Dua Samueli 2:1-32
2 Aefa daʼö manofu Dawido khö Yehowa,+ ”Hadia sökhi na möido fazambua ba mbanua Yehuda?” Imane Yehowa, ”Aeʼe.” Manofu zui Dawido, ”Hezo möido?” Imane khönia, ”Ba Heberona.”+
2 Börö daʼö mofanö Dawido, fao woʼomonia si darua yaʼia daʼö Ahinoa+ niha Yezereʼeli ba Abigaila+ si no irai tobali foʼomo Nabalo niha Garimeli.
3 Iʼohe göi nono buania Dawido,+ ba fao nösi nomora zamösana. Toröi ira ba mbanua si so ba zi fasui Heberona.
4 Lö ara, tohare niha Yehuda ba labayoini ba daʼö Dawido tobali razo ba ngaʼötö niha Yehuda.+
Lafatunö khö Dawido, ”Niha Yabesi-gileadi zogoʼo Saulo.”
5 Andrö ifatenge niha Dawido ba Yabesi-gileadi enaʼö lamane, ”Yaʼifahowuʼö ami Yehowa börö waʼasökhi dödömi* khö Zaulo sokhö yaʼami me mikoʼo ia.+
6 Yaʼiforomaʼö göi khömi waʼasökhi dödö* Yehowa ba lö faröi ia khömi. Uforomaʼö göi khömi waʼahakhö dödö börö zi no mifalua andre.+
7 Iadaʼa, miʼabeʼeʼö dangami ba böi miʼataʼufi. No mate Zaulo sokhö yaʼami ba no lafataro ndraʼo ira ngaʼötö Yehuda tobali razora.”
8 Hizaʼi, kumandru zaradadu Zaulo sotöi Abineri+ ono Neri, no iʼohe Gisi-bose+ ono Zaulo andrö yefo ba Mahanaʼi+
9 ba ibaliʼö razo ba mbanua Gileadi,+ niha Gaseri, Yezereʼeli,+ Eferai,+ Beniami, hegöi ba Gizaraʼeli maʼasagörö.
10 Me mufataro Gisi-bose tobali razo ba Gizaraʼeli, faʼalawa ndröfinia yaʼia daʼö 40 fakhe ba dua fakhe mamatörö ia. Hewaʼae simanö, khö Dawido faʼawö niha Yehuda.+
11 Ba Heberona lafataro Dawido tobali razo ba ngaʼötö Yehuda, ba mamatörö ia fitu fakhe a matonga.+
12 Ba gafuriata, mofanö zaradadu Gisi-bose ono Zaulo awö Gabineri ono Neri andrö moroi ba Mahanaʼi,+ möi ira ba Gibeona.+
13 Ba lakhamö ira ba mbaʼa nidanö Gibeona ira Yoabi+ ono Zeruya+ awö zaradadu Dawido. Tanö ba daʼa modadao ngawawa zaradadu si sambua ba tanö yefo so ngawawa zaradadu si sambua.
14 Imane Abineri khö Yoabi, ”Akha fasöndra* nono buamö ba nono buagu ba zanehe ita.” Imane Yoabi, ”Lau.”
15 Ba lafili 12 niha Mbeniami moroi ba zaradadu Gisi-bose ba 12 niha moroi ba zaradadu Dawido.
16 Dozi ira lasöbi mbu högö nawöra ba lafahö dalu nawöra faoma föda irege fagölö-gölö mate ira. Daʼö mbörö wa lafotöi nahia si so ba Gibeona andrö Helikata-hazuri.
17 Aefa daʼö, alua wasuwöta sabölö-bölö, ba kala Gabineri faoma saradadu Gizaraʼeli föna ndra saradadu Dawido.
18 So göi ba daʼö nono matua si datölu khö Zeruya,+ yaʼia daʼö Yoabi,+ Abizaʼi,+ ba Azaheli.+ Alio sibai gahe Gazaheli andrö fagohi, hulö gahe mböhö ba mbenua.
19 Lö iböhöli wolohi Abineri ba maʼifu lö iholeʼö ia.
20 Me ifaigi furi Abineri imane, ”Hadia yaʼugö daʼö Azaheli?” Itema li, ”Yaʼia.”
21 Imane Abineri, ”Holeʼö ndraʼugö ba gambölö mazui ba gabera, raʼu fazamösa nono buagu ba halö zi so khönia.” Hizaʼi lö iböhöli Azaheli ba wolohi yaʼia.
22 Ifuli zui imane Abineri khö Gazaheli, ”Böhöli wolohi yaʼo. Hadia hasambalö ubunu ndraʼugö? Na ufalua daʼö, hewisa wa tola ufaigi saʼae mbawa dalifusöu Yoabi?”
23 Hizaʼi, lö iböhöli fagohi Azaheli. Andrö wa ifahö mbetuʼania Abineri, itaruʼö ndranga doho+ irege atöla fatambai ba mate ba daʼö Gazaheli. Dozi niha sanörö daʼö, tebato ira wamaigi sabata.
24 Lagohi Gabineri ira Abizaʼi faoma Yoabi. Me no aekhu luo, ofeta ira ba Hili Gama sangotahögö Gibeata ba lala numalö ba Danö si Mate Gibeona.
25 No owulo niha Mbeniami ba daʼö, ba laʼoʼö Gabineri. Laʼosambuaʼö ira ba lalau mosindro ba zuzu hili.
26 Mohede Gabineri khö Yoabi, ”Hadia lö taböhöli wabunusa? Hadia lö öʼila wa ha faʼalösökhi lua-lua daʼa? Hawaʼara öwaʼö ba zaradadumö enaʼö laböhöli wolohi talifusöra?”
27 Imane Yoabi, ”Faya wa no sauri Lowalangi sindruhu, na tenga simane daʼa huhuomö, mahemolu sihulö wongi awena laböhöli ira saradadu wolohi ira talifusöra.”
28 Ifoli Yoabi dorofe nifazökhi moroi ba dandru irege laböhöli ira saradadunia wolohi iraono Gizaraʼeli, ba tebato wasuwöta.
29 Latörö Garaba ira Abineri faoma saradadunia+ ba zi sara wongi daʼö, laʼötö Nungo Nidanö Yoridano, laʼanöröi fefu ndraso daʼö* ba awena ofeta ira ba Mahanaʼi.+
30 Me no iböhöli Yoabi wolohi Abineri, iʼowuloi fefu ndra saradadunia. No taya 19 niha zaradadu Dawido, baero Gazaheli.
31 No lakalaisi ira saradadu Dawido niha Mbeniami hegöi saradadu Gabineri, ba 360 niha zi mate moroi ba gotaluara.
32 Laʼohe Gazaheli+ ba lakoʼo ia ba lewatö namania ba Mbetilekhema.+ Aefa daʼö, mofanö Yoabi faoma ira saradadunia sara wongi waʼara ba larugi Heberona+ me arakhagö moluo.
Nisura ba gahe zura
^ Mazui ”waʼomasi si lö faröi niforomaʼömi”.
^ Mazui ”waʼomasi si lö faröi”.
^ Mazui ”fatandri”.
^ Mazui te ”Mbitirono maʼasagörö”.
