Dua Razo 5:1-27
5 Göna bou auri* Naʼema kumandru zaradadu razo Siria. Saradadu sabölö ia ba ifosumange ia sokhö yaʼia börö me no iʼogunaʼö ia Yehowa ba wameʼe faʼamöna ba Ziria.
2 Me möi niha Ziria ba wolawa banua Gizaraʼeli, so samösa nono alawe side-ide si no muʼoloiʼö ba tobali sangai halöwö khö woʼomo Naʼema.
3 Imane ono alawe andrö khö woʼomo zokhö yaʼia, ”Na möi zokhö yaʼo khö zamaʼeleʼö+ si so ba Zamaria, hasambalö ifadöhö ia samaʼeleʼö andrö ba mbou auri si göna khönia.”+
4 Aefa daʼö, iʼombakhaʼö* khö razo Siria wehede nono alawe Gizaraʼeli andrö.
5 Imane razo Siria khö Naʼema, ”Aeʼe iadaʼa! Ufaʼoheʼö dania zura khö razo ndraono Gizaraʼeli.” Mofanö Naʼema, iʼohe 342 kilogram* wirö, 6.000 ngawua ganaʼa ba fulu ngaʼörö nukha.
6 Iʼohe zura daʼö khö razo ndraono Gizaraʼeli. Daʼa nösinia, ”Si fao sura daʼa, no ufatenge khöu genonigu Naʼema enaʼö öfadöhö mbou aurinia.”
7 Me ibaso zura daʼö razo ndraono Gizaraʼeli, isika nukhania ba imane, ”Hadia Lowalangi ndraʼo si tola mangetuʼö noso mazui sangila mangorifi niha?+ Ifatenge khögu niha daʼa enaʼö ufadöhö mbou aurinia! Miʼila samösa wa sangalui tandrawa ia khögu.”
8 Me irongo Elisa, enoni Lowalangi sindruhu wa no isika nukhania razo ndraono Gizaraʼeli, ifaʼoheʼö goroisania, ”Hana wa ösika nukhau? Fatenge ia khögu enaʼö iʼila wa so zamaʼeleʼö ba ndraono Gizaraʼeli.”+
9 Börö daʼö tohare Naʼema awö kudo hegöi kureta wasuwötania, ba no mozizio ia föna nomo Gelisa.
10 Hizaʼi ifatenge ngoni-ngoninia Elisa ba wangumaʼö khö Naʼema, ”Ae höndrögö ndraʼugö fitu kali+ ba Nungo Nidanö Yoridano.+ Döhö dania mbotou ba lö saʼae raʼiö ndraʼugö.”
11 Me irongo daʼö Naʼema, mofönu sibai ia ba ilau mofanö. Imane, ”Uwalinga atö möi ia ifalukhaisi ndraʼo ba ilau mozizio ba daʼa ba wogaoni töi Lowalanginia Yehowa ba ifazawa dangania ba wamadöhö fökhögu andre.
12 Abölö baga Nungo Nidanö Gabana hegöi Farifari si so ba Ndramaseko+ moroi ba nungo nidanö si so ba Gizaraʼeli. Hana wa tenga ba daʼö iwaʼö khögu weʼamöi ba wamadöhö fökhögu?” Ilau mofanö si fao faʼabao dödö.
13 Möi khönia ndra enoninia ba lamane, ”He Pa,* na abua menaʼö niwaʼö zamaʼeleʼö andrö khöu, tatu omasiʼö öfalua lö? Hizaʼi, ha daʼö niwaʼönia khöu, ’Höndrögö ndraʼugö ba nidanö ba döhö wökhöu.’”
14 Börö daʼö, möi ia mitou ba ihöndrögö ia fitu kali ba Nungo Nidanö Yoridano simane niwaʼö genoni Lowalangi sindruhu.+ Mangawuli simane boto ndraono side-ide mbotonia+ ba lö saʼae raʼiö ia.+
15 Aefa daʼö, ifuli ia khö genoni Lowalangi sindruhu+ fabaya awönia maʼafefu. Ilau mozizio föna genoni Lowalangi andrö ba imane, ”Awena aboto ba dödögu wa lö hadöi Lowalangi böʼö ba zi sagörö ulidanö baero ba Gizaraʼeli.+ Tema mbuala* niʼohe genonimö andre.”
