Dua Razo 9:1-37
9 Ba mohede Gelisa samaʼeleʼö khö zi samösa ngaʼötö zamaʼeleʼö, ”Böbö mbarumö sebua ba löwi-löwiu, ohe mbuli-buli wanikha andre ba aliokö weʼamöi ba Ramoti-gileadi.+
2 Na no örugi, alui Yehu+ ono Yozafati ono Nimisi. Kaoni ia ba gotalua ndra talifusönia ba ohe ia ba mbateʼe tanö bakha.
3 Bayoini högönia faoma fanikha andre ba ömane khönia, ’Daʼa niwaʼö Yehowa: ”Ubayoini ndraʼugö tobali razo ndraono Gizaraʼeli.”’+ Aefa daʼö, bokai mbawandruhö ba aliokö woloi moroi ba daʼö.”
4 Mofanö zohalöwö khö Gelisa samaʼeleʼö andrö ba Ramoti-gileadi.
5 Me irugi, no modadao ndra kumandru zaradadu ba daʼö. Imane khöra, ”He Pa, so goroisa nifaʼemagu khöu.” Manofu Yehu, ”Haʼökhö ofeta daʼö?” Imane, ”Khömö Pa.”
6 Mozizio Yehu ba möi ia ba nomo. Aefa daʼö, möi zohalöwö andrö ba ifaduwa wanikha ba högö Yehu imane, ”Daʼa niwaʼö Yehowa Lowalangi ndraono Gizaraʼeli: ’Ubayoini ndraʼugö tobali razo ba nono mbanua Yehowa, yaʼia daʼö iraono Gizaraʼeli.+
7 Bunu ngaʼötö Gahabi maʼafefu, ba yaʼo zanulöni khö Gizebela+ börö me no ibunu* ndra samaʼeleʼö khögu hegöi enoni Yehowa tanö böʼö.
8 Ubunu fefu nösi nomo Gahabi. Uhori ndra matua* ba nösi nomonia irugi wondrege zide-ide ba gotalua ndraono Gizaraʼeli.+
9 Uhori fefu nösi nomo Gahabi simane ösi nomo Yerobeamo+ ono Nebati ba simane ösi nomo Mbaesa+ ono Gahia.
10 Asu dania zi manga Izebela ba danö Yezereʼeli+ ba lö lakoʼo.’” Aefa daʼö, moloi zohalöwö andrö.+
11 Me ifuli ia Yehu khö ndra kumandru zaradadu tanö böʼö, manofu ira, ”Hewisa, lö hadia ia?” Imane, ”Tatu no aboto ba dödömi haniha ia. Lö tefaudu niwaʼönia.”
12 Ba lamane khönia, ”Böi falimo khöma.” Imane, ”Daʼa niwaʼö niha daʼö khögu, aefa daʼö inönö wangumaʼö, ’Daʼa niwaʼö Yehowa: ”Ubayoini ndraʼugö tobali razo ndraono Gizaraʼeli.”’”+
13 Me larongo daʼö, laʼanemaiʼö laheta nukhara sebua ba labeʼe ba mbosi nora nitörö Yehu,+ ba lafoli dorofe nifazökhi moroi ba dandru ba lamane, ”No tobali razo Yehu!”+
14 Ba mamagölö Yehu+ ono Yozafati ono Nimisi ba wolawa Yoramo.
Ba Ramoti-gileadi+ so Yoramo awö ndraono Gizaraʼeli maʼafefu börö Hazaeli+ razo Siria.
15 Hizaʼi, mangawuli Razo Yoramo ba Yezereʼeli+ enaʼö döhö zokhonia nifesokho niha Ziria me ilawa Hazaeli razo Siria.+
Imane Yehu, ”Na faʼawö ami khögu, böi tehegö moloi gofu haniha ba mbanua andre ba wangombakha ba Yezereʼeli.”
16 Aefa daʼö, möi Yehu ba gureta wasuwötania ba mofanö ia ba Yezereʼeli börö me so Yoramo ba daʼö. No ifadölö ia Yoramo me no mesokho ia, ba möi Gahaseya razo Yehuda ba wamaigi yaʼia.
17 Me iʼila sozago malige Yezereʼeli wa no ahatö ndra saradadu Yehu, iʼanemaiʼö imane, ”So zaradadu si tohare.” Imane Yoramo, ”Fatenge samösa zaradadu si fakudo samalukhaisi yaʼira ba wanofu, ’Hadia ba wolohe faʼatulö wa tohare ami?’”
18 Ba tohare samösa zaradadu si fakudo samalukhaisi yaʼia imane, ”Daʼa niwaʼö Razo, ’Hadia ba wolohe faʼatulö wa tohare ami?’” Imane Yehu, ’Tenga urusau daʼö. Oʼö manö ndraʼo moroi furi!”
Imane sanaro, ”No falukha ira ngoni-ngonimö andrö, hizaʼi lö sangawuli ia.”
