Dua Razo 24:1-20
24 Me mamatörö Yoyaki, isuwö ia Nebukanesa+ razo Mbabilona, irege tobali ia enoni razo Mbabilona ba zi tölu fakhe waʼara. Ba gafuriata, mamadaö Yoyaki.
2 Ifatenge niha solawa Yoyaki andrö Yehowa, yaʼia daʼö ira sorabu moroi ba Galedaia,+ Siria, Moabi awö Gamoni. Lö laböhöli ba wanuwö Yehuda enaʼö tehori ira, simane niwaʼö Yehowa+ nifaʼema ndra samaʼeleʼönia.
3 Hasambalö alua daʼö ba Yehuda börö me no ifakhoi Yehowa. Omasi ia ihori niha Yehuda moroi ba duduma hörönia+ börö horö nifalua Manase.+
4 Ato sibai niha si lö horö nibunu Manase+ irege anönö Yeruzalema ndrora, ba lö edöna ibeʼe wangefa khönia Yehowa.+
5 Fefu waö-waö tanö böʼö sanandrösa khö Yoyaki awö nifaluania, no tesura daʼö ba mbuku razo-razo niha Yehuda.+
6 Ba gafuriata, mate Yoyaki,*+ ba ononia Yoyakhi zi tobali razo fangalinia.
7 Lö irai mofanö saʼae razo Miserai moroi ba soinia börö me no ihalö razo Mbabilona fefu mbanua nifatörönia,+ iʼotarai ba Ndraso Miserai+ irugi ba Nungo Nidanö Oiferati.+
8 Faʼalawa ndröfi Yoyakhi+ me tobali ia razo yaʼia daʼö 18 fakhe, ba tölu waŵa mamatörö ia ba Yeruzalema.+ Töi ninania yaʼia daʼö Nehusa ono Gelinata moroi ba Yeruzalema.
9 Lö iböhöli wamalua si lö sökhi föna Yehowa simane nifalua namania.
10 Me lua daʼö, lö laböhöli wanuwö Yeruzalema ira enoni Nebukanesa razo Mbabilona ba lafaʼuʼu mbanua andrö.+
11 Me no lafaʼuʼu mbanua daʼö ira enoninia, möi Nebukanesa razo Mbabilona ba mbanua andrö.
12 Ba möi baero Razo Yoyakhi, inania, ira enoninia maʼafefu, ira sondröniaʼö hegöi sondröniaʼö ba gödo razo,+ lalulu ira ba danga razo Mbabilona.+ Muʼoloiʼö ia me no walu fakhe mamatörö razo Mbabilona.+
13 Ihalö fefu harato si so ba nomo Yehowa hegöi ba gödo razo.+ Itataba fefu gama-gama anaʼa nifazökhi Zelomo razo ndraono Gizaraʼeli si so ba gosali Yehowa.+ Alua daʼa simane sibai niwaʼö Yehowa.
14 Iʼoloiʼö fefu nono mbanua Yeruzalema, ira sondröniaʼö,+ saradadu sagabölö, sonekhe mamazökhi loga*+ hegöi sogonekhe tanö böʼö, so 10.000 niha maʼafefu. Hatö niha si numana zi toröi.+
15 Iʼoloiʼö göi Yoyakhi+ ba Mbabilona.+ Iʼohe göi nina razo, foʼomo razo, ira sondröniaʼö ba gödo razo hegöi niha si so faka ba Yeruzalema. Iʼoloiʼö ira ba Mbabilona.
16 Iʼoloiʼö göi 7.000 ndra saradadu sagabölö ba 1.000 zonekhe mamazökhi loga* hegöi sogonekhe tanö böʼö. Dozi niha sagabölö awö zi no toʼölö ba wasuwöta, laʼohe ba Mbabilona.
17 Ifataro Matania, talifusö nama Yoyakhi+ tobali razo fangali Yoyakhi, ba ifaböʼöni döi tobali Sedekia.+
18 Faʼalawa ndröfi Zedekia me tobali ia razo yaʼia daʼö 21 fakhe, ba 11 fakhe mamatörö ia ba Yeruzalema. Töi ninania yaʼia daʼö Hamutala+ ono Yeremia moroi ba Libena.
19 Lö iböhöli wamalua si lö sökhi föna Yehowa simane nifalua Yoyaki.+
20 Mofönu sibai Yehowa ba Yeruzalema hegöi ba Yehuda irege alua khöra wamakao, andrö wa itiboʼö ba iheta ira föna duduma hörönia.+ Ba gafuriata molawa Zedekia khö razo Mbabilona.+
Nisura ba gahe zura
^ Sin.: ”lafadölö Yoyaki ba ngai ndra tuania”.
^ Mazui te ”mamazökhi towa mbaʼa-baʼa”.
^ Mazui te ”mamazökhi towa mbaʼa-baʼa”.
