Dua Samueli 1:1-27
1 Me no mate Zaulo, mangawuli Dawido me no ikalaisi* niha Gamaleki, ba toröi ia ba Zikelagi+ dua hari waʼara.
2 Ba ngaluo si tölu, so samösa ndra matua si otarai nose Zaulo. No asika mbarunia ba no fatambu-tambu högönia. Ituhi danö me iʼondrasi Dawido.
3 Manofu Dawido, ”Hezo öʼotarai?” Itema li, ”Soloi ndraʼodo moroi ba nose Gizaraʼeli.”
4 Imane Dawido, ”Hadia zalua? Fatunö khögu.” Itema li, ”No moloi zaradadu Gizaraʼeli ba wasuwöta andrö ba ato zi mate ba gotaluara. No mate göi Zaulo ba ononia Yonata.”+
5 Manofu Dawido khö nono matua solohe turia andrö, ”Hana wa öʼila wa no mate Zaulo faoma Yonata?”
6 Imane ono matua daʼö, ”Tefaudu so ndraʼo ba Hili Giliboa.+ Ba daʼö uʼila wa no itendroʼö ia Saulo ba dohonia, ba lagohi ia si fakudo hegöi kureta wasuwöta irege lakhamö ia.+
7 Me ifakhölö ia wamaigi yaʼo, ikaonido ba umane khönia, ’Hana Pa?’
8 Manofu ia, ’Haniha ndraʼugö?’ Umane khönia, ’Niha Gamaleki ndraʼodo.’+
9 Aefa daʼö imane, ’Ae ba daʼa, bunudo. Tebai utaha, lö nasa si mate ndraʼo.’
10 Andrö uhatöʼödo khönia ba ubunu ia,+ börö me uʼila wa tebai saʼae auri ia me no tegaölö ia tou ba waʼebua zokhonia andrö. Uhalö dakula si so ba högönia faoma galadanga si so ba mbölökhania, ba möido uʼohe khöu ba daʼa Pa.”
11 Me irongo daʼö Dawido, isika nukhania. Fefu zi fao khönia lafalua göi zimane daʼö.
12 Laʼeʼesi ba lakilaini wege-ege, aefa daʼö fuasö ira+ irugi bongi börö me no mate Zaulo faoma ononia Yonata, ono mbanua Yehowa, ba ato ndraono Gizaraʼeli+ si mate ba mbawa wöda.
13 Manofu Dawido khö nono matua solohe turia andrö, ”Hezo moroi khömi?” Itema li, ”Ngaʼötö niha Gamaleki ndraʼodo, niha si fatewu.”
14 Imane Dawido, ”Hana wa lö ataʼu ndraʼugö wamazawa tangau ba wamunu niha nibayoini Yehowa?”+
15 Ikaoni samösa nono buania Dawido ba imane, ”Ae ba daʼa, bunu ia.” Tohare nono bua Dawido, ibunu nono matua daʼö ba mate.+
16 Imane khönia Dawido, ”Yaʼugö samösa zoluʼi faʼamatemö* börö me beweu zamaduhuʼö, ’Yaʼodo zamunu niha nibayoini Yehowa.’+
17 Andrö wa iʼanunöisi Dawido zinunö fangeʼesi sanandrösa khö Zaulo hegöi ononia Yonata.+
18 Iwaʼö göi ba niha Yehuda wa moguna lafahaʼö ira ba zinunö fangeʼesi andrö. Tuho zinunö daʼö ”Fana Nifosinali”, nisura ba mbuku Yasa.+ Daʼa nösinia:
19 ”Faʼasökhiu yaʼugö Izaraʼeli, no labunu ba nahia sagalawa.+
No mate niha sagabölö khöu!
20 Böi dunö-dunö daʼö ba Gata,+Böi ombakhaʼö daʼö misa ba lala Gasekalo,Enaʼö lö omuso dödö ndraono alawe Wilisiti,Enaʼö lö owua-wua dödö ndraono alawe niha si lö nisuna.
21 Yaʼami hili-hili Giliboa,+Böi göna ami namo mazui teu,Mazui benua sangaʼasogö tolo-tolo niʼamoniʼö,+Börö me raʼiö mbaluse niha sagabölö ba daʼö,Ba lö saʼae mubayoini mbaluse Zaulo faoma fanikha.
22 Moroi ba ndro niha si mate, moroi ba dawö niha sagabölö,Lö mangawuli nono wana Yonata,+Ba lö mangawuli wöda Zaulo na lö mofozu.+
23 Saulo ba Yonata,+ nihakhösi tödö ba niʼomasiʼö sandrohu faʼaurira,Lö fabali ba waʼamate.+
Alio ira moroi ba moyo,+Abölö moroi ba zingo.+
24 Yaʼami ono alawe Gizaraʼeli, miʼeʼesi Zaulo,Samobaru yaʼami faoma nukha soyo ba sebua böli,Sangehaogö nukhami faoma anaʼa.
25 No ahori mate niha sagabölö ba wasuwöta!
No labunu Yonata ba nahia sagalawa khöu!+
26 Uʼamalösi sibai ndraʼugö talifusögu Yonata,Omasido sibai ndraʼugö.+
Faʼomasimö khögu töra moroi ba waʼomasi ndra alawe.+
27 No mate niha sagabölö khöuBa no ahori tekiko wangöna ba wasuwöta!”
