Dua Razo 4:1-44
4 So samösa ndra alawe foʼomo ngaʼötö zamaʼeleʼö+ sangumaʼö khö Gelisa, ”No mate woʼomogu, enonimö andrö. Ba no öʼila wa sangataʼufi Yehowa ia.+ Hizaʼi tohare niha si no mamamizaʼö kefenia, edöna ihalö nonogu si darua ba ibaliʼö sawuyunia.”
2 Imane Elisa, ”Hadia zinangea ufalua? Ombakhaʼö khögu, hadia zi so ba nomo khöu?” Imane, ”Lö hadöi tanö böʼö baero zi sambua buli-buli fanikha.”+
3 Imane Elisa, ”Andrö rumbi si lö ösi ba zi faola omo khöu. Oyaʼö andrö.
4 Aefa daʼö, miʼae ba nomomi, yaʼugö hegöi iraonou, ba miduhö mbawandruhö. Foʼösi rumbi faoma fanikha ba fasafi zi no afönu.”
5 Mofanö ndra alawe andrö.
Me no möi ia ba nomo ba iduhö mbawandruhö, laʼohe khönia rumbi iraononia, ba lö aetu ifoʼösi bakha wanikha.+
6 Me no afönu rumbi daʼö maʼafefu, imane khö zi samösa ononia, ”Ohe ba daʼa rumbi tanö böʼö.”+ Hizaʼi imane ononia, ”No ahori moʼösi fefu.” Lö saʼae mangele wanikha andrö.+
7 Ba möi ia wangombakha khö genoni Lowalangi sindruhu. Imane enoni Lowalangi sindruhu, ”Famawa wanikha daʼö ba buʼa gömöu. Si törania miʼogunaʼö ba wowöli soguna khömi.”
8 Samuza maʼökhö, möi Gelisa ba Zunema.+ So samösa ndra alawe si tehöngö ba mbanua andrö samorege ba wogaoni yaʼia wemanga.+ Ero itörö daʼö Elisa, molombase ia wemanga.
9 Imane ira alawe andrö khö woʼomonia, ”Aboto ba dödögu wa niha sasese manörö daʼa enoni Lowalangi niʼamoniʼö.
10 Datafazökhi mbateʼe side-ide ba dete nomo,+ ba daʼö tabeʼe naha wemörönia, meza, kurusi hegöi naha wandru. Ero tohare ia tola mörö ia ba daʼa.”+
11 Samuza maʼökhö, tohare Gelisa ba mörö ia ba daʼö.
12 Imane khö zohalöwö khönia sotöi Gehasi,+ ”Kaoni khögu ndra alawe Zunema daʼö.”+ Möi ikaoni ndra alawe andrö.
13 Aefa daʼö imane Elisa khö Gehasi, ”Ae fatunö khönia, ’No akao ndraʼugö khöma.+ Hadia zinangea mafalua?+ Hadia so zinangea ufatunö khö Razo+ mazui khö gumandru zaradadunia?’” Imane, ”Löʼö, no ahono dödögu wefao ba nösi nomogu.”
14 Imane Elisa, ”Na simanö, hadia zinangea tafalua?” Imane Gehasi, ”Lö khönia ono matua+ ba no atua woʼomonia.”
15 Iʼanemaiʼö imane Elisa, ”Kaoni ia.” Ba mofanö Gehasi ba wogaoni ira alawe andrö ba no mozizio manö ndra alawe daʼö föna mbawandruhö.
16 Imane Elisa, ”Ba ndröfia, simane daʼa waʼalawa luo, öhagi nono matua.”+ Imane ira alawe andrö, ”Böi limo ndraʼo, Pa. Yaʼugö andre enoni Lowalangi sindruhu!”
17 Hizaʼi, sindruhu-ndruhu manabina ndra alawe daʼö ba tumbu khönia nono matua ba ginötö si fagölö ba ndröfi aefa daʼö, simane niwaʼö Gelisa khönia.
18 Samuza maʼökhö me no ebua-bua saʼae nono andrö, möi ia ifalukhaisi namania si fao khö ndra sohalöwö ba wamasi.
19 Lö aetu-aetu imane khö namania, ”Afökhö sibai högögu!” Imane amania khö ndra sohalöwö, ”Ohe ia khö ninania.”
20 Laʼohe nono andrö khö ninania, ihagi ofeta laluo, aefa daʼö mate.+
21 Möi miyawa ndra alawe andrö ba ifadölö nononia ba naha wemörö genoni Lowalangi sindruhu,+ iduhö mbawandruhö ba ilau mofanö.
22 Ikaoni woʼomonia ba imane, ”Fatenge khögu samösa zohalöwö, akha iʼohe ba daʼa galide. Damöido khö genoni Lowalangi sindruhu andrö ba waʼalio, aefa daʼö mangawulido.”
23 Hizaʼi imane foʼomonia, ”Hana wa möiʼö khönia? Tenga baŵa si bohou maʼökhö+ ba tenga göi luo Sabato.” Imane ira alawe andrö, ”Lö salania.”