19 Ifuli zui ifatenge zaradadu si mendrua. Me falukha ira, imane ngoni-ngoni andrö, ”Daʼa niwaʼö Razo, ’Hadia ba wolohe faʼatulö wa tohare ami?’” Imane Yehu, ”Tenga urusau daʼö. Oʼö manö ndraʼo moroi furi!”
20 Iʼombakhaʼö sanaro andrö, ”No falukha ira, ba lö mangawuli ia. Lagunia wolohe kudo wasuwöta fagölö simane folohe Yehu maʼuwu* Nimisi, börö me toʼölö ia wolohe kudo nifolohe zowöhö.”
21 Imane Yoramo, ”Faʼanö gureta wasuwöta!” Me no aefa mufaʼanö, mofanö Yoramo razo ndraono Gizaraʼeli hegöi Ahaseya+ razo Yehuda, latörö gureta wasuwöta khöra zamösana ba wamalukhaisi Yehu. Falukha ira ba danö Naboti+ niha Yezereʼeli.
22 Ba me iʼila Yehu, imane Yoramo, ”Hadia ba wolohe faʼatulö wa tohare ndraʼugö Yehu?” Imane, ”Hewisa wa molohe faʼatulö ndraʼo sagötö lö ibato wohorö-horö* inau Izebela+ ba oya ngawalö wakelemusa nifaluania!”+
23 Iʼanemaiʼö ibaliʼö mbagi gureta wasuwötania Yoramo ba moloi ia. Imane khö Gahaseya, ”No lalimo ita!”
24 Ituyu nono wanania Yehu, ifana hulu Yoramo andrö atöla ofeta ba dödö. Mate Yoramo ba gureta wasuwötania.
25 Aefa daʼö imane Yehu khö nawönia Bidekari, ”Fazaumba ia ba kabu Naboti niha Yezereʼeli andrö.+ Törö tödöu, me fao ita fakureta ba tagoʼö-goʼö moroi furi namania Ahabi, no iwaʼö Yehowa wanguhuku andre khönia,+
26 ’Imane Yehowa, ”Menewi, no uʼila me labunu Naboti+ hegöi iraononia.”* Imane nasa Yehowa, ”Börö daʼö usulöni+ göi khöu zimane daʼö ba kabunia andre.”’ Iadaʼa, fazaumba ia ba kabu andrö moloʼö niwaʼö Yehowa.”+
27 Me iʼila zalua andrö, moloi Gahaseya+ razo Yehuda itörö kabu sebolo. Ba gafuriata, igohi ia Yehu ba imane, ”Bunu ia!” Lafana ia yawa ba gureta wasuwötania ba lala numalö ba Guri ahatö Yibelea.+ Lö ibato woloi numalö ba Megido ba mate ia ba daʼö.
28 Laʼohe ia ira enoninia faoma kureta wasuwöta ba Yeruzalema ba lakoʼo ia ba lewatö ndra tuania ba Mbanua Dawido.+
29 Me no 11 fakhe mamatörö Yoramo ono Gahabi, mufataro Gahaseya+ tobali razo ba Yehuda.
30 Me irongo Izebela+ wa möi Yehu ba Yezereʼeli,+ ihaogö wangaitöni röngö-röngönia ba ihaogö mbunia. Aefa daʼö, ifaigi-faigi moroi yawa ba zandrela.
31 Me ofeta Yehu ba mbawa göli, imane Izebela, ”Hadia lö olifuʼö zalua khö Zimeri, samunu sokhö yaʼia?”+
32 Ifaöga ia Yehu wamaigi sandrela si yawa imane, ”Haniha zi faʼawö khögu? Haniha?”+ So darua mazui datölu zondröniaʼö ba gödo razo, lafaigi ia moroi si yawa.
33 Imane, ”Mifazaumba ia si tou!” Lafazaumba si tou Gizebela ba tokana ndronia ba dowa hegöi ba kudo ba lahundra-hundra ia kudo.
34 Aefa daʼö, möi manga Yehu ba mamadu idanö. Lö ara imane, ”Miʼaeʼe mifaigi ndra alawe niʼelifi andrö ba mikoʼo, börö me ono razo ia.”+
35 Hizaʼi, me möi ira ba wogoʼo yaʼia, hatö sole högö nisöndrara, ahe awö laluʼa danga si dombua.+
36 Me mangawuli ira ba laʼombakhaʼö khö Yehu, imane, ”No itörö niwaʼö Yehowa+ simane si no ifaʼema khö genoninia Elia niha Disebe, ’Asu dania zi manga Izebela ba danö Yezereʼeli.+
37 Ba tobali pupu gamatela Gizebela ba danö Yezereʼeli, irege lö hadöi sangila wa Izebela daʼö.’”
Nisura ba gahe zura
^ Mazui ”börö ndro”.
^ Sin.: ”gofu haniha zi kiö ba dowa”. Daʼa ngawua wehede ba li Heberaiʼo fangailasi ndra matua.
^ Sin.: ”ono”.
^ Mazui ”ifalua wamosumange adu”.
^ Mazui ”no uʼila ndro Naboti hegöi do ndraononia”.
