Dua Samueli 11:1-27
11 Me böröta ndröfi,* ba ginötö fasuwö ndra razo, ifatenge Yoabi andrö Dawido fao ndra sawuyunia ba fefu zaradadu ndraono Gizaraʼeli ba wangohori niha Gamoni ba no lafaʼuʼu Raba.+ Ba Yeruzalema toröi Dawido.+
2 Samuza inötö me tanö owi,* maoso Dawido moroi ba naha wemörönia ba mowaö-waö ia ba dete nomonia. Moroi ba daʼö, iʼila samösa ndra alawe si mondri ba no baga-baga.
3 Ifatenge niha Dawido ba wanofu haniha sindruhunia ndra alawe andrö. Imane niha daʼö, ”Baseba+ daʼö, ono Geliami,+ foʼomo Guria+ niha Kheti.”+
4 Lö ara, ifatenge niha Dawido ba wamaondragö ira alawe daʼö.+ Tohare ia ba orudu khönia Dawido.+ Alua daʼa me inötö iʼamoniʼö ia ira alawe daʼö ba waʼaraʼiönia.*+ Aefa daʼö, mangawuli ia ba nomo.
5 Abeto ndra alawe daʼö, ba ifatenge niha ba wangombakha khö Dawido, ”Abeto ndraʼo.”
6 Me irongo daʼö, ifaʼoheʼö goroisania Dawido khö Yoabi, ”Waʼö khö Guria niha Kheti andrö enaʼö ifalukhaisi ndraʼo.” Ifalua daʼö Yoabi.
7 Me tohare Guria, isofu khönia Dawido hewisa Yoabi, ira saradadu, hegöi fasuwöta andrö.
8 Imane Dawido khö Guria, ”Angawuli ba nomo ba lau olombase.”* Me mofanö Guria moroi ba gödo razo, lafaʼoheʼö khönia mbuala* Razo.
9 Hizaʼi, ba mbawa göli gödo razo mörö Guria fao ia khö ndra sawuyu zokhö yaʼia. Lö mangawuli ia ba nomonia.
10 So zamatunö khö Dawido, ”Lö sangawuli Guria ba nomonia.” Imane Dawido khö Guria, ”Hadia tenga awena mangawuli ndraʼugö? Hana wa lö mangawuliʼö ba nomou?”
11 Imane Uria khö Dawido, ”Ba nose misa so Dawöla+ hegöi ira saradadu Gizaraʼeli faoma Yehuda. Ba no toröi Yoabi sokhö yaʼo ba nose misa ba mbenua. Hewisa wa mangawuli ndraʼo ba nomo ba wemanga, ba wamadu, ba orudu ndraʼo khö woʼomogu?+ Möido khöu ba hölu sagötö faʼauri ba faʼanau nosou, lö ufalua daʼö!”
12 Aefa daʼö imane Dawido khö Guria, ”Ba daʼa manö iagö bongi. Mahemolu awena utehegö mofanö ndraʼugö.” Ba Yeruzalema toröi Guria ba zi maʼökhö daʼö irugi mahemolunia.
13 Ikaoni ia Dawido ba wemanga, ba mamadu ira enaʼö mabu Guria. Hizaʼi ba zi bongi daʼö, lö mangawuli Guria ba nomonia, fao ia wemörö khö ndra sawuyu zokhö yaʼia.
14 Sihulö wongi daʼö, ibeʼe zurania Dawido khö Yoabi nifaʼoheʼönia khö Guria.
15 Imane ba zura andrö, ”Tanö föna mibeʼe Guria ba wasuwöta sabölö-bölö, ba miwuwu ami furi enaʼö labözi ia ba mate.”+
16 Me luo daʼö, no ihaogö wamaigi banua andrö Yoabi. Iʼila hezo gamaudu so ndra saradadu sabölö fasuwö, ba daʼö ifatenge Guria.
17 Me möi baero niha mbanua daʼö ba wolawa Yoabi, so ösa zi mate saradadu Dawido, ba mate göi Guria niha Kheti andrö.+
18 Ifatunö Yoabi khö Dawido fefu zalua ba wasuwöta andrö.
19 Imane khö denge-tengenia Yoabi, ”Na no öfatunö khö Razo fefu zalua ba wasuwöta andre,
20 te mofönu khöu Razo ba imane, ”Hana wa mihatöʼö sibai ami ba mbanua daʼö? Hadia lö miʼila wa lafana ami moroi yawa ba dete göli?
21 Haniha zamunu Abimelekhi+ ono Yerubeseti?*+ Hadia tenga ira alawe zamunu yaʼia ba Debesi me ifazaumba ba högönia gara wogili moroi yawa? Hana wa mihatöʼö sibai ami ba dowa göli?’ Na simane daʼö, ömane wangumaʼö, ’No mate göi zawuyumö sotöi Uria niha Kheti andrö.’”
22 Ba mofanö denge-tenge andrö, ifaʼema fefu goroisa Yoabi khö Dawido.
23 Imane tenge-tenge andrö khö Dawido, ”Abölö nasa zaradadura moroi khöma. Möi ira baero ba wolawa yaʼaga ba mbenua, hizaʼi mangawuli ira furi mabeʼe ba mbawa göli.
24 Lasuwö ndra sawuyumö ira solohe fana moroi yawa ba dete göli, ba so ösa zi mate. Mate göi zawuyumö sotöi Uria niha Kheti andrö.+
25 Me irongo daʼö Dawido, imane ba niha nifatenge andrö, ”Waʼö khö Yoabi, ’Böi abusi tödö zalua andre. Tola mate ba wöda gofu haniha manö. Falua wasuwöta nasa si töra moroi ba daʼa ba kalaisi mbanua daʼö.’+ Farou dödönia.”
26 Me irongo foʼomo Guria wa no mate woʼomonia, ibörögö iʼeʼesi.
27 Me no awai ginötö wangeʼesinia, ifatenge niha Dawido ba wolohe yaʼia ba gödo ba ihalö foʼomonia ndra alawe daʼö+ ba tumbu khöra nono matua. Hewaʼae simanö, fatuwu khö Yehowa nifalua Dawido.+
Nisura ba gahe zura
^ Yaʼia daʼö baŵa woliwiö.
^ Mazui ”me bongi”.
^ Te raʼiö börö waʼafökhö dalu.
^ Sin.: ”ba sasai gaheu”.
^ Mazui ”tana khö razo”, yaʼia daʼö buala nibeʼe ba niha nifosumange.
^ Eluahania Gideono mazui Yerubi-mbaʼali. Faigi Zangu 6:32.
