Dua Samueli 6:1-23
6 Ifuli zui iʼowuloi ndra saradadu sagabölö ba Gizaraʼeli Dawido, 30.000 niha waʼato.
2 Möi ira ba Mbaʼali-yuda ba wangai Tawöla Lowalangi sindruhu,+ börö me föna Dawöla andrö muʼao niha ba döi Yehowa samatörö saradadu zorugo+ si dadao yawa* kerubi.+
3 Hizaʼi, labeʼe ba dete goroba si bohou Dawöla Lowalangi sindruhu+ ba lafindrakö moroi ba nomo Gabinadabi+ si so ba hili-hili. Usa ba Ahio ono Gabinadabi zanuturu lala goroba si bohou andrö.
4 Laʼohe Dawöla Lowalangi sindruhu moroi ba nomo Gabinadabi si so ba hili-hili, ba tanö föna Dawöla andrö mowaö-waö Gahio.
5 Dawido hegöi iraono Gizaraʼeli lafalua gowasa föna Yehowa. Laʼogunaʼö ngawalö wakake zinunö nifazökhi moroi ba geu juniper, harafa, fakake zinunö nifosinali,+ tamburu,+ siʼöli nifaondra wamözi*+ hegöi ngawalö fakake zinunö tanö böʼö.
6 Hizaʼi, me ofeta ira ba naha wamöbörö ba Nakhono, itufa tangania Usa ba wololohe Tawöla Lowalangi sindruhu+ börö me arakhagö asoʼa Dawöla andrö ba hulu zawi.
7 Daʼö mbörö wa mofönu sibai Yehowa khö Gusa, ba ibunu ia Lowalangi sindruhu+ börö me iʼaohasi ba dödö Goroisa Lowalangi.+ Mate ba daʼö Gusa, ba zinga Dawöla Lowalangi sindruhu.
8 Hizaʼi, mofönu* Dawido me ifalua wönunia Yehowa khö Gusa. Andrö wa lafotöi nahia daʼö Feresi-usa* irugi maʼökhö.
9 Ba zi maʼökhö daʼö, ataʼu Dawido khö Yehowa+ ba imane, ”Hewisa wa tola uʼohe ba mbanuagu Dawöla Yehowa?”+
10 Lö omasi Dawido wolohe Tawöla Yehowa andrö ba nahiania ba Mbanua Dawido.+ Iwaʼö ba niha enaʼö laʼohe ba nomo Gobedi-edomo+ niha Gata andrö.
11 Tölu waŵa waʼara Dawöla Yehowa ba nomo Gobedi-edomo niha Gata, ba ifahowuʼö Gobedi-edomo andrö Yehowa awö nösi nomonia maʼafefu.+
12 So zangombakha khö Razo Dawido, ”No ifahowuʼö nösi nomo Gobedi-edomo andrö Yehowa ba fefu gokhötania börö Dawöla Lowalangi sindruhu.” Ba mofanö Dawido wangai Tawöla Lowalangi sindruhu moroi ba nomo Gobedi-edomo numalö ba Mbanua Dawido si fao faʼomuso dödö.+
13 Me no lafazawa+ Dawöla Yehowa andrö önö mbeka laʼofanöi, itaba zawi ba urifö satabö Dawido, ibaliʼö sumange.
14 Manari Dawido föna Yehowa si fao faʼomuso dödö, ba no ifake* nukha gere* nifazökhi moroi ba nukha si sökhi.+
15 Dawido ba fefu ndraono Gizaraʼeli, laʼohe Dawöla+ Yehowa si fao faʼomuso dödö+ ba lafoli dorofe nifazökhi moroi ba dandru.+
16 Hizaʼi, me ofeta Dawöla Yehowa ba Mbanua Dawido, ifaigi-faigi ia Mikhala ono Zaulo+ andrö moroi ba zandrela, iʼila me manaoka-naoka Razo Dawido ba manari-manari ia föna Yehowa. Ibörögö iʼosiwawöi Dawido bakha ba dödönia.+
17 Andrö laʼohe Dawöla Yehowa ba labeʼe ba nose nifazökhi Dawido khönia.+ Aefa daʼö, ibeʼe zumange nitunu+ ba sumange fangatulö+ föna Yehowa.+
18 Me no aefa ibeʼe zumange nitunu ba sumange fangatulö, ifahowuʼö soi daʼö Dawido ba döi Yehowa samatörö saradadu zorugo.
19 Idozigö fefu nono mbanuania, dozi soi ndraono Gizaraʼeli, ira matua ba ira alawe, roti niʼogaladanga, kue khorema, ba kue nifaruka bua nagu.* Aefa daʼö, mangawuli ira ba nomora zamösana.
20 Me mangawuli Dawido ba wamahowuʼö ösi nomonia, ifalukhaisi ia Mikhala ono Zaulo.+ Imane Mikhala, ”Molakhömi sibai Razo Gizaraʼeli maʼökhö daʼa me no iheta nukhania föna zawuyu ira alawe sohalöwö khönia, simane na iheta nukhania niha si lö ngaroro!”+
21 Me irongo daʼö, imane Dawido khö Mikhala, ”Uʼowasaini daʼa föna Yehowa börö me yaʼo nifilinia, tenga amau mazui ngaʼötönia. Yaʼia zamataro yaʼo ba wondröniaʼö ono mbanua Yehowa, Izaraʼeli.+ Uʼowasaini daʼa föna Yehowa,
22 ba uʼide-ideʼö ndraʼo nasa irege utehegö na teʼoʼaya ndraʼo töra moroi ba daʼa. Hizaʼi, tefolakhömi ndraʼo föna zawuyu ira alawe nitötöimö andrö.”
23 Lua-luania, lö moʼono Mikhala ono Zaulo+ andrö irugi waʼamatenia.
Nisura ba gahe zura
^ Mazui te ”ba gotalua”.
^ Mazui ”simbal”. Daʼa alat musik moroi ba ziʼöli, si hulö wiga niʼogaolo, lafaondra wamözi yaʼia na muʼogunaʼö.
^ Mazui ”abao dödö”.
^ Eluahania ”Fönu Sabölö-bölö khö Gusa”.
^ Sin.: ”iböbö khönia”.
^ Mazui ”efod”. Daʼa mbaru sebua si so tanö föna ba tanö furi.
^ Mazui ”kue kismis”.
