Dua Samueli 4:1-12
4 Ataʼu* Gisi-bose ono Zaulo+ me irongo wa no mate Gabineri ba Heberona,+ ba manizi dödö ndraono Gizaraʼeli maʼafefu.
2 So ngawawa niha sorabu khö nono Zaulo nidöniaʼö nono buania si darua, yaʼia daʼö Baʼana faoma Rekhabi. Yaʼira andrö ono Rimona niha Mbeʼeroti moroi ba mado Mbeniami. Me mböröta, tefarahu Mbeʼeroti+ ba mado Mbeniami.
3 Moloi niha Mbeʼeroti ba Gitaʼi,+ ba toröi ira ba daʼö tobali niha si fatewu irugi maʼökhö.
4 Ono Zaulo sotöi Yonata,+ so nononia sakela-kela.+ Töinia Mefibose.+ Awena lima fakhe ndröfinia me terongo duria moroi ba Yezereʼeli+ sanandrösa khö Zaulo faoma Yonata. Me luo daʼö, iluʼi ia ira alawe sondrorogö yaʼia ba iʼoloiʼö. Hizaʼi, börö me moloi zondrorogö yaʼia andrö ba waʼataʼu, alabu Mefibose ba fabesu gahenia.
5 Rekhabi faoma Baʼana ono Rimona niha Mbeʼeroti, möi ira ba nomo Gisi-bose ba zi talu luo me tefaudu mörö ia.
6 Möi ira+ ba nomo daʼö laʼosangai gandru ira, lafahö Gisi-bose ba lalau moloi.
7 Me möi ira yomo ba nomo daʼö, no mörö ia si bakha ba mbateʼe, labunu ba lataba mbaginia. Aefa daʼö, mofanö ira numalö ba Garaba sara wongi waʼara.
8 Laʼohe högö Gisi-bose+ khö Razo Dawido ba Heberona ba lamane, ”Yaʼe högö Gisi-bose ono Zaulo si faʼudu khöu,+ sedöna mamunu yaʼugö.*+ Maʼökhö andre no isulöni Yehowa khö Zaulo hegöi ba ngaʼötönia.”
9 Imane Dawido khö Rekhabi faoma Baʼana talifusönia, ono Rimona niha Mbeʼeroti, ”Faya wa no sauri Yehowa sangefaʼö yaʼo* moroi ba ngawalö gabula dödö,+
10 me tohare samösa zangombakha khögu, ’No mate Zaulo,’+ iwalingagö turia somuso dödö niʼohenia, andrö wa ubunu ia+ ba Zikelagi. Daʼö zulö nibeʼegu khönia ba wamaʼemania turia daʼö!
11 Hadia tenga no abölö-bölö zalua na labunu niha si lö sala ba nomonia samösa ira niha si lö sökhi, ba nahania wemörö? Hadia tenga sinangea usugi khömi ndronia+ ba uhori ami ba gulidanö?”
12 Aefa daʼö, iwaʼö ba nono buania Dawido enaʼö labunu ndra niha daʼö.+ Lataba danga awö gahera ba latawi gamatelara+ ba zinga mbaʼa nidanö ba Heberona. Hizaʼi, laʼohe högö Gisi-bose ba lakoʼo ia ba lewatö Gabineri ba Heberona.
