Dua Razo 16:1-20
16 Me no 17 fakhe mamatörö Weka ono Remalia, mufataro Gahasi+ tobali razo ba Yehuda, ono Yotamo razo Yehuda.
2 Faʼalawa ndröfi Gahasi me tobali ia razo yaʼia daʼö 20 fakhe, ba 16 fakhe mamatörö ia ba Yeruzalema. Tenga simane tuania Dawido ia, börö me lö ifalua zatulö föna Lowalanginia Yehowa.+
3 Iʼoʼö lala razo ndraono Gizaraʼeli,+ ba itunu ndraononia tobali sumange+ simane si raʼiö si toʼölö lafalua soi böʼö+ nitimba Yehowa föna ndraono Gizaraʼeli.
4 Lö iböhöli wanunu sumange ba nahia sagalawa,+ ba hili-hili hegöi ba narö lumö geu sebua hogu+ irege numalö miyawa zimbo.
5 Me luo daʼö, möi Resino razo Siria hegöi Feka ono Remalia ba wanuwö Yeruzalema.+ Lafaʼuʼu Gahasi, hizaʼi lö aʼozu lahalö mbanua andrö.
6 Me luo daʼö, Resino razo Siria ifangawuli Gelata+ khö Gedomo ba ifofanö niha Yahudi* moroi ba Gelata. Aefa daʼö, möi niha Gedomo ba mbanua Gelata ba toröi ira ba daʼö irugi maʼökhö.
7 Ifatenge niha Ahasi ba wamaʼema oroisania khö Digelata-filezeri+ razo Asiria: ”Sawuyumö ndraʼo Pa ba onou göi. Aine, efaʼö ndraʼo moroi ba danga razo Siria hegöi ba danga razo ndraono Gizaraʼeli sanuwö yaʼo.”
8 Möi Gahasi ba wangai firö hegöi anaʼa si so ba nomo Yehowa hegöi ba nahia wangiröʼö harato ba gödo razo. Ifaʼoheʼö daʼö khö razo Asiria si tobali sölö-sölö.+
9 Ifondrondrongo niʼandrönia razo Asiria. Möi ia ba Ndramaseko, irabu ba iʼoloiʼö nono mbanua si so ba daʼö, iʼohe ba Giri+ ba ibunu Resino.+
10 Aefa daʼö, möi Razo Gahasi ba wamalukhaisi Digelata-filezeri razo Asiria ba Ndramaseko. Me iʼila naha wanunu sumange ba Ndramaseko, ifaʼoheʼö gambara naha wanunu sumange andrö khö Gere Uria, yaʼia daʼö duma-duma hegöi lala wamazökhi yaʼia.+
11 Ifazökhi naha wanunu sumange+ andrö Ere Guria+ moloʼö fanuturu lala nifaʼoheʼö Razo Gahasi moroi ba Ndramaseko. Awai wamazökhi naha wanunu sumange daʼö fatua lö sangawuli Razo Gahasi moroi ba Ndramaseko.
12 Me mangawuli Razo moroi ba Ndramaseko, iʼila naha wanunu sumange andrö. Ifahatö ia ba wameʼe sumange ba daʼö.+
13 Lö iböhöli wanunu sumange nitunu awö zumange niʼa* ba daʼö. Ifaduwa göi zumange nibadu ba itefe do zumange fangatulö ba detenia.
14 Aefa daʼö, ifindrakö naha wanunu sumange nifazökhi moroi ba tembaga+ si so tanö föna Yehowa, ba ibeʼe ba gamaudu tanö yöu naha wanunu sumange khönia. Ba zilalö, naha wanunu sumange andrö so ba gotalua naha wanunu sumange khönia hegöi omo Yehowa.
15 Ibeʼe goroisa Razo Ahasi khö Gere Uria,+ ”Ba naha wanunu sumange sebua andrö,+ beʼe zumange nitunu ba zihulö wongi ba sumange niʼa ba zi bongi,+ sumange nitunu ba sumange niʼa moroi khö razo, simanö göi zumange nitunu, sumange niʼa ba sumange nibadu moroi ba nono mbanua. Ba tefe detenia do zumange nitunu hegöi sumange tanö böʼö. Akha yaʼo dania zoʼangeragö naha wanunu sumange nifazökhi moroi ba tembaga andrö.”
16 Ifalua fefu niwaʼö Razo Gahasi andrö Ere Uria.+
17 Baero daʼö, itaba ngaʼörö-ngaʼörö tembaga andrö Razo Ahasi si so ba zinga gureta wasuwöta faoma fatambai+ ba iheta naha nidanö si so ba detenia.+ Ibeʼe tou Nasi Tembaga moroi ba hulu wamaedo zawi si matua nifazökhi moroi ba tembaga,+ aefa daʼö ibeʼe tou ba zalo kara.+
18 Ifindrakö göi lala si no mufosagö si toʼölö muʼogunaʼö ba luo Sabato nifazökhi ba nomo andrö, ba iduhö lala sasese itörö razo ba weʼamöi ba nomo Yehowa. Ifalua fefu daʼö börö waʼataʼunia khö razo Asiria.
19 Fefu waö-waö tanö böʼö sanandrösa khö Gahasi awö nifaluania, no tesura daʼö ba mbuku razo-razo niha Yehuda.+
20 Ba gafuriata, mate Gahasi* ba lakoʼo ia ba lewatö ndra tuania ba Mbanua Dawido. Aefa daʼö, ononia Hizikia*+ zi tobali razo fangalinia.
Nisura ba gahe zura
^ Mazui ”niha Yehuda”.
^ Mazui ”sumange bua nowi”.
^ Sin.: ”lafadölö Gahasi ba ngai ndra tuania”.
^ Eluahania ”Yehowa Zangabölöʼö”.
