Dua Samueli 10:1-19
-
Kala niha Gamoni hegöi Siria (1-19)
10 Samuza inötö, mate razo niha Gamoni,+ ba ononia Hanuni zi tobali razo fangalinia.+
2 Imane Dawido, ”Uforomaʼö waʼomasi si lö faröi khö Hanuni ono Nahasi, simane faʼomasi si lö faröi niforomaʼö namania khögu.” Ifatenge ndra sawuyunia Dawido ba wondrara tödö Hanuni me no mate namania. Hizaʼi, me ofeta ndra sawuyu Dawido ba mbanua niha Gamoni,
3 lamane ira sondröniaʼö banua Gamoni khö Hanuni sokhö yaʼira, ”Hadia faduhu dödöu wa ifosumange namamö andrö Dawido irege ifatenge zawuyunia ba wondrara tödöu? Hadia tenga ba wamareso hegöi ba wamauze banua daʼa wa ifatenge ira ba enaʼö ikalaisi ndraʼugö?”
4 Börö daʼö, ifaraʼuʼö zawuyu Dawido andrö Hanuni. Itöwö gambira si tambai,+ aefa daʼö itaba mbarura irugi daroʼo, ba ifofanö ira.
5 Me lafatunö khö Dawido, iʼanemaiʼö ifatenge niha ba wamalukhaisi yaʼira börö me no laʼailasi sibai ira. Imane Razo, ”Miʼiagö manö Yerikho+ irege ifuli anau gambimi, awena miʼangawuli.”
6 Me no laʼila ira niha Gamoni wa fatuwu Dawido khöra, lafatenge niha ba lagazi niha Ziria moroi ba Mbeti-rehobo+ ba niha Ziria moroi ba Zoba,+ so 20.000 zaradadu sanörö tanö, 1.000 ndra saradadu si fao khö razo Maʼakha,+ ba 12.000 niha moroi ba Gisitobi.*+
7 Me irongo daʼö Dawido, ifatenge Yoabi awö ndra saradadu maʼafefu, simanö göi ndra saradadu sagabölö fasuwö.+
8 Möi föna niha Gamoni, lafaʼoli ira ba wasuwöta ba lala numalö ba mbawa göli mbanua. Ba mbenua sebolo so niha Ziria moroi ba Zoba ba moroi ba Rehobo, fao khöra Gisitobi* ba Maʼakha.
9 Me iʼila Yoabi lasuwö ira moroi föna ba simanö göi moroi furi, ifili ösa ndra saradadu sagabölö ba Gizaraʼeli, aefa daʼö ifaʼoli ira ba wolawa niha Ziria.+
10 Tanö böʼö, ibeʼe ba danga Gabizaʼi talifusönia+ ba wondröniaʼö yaʼira wolawa niha Gamoni.+
11 Imane Yoabi, ” Na abölö niha Ziria moroi khögu, ba mitolo ndraʼo. Hizaʼi, na abölö niha Gamoni moroi khömi, ba möido utolo ami.
12 Taʼabölöʼö ita ba böi ataʼu+ ba wangoʼawögö soida hegöi banua Lowalangida. Ifalua dania zi sökhi Yehowa ba wamaiginia.”+
13 Mofanö Yoabi awö ndra saradadunia ba wolawa niha Ziria, ba moloi niha Ziria fönara.+
14 Me laʼila no moloi niha Ziria, ba moloi göi niha Gamoni föna Gabizaʼi talifusö Yoabi, möi ira yomo ba mbanua. Me no awai lalawa niha Gamoni, mangawuli Yoabi ba Yeruzalema.
15 Me laʼila ira niha Ziria wa no kala ira labeʼe iraono Gizaraʼeli, lafuli zui laʼowuloi ndra saradadura.+
16 Möi Hadadezeri+ ba wogaoni niha Ziria si so ba mbanua Nungo Nidanö Oiferati+ ba tohare ira ba Helami, nidöniaʼö Zobakhi kumandru zaradadu Hadadezeri.
17 Me lafatunö khö Dawido, iʼanemaiʼö iʼowuloi fefu zaradadu ndraono Gizaraʼeli, laʼötö Nungo Nidanö Yoridano ba ofeta ira ba Helami. Möi föna niha Ziria ba lafaʼoli ira ba wasuwöta, lafaondragö Dawido ba wolawa yaʼia.+
18 Hizaʼi, moloi niha Ziria föna ndraono Gizaraʼeli, ba 700 niha zaradadu solohe kureta wasuwöta nibunu Dawido ba 40.000 zaradadu si fakudo. Ilawa göi Zobakhi kumandru zaradadu ba mate Zobakhi ba daʼö.+
19 Me anehe fefu ndra razo si no tabali sawuyu Hadadezeri wa no kala ira labeʼe iraono Gizaraʼeli, mangatulö ba mangalulu ira ba ndraono Gizaraʼeli.+ Lö saʼae barani niha Ziria ba wanolo niha Gamoni.
