Dua Razo 7:1-20
7 Aefa daʼö imane Elisa, ”Mifondrondrongo daromali Yehowa. Daʼa niwaʼö Yehowa: ’Simane faʼalawa luo andre mahemolu, hatö sambua ngawua firö* mböli zi 7,33 liter* darigu si sökhi, ba hatö sambua ngawua firö mböli zi 14,66 liter* barli ba mbawa göli* Zamaria.’”+
2 Hizaʼi me irongo daʼö ngoni-ngoni Razo, yaʼia daʼö niha nifaduhusinia tödö, imane khö genoni Lowalangi sindruhu, ”Hewaʼae ibokai Yehowa nahia mbalazo* si so ba mbanua si yawa, lö duhu alua daʼö!”*+ Imane Elisa, ”Hasambalö öʼila dania,+ hizaʼi tebai öʼa.”+
3 So daöfa niha si göna bou auri si dadao ba mbawa göli.+ Lamane khö nawöra, ”Hadia gunania modadao ita ba daʼa ofeta mate?
4 Na möi ita miyomo ba mbanua, hasambalö mate ita börö me lö hadöi ö ba daʼö.+ Na modao-dao manö göi ita ba daʼa, hasambalö mate ita. Na simanö, möi ita ba nose razo Siria. Na latehegö auri ita, tatu tasöndra waʼauri. Hizaʼi, na labunu ita, tatu si mate saʼae ita.”
5 Ba zi bongi, möi ira ba nose niha Ziria. Me larugi nose andrö, samösa lö niha ba daʼö.
6 Alua daʼö börö me no iʼasogö Yehowa li gureta wasuwöta awö zi fakudo sato sibai irege larongo daʼö ira saradadu Siria.+ Ba faoma lamane khö nawöra, ”Faigi atö razo ndraono Gizaraʼeli, no igazi razo niha Kheti awö razo niha Miserai ba wolawa yaʼita!”
7 Andrö wa laʼanemaiʼö lalau moloi bongi daʼö enaʼö lö teʼala nosora, irege laröi manö nosera, kudo, kalide awö nahia wolombasera maʼafefu.
8 Me larugi nahia daʼö ira niha si göna bou auri no mege, möi ira ba zi sambua ose ba ladölö ira wemanga ba mamadu idanö. Lahalö wirö, anaʼa hegöi nukha si so ba daʼö, ba mofanö ira labiniʼö fefu nihalöra andrö. Aefa daʼö, lafuli ira zui ba nose tanö böʼö ba lahalö gama-gama si so ba daʼö ba labiniʼö.
9 Ba gafuriata, lamane khö nawöra, ”Böi tahonogö manö ita. No turia si sökhi daʼa! Na lö taʼombakhaʼö irugi moluo, hasambalö lahuku ita. Aine, dataʼombakhaʼö ba gödo razo.”
10 Börö daʼö, möi ira laʼombakhaʼö khö ndra sanaro bawa göli, ”No möiga ba nose niha Ziria, hizaʼi lö niha-niha ba daʼö ba lö nirongoma li niha. Ha kudo hegöi kalide si no muböbö zi so ba daʼö, ba no laröi manö nosera.”
11 Me larongo daʼö ira sanaro bawa göli, laʼanemaiʼö lafatunö daʼö ba niha si so ba gödo razo.
12 Iʼanemaiʼö maoso Razo bongi daʼö ba imane khö ndra enoninia, ”Sindruhunia, daʼa niʼera-era niha Ziria: No laʼila wa solofo ita,+ andrö wa laröi nosera ba labiniʼö ira ba mbenua. Na talau mofanö, hasambalö laraʼu ita ba möi ira bakha ba mbanuada.”+
13 Imane samösa enoninia, ”Fatenge ndra matua ba wolohe kudo si lima ngaʼeu si toröi ba mbanua andre, enaʼö möi ira lafaigi hadia zalua. Gofu hewisa saʼatö, he mofanö ira mazui laʼiagö manö daʼa, hasambalö mate ira simane iraono Gizaraʼeli si so ba daʼa.”
14 Börö daʼö, lahalö dua rozi gureta kudo, ba ifatenge ira Razo ba wamaigi ose niha Ziria.
15 Mofanö ira larugi Nungo Nidanö Yoridano. Ba lala, laʼila nukha soya hegöi gama-gama si no laröi ira niha Ziria me lalau moloi börö waʼataʼura. Aefa daʼö, mangawuli niha nifatenge andrö ba laʼombakhaʼö daʼö khö Razo.
16 Börö daʼö, mofanö ndraono Gizaraʼeli ba lahalö fefu zi so ba nose niha Ziria, ba hatö sambua ngawua firö* mböli zi 7,33 liter* darigu si sökhi, ba hatö sambua ngawua firö mböli zi 14,66 liter* barli, tefaudu daʼö simane niwaʼö Yehowa.+
17 Ibeʼe halöwö khö ngoni-ngoni Razo, yaʼia daʼö niha nifaduhusinia tödö ba wamaigi-maigi bawa göli, hizaʼi mate ia ba daʼö börö me lahundra-hundra ia niha sato. Tefaudu daʼö ba zi no iwaʼö enoni Lowalangi sindruhu andrö khö Razo me ifalukhaisi ia Razo.
18 Alua daʼö simane si no irai iwaʼö enoni Lowalangi sindruhu andrö khö Razo, ”Simane faʼalawa luo andre mahemolu, hatö sambua ngawua firö* mböli zi 14,66 liter* barli, ba hatö sambua ngawua firö mböli zi 7,33 liter* darigu si sökhi ba mbawa göli Zamaria.”+
19 Hizaʼi, me luo daʼö imane ngoni-ngoni Razo khö genoni Lowalangi sindruhu, ”Hewaʼae ibokai Yehowa nahia mbalazo* si so ba mbanua si yawa, lö duhu alua daʼö!”* Imane Elisa, ”Hasambalö öʼila dania, hizaʼi tebai öʼa.”
20 No alua khönia daʼö, mate ia börö me lahundra-hundra ia ba mbawa göli.
Nisura ba gahe zura
^ Mazui ”ba fasa”.
^ Mazui ”mbawandruhö nidanö”.
^ Sin.: ”wehede daʼö”.
^ Mazui ”mbawandruhö nidanö”.
^ Sin.: ”wehede daʼö”.
