Dua Razo 20:1-21
20 Samuza maʼökhö, mofökhö Hizikia ba arakhagö mate ia.+ Andrö wa möi khönia Yesaya samaʼeleʼö ono Gamosi imane, ”Daʼa niwaʼö Yehowa: ’Beʼe wanuturu lala ba nösi nomou, börö me hasambalö mate ndraʼugö. Lö tola döhö wökhöu.’”+
2 Iʼotahögö dowa Hizikia ba mangandrö ia khö Yehowa,
3 ”He Yehowa, uʼandrö khöu, törö tödöu hewisa waʼalöfaröigu ba woloʼö lala andrö khöu soroi ba dödö, ba no ufalua zatulö fönau.”+ Ba iduhugö wege-ege Hizikia.
4 Fatua lö möi baero Yesaya moroi ba golayama tanö ba dalu, imane khönia Yehowa,+
5 ”Fuliʼö, ba waʼö khö Hizikia sondröniaʼö ono mbanuagu andrö, ’Daʼa niwaʼö Yehowa, Lowalangi duau Dawido, ”No ufondrondrongo wangandröu ba no uʼila nidanö höröu.+ Hasambalö ufadöhö wökhöu.+ Möiʼö dania ba nomo Yehowa ba ngaluo si tölu.+
6 Unönö 15 fakhe tö waʼanau nosou, ba uʼefaʼö ndraʼugö hegöi banua andre moroi ba danga razo Asiria.+ Urorogö mbanua daʼa börö döigu hegöi enonigu Dawido.”’”+
7 Aefa daʼö imane Yesaya, ”Halö mbua ara soköli si no mugili.” Lahalö daʼö ba laguleʼö ba waosa Hizikia. Ibörötaigö döhö waosania.+
8 Fatua lö daʼö, manofu Hizikia khö Yesaya, ”Hadia dandra+ wa ifadöhö ndraʼo Yehowa ba möido ba nomo Yehowa ba zi tölu hari tö?”
9 Imane khönia Yesaya, ”Daʼa dandra nibeʼe Yehowa wa hasambalö ifalua Yehowa hadia zi no iwaʼö: Hezo zomasiʼö, hadia idouʼö ia fulu bosi lumö nora* andre mazui iwuwu ia furi fulu bosi?”+
10 Imane Hizikia, ”Abölö aoha na idouʼö ia fulu bosi lumö nora andre moroi na iwuwu ia furi fulu bosi.”
11 Börö daʼö, muʼao Yesaya samaʼeleʼö khö Yehowa, ba awuwu furi lumö nora Gahasi andrö fulu bosi ibeʼe Lowalangi.+
12 Ba gafuriata, ifaʼoheʼö zura hegöi bualania razo Mbabilona sotöi Merodakhi-balada ono Mbalada khö Hizikia, börö me no irongo wa mofökhö Hizikia.+
13 Itemaʼö* denge-tenge andrö Hizikia ba iforomaʼö khöra fefu haratonia si so ba naha wangiröʼö,+ farahu ba daʼö wirö, anaʼa, fanikha famayoini, fanikha sebua böli tanö böʼö, fangönania ba wasuwöta awö danö böʼö maʼafefu. Lö hadöi si lö iforomaʼö khöra, he si so ba gödo razo mazui ba zi sagörö famatörönia.
14 Aefa daʼö, möi Yesaya samaʼeleʼö khö Razo Hizikia ba manofu ia, ”Hadia niwaʼö ndra niha daʼa ba hezo moroi khöra?” Imane Hizikia, ”Moroi ba mbanua saröu, yaʼia daʼö Babilona.”+
15 Ifuli manofu Yesaya, ”Hadia manö niʼilara ba nomou?” Imane Hizikia, ”No ahori laʼila zi so ba nomogu awö zi so ba nahia wangiröʼö haratogu maʼafefu. Lö hadöi si lö uforomaʼö khöra.”
16 Imane Yesaya khö Hizikia, ”Fondrondrongo niwaʼö Yehowa andre:+
17 ’Ba ginötönia dania, fefu zi so ba nomou awö zi no laʼowuloi ira tuau maʼafefu irugi maʼökhö andre, hasambalö laʼohe daʼö ba Mbabilona.+ Sambua lö laröi,’ iwaʼö Yehowa.
18 ’Ba so ösa ngaʼötöu si tumbu dania niʼohe+ ba gödo razo Mbabilona ba tobali ira sondröniaʼö ba gödo razo.’”+
19 Ba imane Hizikia khö Yesaya, ”No si sökhi sibai wehede Yehowa andrö nifaʼemau.”+ Imane nasa, ”Sökhi daʼö börö me so waʼahono dödö hegöi falöʼametaʼuö* sandrohu faʼaurigu.”+
20 Fefu waö-waö tanö böʼö sanandrösa khö Hizikia, tefarahu ba daʼö zi no ikhamö awö nifaluania ba wamazökhi baʼa nidanö+ hegöi lala nidanö irege mangele yomo ba mbanua,+ no tesura daʼö ba mbuku razo-razo niha Yehuda.
21 Ba gafuriata, mate Hizikia*+ ba lakoʼo ia ba lewatö ndra tuania. Aefa daʼö, ononia Manase+ zi tobali razo fangalinia.+
Nisura ba gahe zura
^ Te muʼogunaʼö nora daʼa ba wangerai inötö, simane tandra luo.
^ Mazui ”Ifondrondrongo”.
^ Mazui ”faʼatulö”.
^ Sin.: ”lafadölö Hizikia ba ngai ndra tuania”.