16 Hizaʼi fahölu Gelisa, ”Faya wa no sauri Yehowa Lowalangi nifosumangegu na utema daʼö.”+ Iforege Naʼema, hizaʼi lö omasi Gelisa ba wanema daʼö.
17 Ba gafuriata imane Naʼema, ”Na simanö, beʼe khö genonimö andre dambu moroi ba soi daʼa, ndrohu-ndrohu niʼohe galide sebua* si dua ngaʼeu. Iʼotarai iadaʼa ha khö Yehowa ubeʼe zumange nitunu mazui sumange tanö böʼö, ba lö ubeʼe saʼae khö lowalangi böʼö.
18 Hizaʼi, uʼandrö enaʼö ibologö dödönia khögu Yehowa ba nifaluagu andre: Ero möi zokhö yaʼo ba ituhi danö föna nahia wamosumange Rimona, igogohe daʼiogu irege faodo khönia ba wanuhi tanö. Yaʼebolo dödö Yehowa khögu na ufalua daʼö.”
19 Aefa daʼö imane khönia Elisa, ”Ofanö, yaʼohahau dödöu.” Me no aröu mofanö Naʼema,
20 mangera-ngera Gehasi,+ sohalöwö khö Gelisa enoni Lowalangi sindruhu,+ ’Lö omasi zokhö yaʼo wanema buala nibeʼe Naʼema niha Ziria+ ba itehegö mofanö ia. Faya wa no sauri Yehowa na lö uʼoʼö Naʼema enaʼö ibeʼe khögu ösa.’
21 Mofanö Gehasi ba möi iʼoʼö Naʼema. Me iʼila Naʼema wa so zoloʼö yaʼia, möi ia tou ba guretania ba wamalukhaisi Gehasi ba imane, ”Hadia lö hadia ia?”
22 Imane Gehasi, ”Löʼö. Ifatenge ndraʼo sokhö yaʼo ba wamatunö khöu, ’So darua ndraono matua moroi ba ngaʼötö ndra samaʼeleʼö si möi khögu moroi ba mbanua si so ba hili Geferai. Beʼe khöra 34,2 kilogram* wirö ba dua ngaʼörö nukha.’”+
23 Imane Naʼema, ”Halö manö 68,4 kilogram.”* Iforege wangumaʼö khönia Naʼema+ ba ibukusi 68,4 kilogram wirö ba zi dombua bola-bola, ifaogö ba daʼö dua ngaʼörö nukha. Ibeʼe khö zi darua sohalöwö khönia, ba laʼohe daʼö föna Gehasi.
24 Me irugi mbanua Gofeli,* ihalö daʼö Gehasi ba dangara, ibiniʼö ba nomonia ba ifofanö ira. Me no mofanö ira,
25 möi ia mozizio ba zinga zokhö yaʼia. Isofu khönia Elisa, ”Hezo so öʼotarai Gehasi?” Imane, ”Lö manö sofanö ndraʼo.”+
26 Imane Elisa khönia, ”Hadia öwalinga lö uʼila? No möiʼö öʼoʼö niha daʼö, ba möi ia tou moroi ba guretania ba wamalukhaisi yaʼugö. Hadia daʼa ginötönia ba wanema firö, nukha, kabu zaitu, kabu nagu, biri-biri, sawi mazui enoni ira matua ba ira alawe?+
27 Hiza, göna khöu mbou auri Naʼema+ irugi ngaʼötöu maʼafefu.” Me mofanö Gehasi, iʼanemaiʼö göna ia bou auri, afusi hulö esi.*+
Nisura ba gahe zura
^ Mazui ”fökhö guli”.
^ Te Naʼema zangombakha.
^ Sin.: ”He Ama”.
^ Sin.: ”howu-howu”.
^ Ba li Heberaiʼo eluahania ngaʼötö galide ba kudo.
^ Ba Zamaria so mbanua daʼö, te ba hili mazui ba dete göli.
^ Sin.: ”salju”.
