö-waö tanö böʼö sanandrösa khö Zalumi awö wamadaö si no ifalua, no tesura daʼö ba mbuku razo-razo ndraono Gizaraʼeli.
16 Me luo daʼö, tohare Menahe moroi ba Dirisa ba ibunu fefu nono mbanua Difisa hegöi si so ba zi fasuinia, börö me lö labokai mbawa göli mbanua. Isila dalu ndra alawe sanabina maʼafefu.
17 Me no 39 fakhe mamatörö Gasaria razo Yehuda, mufataro Menahe ono Gadi tobali razo ndraono Gizaraʼeli, ba mamatörö ia fulu fakhe ba Zamaria.
18 Lö iböhöli wamalua si lö sökhi föna Yehowa. Sagötö faʼaurinia, lö iböhöli wamalua horö nifalua ndraono Gizaraʼeli me no ifaelungu ira Yerobeamo ono Nebati.+
19 Me möi Wulo+ razo Asiria ba wanuwö soi daʼö, mamuala khönia Menahe 34.200 kilogram* wirö enaʼö itolo ia Fulo ba wangaʼaroʼö famatörönia.+
20 Iʼozaragö wirö Menahe ba niha si kayo si so ba Gizaraʼeli,+ iʼandrö khöra 570 gram* ero samösa, aefa daʼö ibeʼe khö razo Asiria. Mangawuli razo Asiria ba iröi danö Gizaraʼeli.
21 Fefu waö-waö tanö böʼö sanandrösa khö Menahe+ awö zi no ifalua, no tesura daʼö ba mbuku razo-razo ndraono Gizaraʼeli.
22 Ba gafuriata, mate Menahe* ba ononia Fekaya zi tobali razo fangalinia.
23 Me no 50 fakhe mamatörö Gasaria razo Yehuda, mufataro Wekaya ono Menahe tobali razo ndraono Gizaraʼeli ba Zamaria, ba mamatörö ia dua fakhe waʼara.
24 Lö iböhöli wamalua si lö sökhi föna Yehowa awö horö nifalua ndraono Gizaraʼeli me no ifaelungu ira Yerobeamo ono Nebati.+
25 So samösa ngoni-ngoni Razo Wekaya, töinia Feka+ ono Remalia. Mamagölö ia ba wamunu Razo, Arigobi hegöi Arie* ba Zamaria. Ibunu ira ba domosa si no mufasui öli si so ba gödo razo. So 50 niha Gileadi si fao khönia. Aefa daʼö tobali ia razo fangali Wekaya.
26 Fefu waö-waö tanö böʼö sanandrösa khö Wekaya awö nifaluania, no tesura daʼö ba mbuku razo-razo ndraono Gizaraʼeli.
27 Me no 52 fakhe mamatörö Gasaria razo Yehuda, mufataro Weka+ ono Remalia tobali razo ndraono Gizaraʼeli ba Zamaria, ba mamatörö ia 20 fakhe waʼara.
28 Lö iböhöli wamalua si lö sökhi föna Yehowa awö horö nifalua ndraono Gizaraʼeli me no ifaelungu ira Yerobeamo ono Nebati.+
29 Me mamatörö Weka razo ndraono Gizaraʼeli, möi Digelata-filezeri+ razo Asiria ba wanuwö hegöi ba worabu Iyono, Habeli-mbeti-maʼakha,+ Yanoha, Kadesi,+ Hasora, Gileadi+ hegöi Galilaia, yaʼia daʼö tanö Nafetali+ maʼasagörö ba iʼoloiʼö fefu zi toröi ba daʼö, iʼohe ba danö Asiria.+
30 Aefa daʼö, mamagölö Hosia+ ono Ela ba wolawa Feka ono Remalia irege ibunu. Tobali ia razo fangali Weka me no 20 fakhe mamatörö Yotamo+ ono Usia.
31 Fefu waö-waö tanö böʼö sanandrösa khö Weka awö nifaluania, no tesura daʼö ba mbuku razo-razo ndraono Gizaraʼeli.
32 Me no dua fakhe mamatörö Weka ono Remalia razo ndraono Gizaraʼeli, mufataro Yotamo+ tobali razo. Yaʼia andrö ono Usia+ razo Yehuda.
33 Faʼalawa ndröfinia me tobali ia razo yaʼia daʼö 25 fakhe, ba 16 fakhe mamatörö ia ba Yeruzalema. Töi ninania yaʼia daʼö Yerusa ono Zadoki.+
34 Lö iböhöli wamalua satulö föna Yehowa simane amania Usia.+
35 Hizaʼi, lö ihori naha wamosumange* ba lö tebulö möi niha ba daʼö ba wanunu sumange irege numalö miyawa zimbo.+ Yaʼia zamazökhi bawa göli tanö yawa ba nomo Yehowa.+
36 Fefu waö-waö tanö böʼö sanandrösa khö Yotamo awö nifaluania, no tesura daʼö ba mbuku razo-razo niha Yehuda.
37 Me luo daʼö, ibörötaigö Yehowa wamarou Resino razo Siria hegöi Feka+ ono Remalia ba wanuwö Yehuda.+
38 Ba gafuriata, mate Yotamo* ba lakoʼo ia ba lewatö ndra tuania ba Mbanua Dawido, ba ononia Ahasi zi tobali razo fangalinia.
Nisura ba gahe zura
^ Eluahania ”Yehowa Zanolo”. Lafotöi ia Usia ba 2Ra 15:13; 2Ng 26:1-23; Yes 6:1; ba Zak 14:5.
^ Eluahania Yerobeamo II.
^ Sin.: ”nahia sagalawa”.
^ Sin.: ”lafadölö Gasaria ba ngai ndra tuania”.
^ Sin.: ”lafadölö Menahe ba ngai ndra tuania”.
^ Mazui te, ”Mamagölö ia ba wamunu Razo, ba fao khönia Garigobi hegöi Arie”.
^ Sin.: ”nahia sagalawa”.
^ Sin.: ”lafadölö Yotamo ba ngai ndra tuania”.
