Dua Razo 2:1-25
2 Me lö ara tö ifazawa Gelia+ andrö Yehowa si fao angi sabölö-bölö,+ mofanö Gelia hegöi Elisa+ moroi ba Giligala.+
2 Imane Elia khö Gelisa, ”Ba daʼa manö agö, börö me no ifatenge ndraʼo Yehowa weʼamöi ba Mbetieli.” Hizaʼi imane Elisa, ”Faya wa no sauri Yehowa ba faya wa no sauri ndraʼugö na fabalido khöu.” Mofanö ira numalö ba Mbetieli.+
3 Möi ngaʼötö ndra samaʼeleʼö* si so ba Mbetieli khö Gelisa ba lamane khönia, ”Hadia lö aboto ba dödöu wa maʼökhö andre ihalö zokhö yaʼugö andrö Yehowa ba lö saʼae tobali ia sondröniaʼö yaʼugö?”+ Imane Elisa, ”Aboto ba dödögu daʼö. Mihonogö manö ami.”
4 Aefa daʼö imane khönia Elia, ”Ba daʼa manö agö, börö me no ifatenge ndraʼo Yehowa weʼamöi ba Yerikho.”+ Hizaʼi imane Elisa, ”Faya wa no sauri Yehowa ba faya wa no sauri ndraʼugö na fabalido khöu.” Mofanö ira numalö ba Yerikho.
5 Möi ngaʼötö ndra samaʼeleʼö si so ba Yerikho ba wamalukhaisi Elisa ba lamane khönia, ”Hadia lö aboto ba dödöu wa maʼökhö andre ihalö zokhö yaʼugö andrö Yehowa ba lö saʼae tobali ia sondröniaʼö yaʼugö?” Imane Elisa, ”Aboto ba dödögu daʼö. Mihonogö manö ami.”
6 Aefa daʼö imane khönia Elia, ”Ba daʼa manö agö, börö me no ifatenge ndraʼo Yehowa weʼamöi ba Nungo Nidanö Yoridano.” Hizaʼi imane Elisa, ”Faya wa no sauri Yehowa, ba faya wa no sauri ndraʼugö na fabalido khöu.” Latohugö wofanö,
7 ba so 50 niha ngaʼötö ndra samaʼeleʼö soloʼö yaʼira ba lafaigi-faigi moroi ba zaröu me mozizio Elisa faoma Elia ba zinga Nungo Nidanö Yoridano.
8 Ihalö mbarunia sebua Elia,+ igölugö ba ibözi nidanö irege tebagi dua. Aefa daʼö, latörö dete danö sabeʼe ba gotalua nidanö andrö.+
9 Me no larugi tanö yefo, imane Elia khö Gelisa, ”Hadia zomasiʼö ufalua khöu? Waʼö fatua lö fabali ndraʼo khöu.” Imane Elisa, ”Beʼe khögu dua winaeta*+ waʼabölöu.”*+
10 Imane Elia, ”Abua sibai niʼandrömö. Na öʼila tehalö ndraʼo moroi khöu, hasambalö ötema niʼandrömö andrö. Hizaʼi, na lö öʼila ba lö ötema ia.”
11 Me fahuhuo ira ba wofanö-fanöra, iʼanemaiʼö so gureta wasuwöta soʼalitö si fao kudo alitö+ irege tefabali ira. Numalö miyawa Gelia si fao angi sabölö-bölö.+
12 Me iʼila daʼö Elisa, muʼao ia, ”He Pa, he Pa! Hiza gureta wasuwöta awö zaradadu ndraono Gizaraʼeli si fakudo!”+ Me lö oroma saʼae Gelia, isika nukhania Elisa irege tebagi dua.+
13 Aefa daʼö, ihalö mbaru sebua+ khö Gelia si no atoru ba ifuli ia ba zinga Nungo Nidanö Yoridano.
14 Ibözi nidanö faoma baru Gelia sebua ba imane, ”Hezo so Yehowa, Lowalangi Gelia andrö?” Tebagi dua nidanö daʼö ba itörö Elisa.+
15 Me laʼila zalua andrö moroi ba zaröu ira ngaʼötö samaʼeleʼö ba Yerikho, lamane, ”No möi khö Gelisa waʼabölö* Gelia.”+ Lafalukhaisi Gelisa ba latuhi danö fönania.
16 Lamane khönia, ”So 50 ndra matua sagabölö ba gotalua ndra enonimö andre. Tehegö khöra ba wangalui sokhö yaʼugö. Maʼatö ifazawa ia eheha niʼamoniʼö* moroi khö Yehowa ba ifazaumba ba zi sambua hili mazui daso.”+ Hizaʼi imane, ”Böi.”
17 Hewaʼae simanö, laforege wangumaʼö khönia irege aföli ia. Imane Elisa, ”Mifatenge ira.” Lafatenge ndra matua si 50 niha ba wangalui Elia, tölu hari waʼara. Hizaʼi, lö lasöndra.
18 Me mangawuli ira, ba Yerikho so Gelisa.+ Imane khöra, ”Tenga no uwaʼö khömi, böi miʼaeʼe.”
19 Ba gafuriata, lamane niha si so ba mbanua andrö khö Gelisa, ”Simane si no öʼila Pa, tefaudu sibai nahia mbanua daʼa,+ hizaʼi taʼunö nidanönia ba lö atabö zinanö.”*
20 Imane Elisa, ”Halö khögu mako side-ide si bohou, ba beʼe bakha nasio ba mako andrö.” Laʼoʼö niwaʼönia.
21 Aefa daʼö, möi Gelisa ba gumbu nidanö ba mbanua andrö ba ifazaumba bakha nasio.+ Imane, ”Daʼa niwaʼö Yehowa: ’No uhaogö nidanö daʼa, irege lö hadöi saʼae si mate mazui lö atabö zinanö.’”*
22 Ba no ohau-hau manö nidanö andrö irugi maʼökhö, simane niwaʼö Gelisa.
23 Mofanö Gelisa moroi ba daʼö numalö ia miyawa ba Mbetieli. Ba dalu lala, tohare ndraono matua moroi ba mbanua daʼö ba lö aetu laʼoʼaya ia+ lamane, ”He bota, ae miyawa! He bota, ae miyawa!”
24 Ba gafuriata, ibaliʼö ia furi ba iʼelifi ira ba döi Yehowa. Aefa daʼö, tohare dua ngaʼeu mberua si alawe+ moroi ba gatua, ba so 42 nisasawira ba gotalua ndraono sowulo ba daʼö.+
25 Moroi ba daʼö, möi Gelisa ba Hili Garimeli,+ aefa daʼö mangawuli ia ba Zamaria.
Nisura ba gahe zura
^ ”Ngaʼötö ndra samaʼeleʼö” te daʼö geluahania sekola khö ndra samaʼeleʼö mazui ngawawa ndra samaʼeleʼö.
^ Mazui ”dua faosatö”.
^ Tola mufoʼeluaha ia eheha niʼamoniʼö si so khö Gelia mazui faʼaterou dödö Gelia.
^ Tola mufoʼeluaha ia eheha niʼamoniʼö si so khö Gelia mazui faʼaterou dödö Gelia.
^ Mazui ”angi”.
^ Mazui te ”adudu nono si so ba dalu”.
^ Mazui te ”lö sadudu talu”.