24 Ifosela* galidenia ba imane khö zohalöwö khönia, ”Taʼaliokö wofanö. Uʼandrö khöu böi radö, baero na yaʼo zangumaʼö.”
25 Möi ndra alawe andrö khö genoni Lowalangi sindruhu ba Hili Garimeli. Me iʼila ia moroi ba zaröu enoni Lowalangi sindruhu, imane khö zohalöwö khönia sotöi Gehasi, ”Hiza! So ba daʼö ndra alawe Zunema andrö.
26 Ae fagohi ba sofu khönia, ”Hadia lö hadia ia khöu, foʼomou ba onou?” Imane ira alawe andrö, ”Lö hadia ia khöma.”
27 Me falukha ia khö genoni Lowalangi sindruhu ba hili, igogohe gahe genoni Lowalangi andrö.+ Ifahatö ia Gehasi ba wamofanö yaʼia, hizaʼi imane enoni Lowalangi sindruhu, ”Böi fofanö ia. No abu sibai dödönia. Lö uʼila hadia mbörö, me lö nifatunö Yehowa khögu.”
28 Imane ira alawe andrö, ”Lö niʼandrögu khöu ndraono. No göi uwaʼö khöu, ’Böi beʼe khögu wanötöna si lö eluaha.’”+
29 Iʼanemaiʼö imane Elisa khö Gehasi, ”Ofanö, böbö mbarumö sebua ba löwi-löwiu+ ba ohe ziʼogu. Fadölö ziʼogu andre ba mbawa nono daʼö. Böi owai niha si falukha khöu ba lala. Ba na so zangowai yaʼugö, böi tema wangowaira.”
30 Hizaʼi, imane ira alawe andrö, ”Faya wa no sauri Yehowa ba faya wa no sauri ndraʼugö na uröiʼö ba daʼa.”+ Ba fao Gelisa khönia.
31 Oföna irugi Gehasi ba no ibeʼe ba mbawa nono andrö ziʼo, hizaʼi lö kalua linia ba lö ifaliwa ia.+ Aefa daʼö, mangawuli ia khö Gelisa ba imane, ”Lö si maoso nono daʼö.”
32 Me irugi nomo daʼö Elisa, no tefadölö nono andrö ba naha wemörö Gelisa.+
33 Ba möi si bakha Gelisa ba iduhö mbawandruhö, aefa daʼö mangandrö ia khö Yehowa.+
34 Möi ia ba naha wemörö, ifalögu ia ba dötöʼa nono daʼö. Ifaudugö mbawania ba mbawa nono andrö, simanö göi hörönia ba hörö nono daʼö, ba tangania ba dete danga nono daʼö. Lö iböhöli wamalua daʼö irege aukhu nösi nono andrö.+
35 Ifangörö-ngörö ia bakha ba nomo, ba ifuli möi ia ba naha wemörö ba ifalögu ia ba dötöʼa nono daʼö. Fitu kali bahö nono andrö ba ibokai hörönia.+
36 Imane Elisa khö Gehasi, ”Kaoni ndra alawe Zunema andrö.” Ba mohede ia khö ndra alawe daʼö ba tohare ia. Imane Elisa, ”Yaʼe nonou, halö ia.”+
37 Möi ndra alawe andrö ba ituhi danö föna Gelisa, aefa daʼö ihalö nononia iʼohe baero.
38 No alua lofo ba Giligala me mangawuli Gelisa ba daʼö.+ Modadao ngaʼötö ndra samaʼeleʼö+ fönania ba imane khö zohalöwö khönia,+ ”Rino gö ba mbowoa sebua ba beʼe ba ngaʼötö ndra samaʼeleʼö andrö.
39 Lö ara, so samösa moroi ba gotaluara zi möi mangai sayu ba mbenua. Ihalö mbua labu sauri ba gotalua ndruʼu ba ibeʼe ba mbarunia irege afönu, aefa daʼö mangawuli ia. Itataba labu andrö, irino ba mbowoa sebua hizaʼi lö iʼila hadia nirinonia.
40 Ba lafasao gö andrö föna niha sato, hizaʼi me edöna laʼa lamane, ”He enoni Lowalangi sindruhu, so langu* ba mbowoa daʼö.” Ba lö aʼozu laʼa.
41 Imane, ”Halö darigu.” Me no ibeʼe ba mbowoa imane, ”Mibeʼe khöra.” Aefa daʼö, lö hadöi saʼae si möi famunu ba mbowoa daʼö.+
42 So samösa zi tohare moroi ba Mbaʼali-zalisa,+ iʼohe khö genoni Lowalangi sindruhu andrö 20 ngawua roti barli+ moroi ba ziaʼa mbua zinanönia, ba sambua karate mbua zinanö.+ Imane Elisa, ”Beʼe öra daʼö.”
43 Hizaʼi imane sohalöwö khönia, ”Hewisa wa tola ibönö daʼa ö zi 100 niha faʼato?”+ Imane Elisa, ”Beʼe manö, börö me imane Yehowa, ’Manga ira ba lö ahori.’”+
44 Labeʼe gö andrö ba manga ira ba so nasa zi toröi+ simane niwaʼö Yehowa.
