Dua Razo 25:1-30
25 Me no siwa fakhe mamatörö Zedekia, ba ngaluo si fulu ba mbaŵa si fulu, möi Nebukanesa+ razo Mbabilona awö ndra saradadunia ba wanuwö Yeruzalema.+ Ifazökhi nosenia föna mbanua andrö ba ifasui faoma towa ba wamaʼuʼu banua daʼö.+
2 Me no irugi 11 fakhe mamatörö Razo Sedekia, lö manö nasa laböhöli wamaʼuʼu banua andrö.
3 Ba ngaluo si siwa ba mbaŵa si öfa, alua lofo sabölö-bölö+ ba mbanua daʼö ba lö hadöi saʼae balazo.+
4 Me luo daʼö, möi bakha+ zanuwö irege moloi fefu zaradadu ba zi bongi daʼö, latörö mbawa göli si so ba gotalua göli kara si no mufodombua wamalaete sahatö ba kabu razo. No lafaʼuʼu mbanua andrö niha Galedaia. Mofanö razo numalö ba Garaba.+
5 Lagohi razo andrö ira saradadu niha Galedaia ba lakhamö ia ba Danö si Mate Yerikho. Oi zara moloi ndra saradadunia ba laröi ia.
6 Aefa daʼö, laraʼu Razo Sedekia+ ba laʼohe khö razo Mbabilona ba Ribela ba lahuku ia ba daʼö.
7 Labunu fefu nono Zedekia föna duduma hörönia. Ikoe Nebukanesa nono hörö Zedekia ba irate gahe faoma tembaga, aefa daʼö iʼohe ba Mbabilona.+
8 Ba ngaluo si fitu ba mbaŵa si lima, me no 19 fakhe mamatörö Nebukanesa razo Mbabilona, möi Nebuzarada+ ba Yeruzalema,+ yaʼia andrö kafalo zanaro razo Mbabilona.
9 Itunu nomo Yehowa,+ gödo razo+ hegöi omo ba Yeruzalema maʼafefu.+ Itunu göi fefu nomo niha si tehöngö ba mbanua daʼö.+
10 Aefa daʼö, ladudugö göli si fasui Yeruzalema ira saradadu niha Galedaia soloʼö kafalo zanaro andrö.+
11 Niha si toröi ba mbanua daʼö awö niha si faʼawö khö razo Mbabilona hegöi ono mbanua tanö böʼö, iʼoloiʼö ira Nebuzarada kafalo zanaro andrö.+
12 Hizaʼi, iröi ösa nono mbanua si numana, ibaliʼö sohalöwö ba kabu ba so göi ösa zi tobali sawuyu.+
13 Ladudugö gehomo tembaga+ si so ba nomo Yehowa ira niha Galedaia awö gureta wasuwöta+ hegöi Asi Tembaga+ ba nomo Yehowa, aefa daʼö laʼohe tembaga andrö ba Mbabilona.+
14 Lahalö göi embe, tambila, famunu galitö, mako awö ngawalö fakake tembaga niʼogunaʼö ba gosali.
15 Ihalö naha mbo galitö kafalo zanaro andrö, mako nifazökhi moroi ba ganaʼa+ hegöi firö si sökhi.+
16 Hizaʼi, tebai musuʼa hawaʼoya tembaga si no musöndra moroi ba gehomo si dombua, moroi ba Nasi Tembaga hegöi kureta wasuwöta nifazökhi Zelomo ba nomo Yehowa.+
17 Faʼalawa ero sambua ehomo 8 meter.*+ Högönia tefazökhi moroi ba tembaga ba faʼalawania mato sameter.* Fefu zaiwa hegöi bua dalimo si so ba zi fasui högönia, tefazökhi moroi ba tembaga.+ Fagölö sibai gehomo si dua rozi andrö.
18 Kafalo zanaro andrö iraʼu Zeraya+ yaʼia daʼö kafalo gere, Zefania+ ere si dua ba datölu zozago bawandruhö.+
19 Ba mbanua daʼö, iraʼu göi samösa zondröniaʼö ba gödo razo si no tobali kafalo zaradadu, dalima zameʼe mene-mene khö Razo si so ba daʼö, samösa sekretaris sondröniaʼö saradadu samarou ono mbanua andrö, ba 60 niha zi so ba daʼö.
20 Iʼohe ira Nebuzarada+ kafalo zanaro andrö khö razo Mbabilona ba Ribela.+
21 Aefa daʼö, ibunu ira razo Mbabilona ba Ribela ba danö Hamata.+ Simane daʼö zalua me laʼoloiʼö niha Yehuda moroi ba danöra.+
22 Ifataro Gedalia+ ono Gahika+ ono Zafana+ andrö Nebukanesa razo Mbabilona ba wamaigi-maigi niha si no muröi ba Yehuda.+
23 Me no larongo ira kumandru zaradadu hegöi ono buara wa no lafataro Gedalia, möi ira laʼondrasi Gedalia ba Misefa. Yaʼira andre Simaʼeli ono Netania, Yohanano ono Garea, Seraya ono Danumeti niha Netofa, ba Yaʼasania ono Maʼakhati ba fao khöra nono buara.+
24 Ba möi ba hölu khöra Gedalia ba imane, ”Böi ataʼu ami tobali enoni niha Galedaia. Ba daʼa miʼiagö ba miʼoʼö niwaʼö razo Mbabilona. Ba sohahau tödö ami.”+
25 Ba me baŵa si fitu, mofanö Zimaʼeli+ ono Netania ono Gelisama yaʼia daʼö ngaʼötö razo ba dafulu niha tanö böʼö. Möi ira wamunu Gedalia awö niha Yahudi hegöi niha Yehuda si fao khönia ba Misefa.+
26 Fefu niha sawuyu-wuyu, satua awö ndra kumandru zaradadu, möi ira ba Miserai+ börö waʼataʼura ba niha Galedaia.+
27 Me no mufataro Gewili-merodakhi tobali razo ba Mbabilona, iʼefasi Yoyakhi+ razo Yehuda moroi ba gurunga.+ Me luo daʼö, ngaluo si 27 mbaŵa si 12, me no 37 fakhe teʼoloiʼö Yoyakhi razo Yehuda.
28 Ihaogö wehede khö Yoyakhi ba ibeʼe dadaoma sabölö alawa moroi ba razo tanö böʼö si fao khönia ba Mbabilona.
29 Lö saʼae ifake nukha gurunga Yoyakhi ba falulu manga ia khö Razo sandrohu faʼaurinia.
30 Ero maʼökhö, ibeʼe mbalazo Yoyakhi Razo sandrohu faʼaurinia.
