Dua Razo 21:1-26
21 Faʼalawa ndröfi Manase+ me tobali ia razo yaʼia daʼö 12 fakhe, ba 55 fakhe mamatörö ia ba Yeruzalema.+ Töi ninania yaʼia daʼö Hefisiba.
2 Lö iböhöli wamalua si lö sökhi Manase föna Yehowa. Iʼoʼö gamuata si raʼiö si toʼölö lafalua soi böʼö+ nifofanö Yehowa föna ndraono Gizaraʼeli.+
3 Ifuli ihaogö naha wamosumange* si no idudugö amania Hizikia.+ Ifazökhi göi naha wanunu sumange khö Mbaʼali awö döla-döla niʼamoniʼö*+ simane nifalua Gahabi razo ndraono Gizaraʼeli.+ Mangalulu göi ia khö ndra saradadu zorugo ba ifosumange ira.+
4 Ifazökhi göi naha wanunu sumange ba nomo Yehowa,+ hewaʼae no iwaʼö Yehowa, ”Ba Yeruzalema ufaʼaso döigu.”+
5 Ba zi dombua olayama nomo Yehowa,+ ifazökhi naha wanunu sumange ba daʼö Manase khö ndra saradadu zorugo maʼafefu.+
6 Itunu nononia matua tobali sumange, ifalua wakelemusa ba faetasa,+ ba ifataro zogaoni bekhu niha si no mate awö zamaʼeleʼö.+ Oya zi lö sökhi nifalua Manase ba wangafökhöiʼö tödö Yehowa.
7 Iʼohe ba nomo Lowalangi sindruhu nadu nifoe famaedo döla-döla niʼamoniʼö*+ nifazökhinia, hewaʼae no iwaʼö Yehowa khö Dawido faoma khö nononia Selomo, ”Ba nomo daʼa hegöi ba Yeruzalema, banua nifiligu moroi ba mado ndraono Gizaraʼeli, ba daʼö dania ubeʼe döigu sagötö faʼara.+
8 Lö saʼae uheta ndraono Gizaraʼeli ba danö si no ubeʼe khö ndra tuara,+ asala soroi ba dödöra woloʼö niwaʼögu,+ yaʼia daʼö fefu Goroisa nibeʼe genonigu Moze.”
9 Hizaʼi, lö laʼoʼö daʼö, ba lö iböhöli Manase wamaelungu yaʼira irege abölö ebua horö nifaluara moroi ba soi böʼö nihori Yehowa föna ndraono Gizaraʼeli.+
10 Lö mamalö iʼogunaʼö ndra samaʼeleʼönia+ Yehowa ba wangumaʼö,
11 ”Lö iböhöli Manase razo Yehuda ba wamalua fefu gamuata si raʼiö. Abölö ebua horö nifaluania moroi ba niha Gamori+ fatua lö yaʼia.+ No ifaelungu niha Yehuda ba wamalua horö börö nadu niʼogorofi* andrö si no ifazökhi.
12 Börö daʼö, daʼa niwaʼö Yehowa Lowalangi ndraono Gizaraʼeli, ’Uʼasogö wamakao ba Yeruzalema+ hegöi ba Yehuda, irege tokea niha samondrongo dania.*+
13 Ufadölö zinali fanuʼa+ ba Yeruzalema niʼogunaʼö ba Zamaria,+ ba ufake wanuʼa faʼaloʼo* niʼogunaʼö ba nösi nomo Gahabi.+ Uʼosi Yeruzalema simane niha solosi mako, mufalögu na no aefa muʼosi.+
14 Uröi fefu nono mbanuagu* si toröi+ ba ubeʼe ira ba danga nudu. Larabu ba laʼoloiʼö ira udura maʼafefu,+
15 börö me lö laböhöli wamalua si lö sökhi fönagu ba lö aetu laʼafökhöiʼö dödögu, iʼotarai me aheta ndra tuara moroi ba danö Miserai irugi maʼökhö.’”+
16 Ato sibai niha si lö fasala nibunu* Manase irege anönö Yeruzalema ndrora andrö iʼotarai mbalö faföfö.+ Baero daʼö, ifalua göi horö börö me no ifaelungu niha Yehuda ba wamalua si lö sökhi föna Yehowa irege lafalua horö.
17 Fefu waö-waö tanö böʼö sanandrösa khö Manase, tefarahu ba daʼö nifaluania hegöi horö si no ifalua, no tesura daʼö ba mbuku razo-razo niha Yehuda.
18 Ba gafuriata, mate Manase* ba lakoʼo ia ba kabu föna nomonia yaʼia daʼö kabu Usa.+ Aefa daʼö, ononia Amoni zi tobali razo fangalinia.
19 Faʼalawa ndröfi Gamoni+ me tobali ia razo yaʼia daʼö 22 fakhe, ba dua fakhe mamatörö ia ba Yeruzalema.+ Töi ninania yaʼia daʼö Mesulemeta ono Harusi moroi ba Yotiba.
20 Lö iböhöli wamalua si lö sökhi Amoni föna Yehowa, simane si no irai ifalua amania Manase.+
21 Lö aetu iʼoʼö lala namania. Ifosumange ba ituhi danö föna nadu niʼogorofi* si no irai ifosumange amania.+
22 Iröi Yehowa Lowalangi ndra tuania, ba lö iʼoʼö niwaʼö Yehowa.+
23 Ba gafuriata, mangosara ndra enoni Gamoni ba wolawa yaʼia irege labunu ia ba nomonia samösa.
24 Hizaʼi, labunu fefu zolawa Razo Amoni ira niha mbanua daʼö, ba ononia Yosia nifataro tobali razo fangalinia.+
25 Fefu waö-waö tanö böʼö sanandrösa khö Gamoni, tefarahu ba daʼö nifaluania, no tesura daʼö ba mbuku razo-razo niha Yehuda.
26 Lakoʼo Gamoni ba lewatönia si so ba kabu Usa,+ ba ononia Yosia+ zi tobali razo fangalinia.
Nisura ba gahe zura
^ Sin.: ”nahia sagalawa”.
^ Faigi Geluaha Ngawua Wehede.
^ Faigi Geluaha Ngawua Wehede.
^ Ba li Heberaiʼo, te moʼamakhaita ia ba wehede ”si taʼunö” ba wangoromaʼö faʼogoro.
^ Sin.: ”mogoso-goso dania dalinga niha samondrongo yaʼia”.
^ Mazui ”mbua lot”.
^ Mazui ”dana khögu”.
^ Mazui ”Oya ndro niha si lö fasala niduwagö”.
^ Sin.: ”lafadölö Manase ba ngai ndra tuania”.
^ Ba li Heberaiʼo, te moʼamakhaita ia ba wehede ”si taʼunö” ba wangoromaʼö faʼogoro.
