Dua Samueli 7:1-29
7 Samuza maʼökhö me toröi Razo ba gödonia,+ ba no iʼefaʼö ia Yehowa ba danga nudu samasui yaʼia,
2 imane Razo khö zamaʼeleʼö sotöi Natano,+ ”Ba gödo nifazökhi moroi ba geu eresi toröi ndraʼo,+ hizaʼi ba nose toröi Dawöla Lowalangi sindruhu.”+
3 Imane Natano khö Razo, ”Falua hadia manö zomasi dödöu, börö me fao khöu Yehowa.”+
4 Bongi daʼö, ifaʼema daromalinia Yehowa khö Natano imane,
5 ”Aeʼe, fatunö khö genonigu Dawido, ’Daʼa niwaʼö Yehowa: ”Hadia moguna öfazökhi nomo si tobali nahia waʼatoröigu?+
6 Iʼotarai me uheta ndraono Gizaraʼeli ba danö Miserai irugi maʼökhö,+ lö irai toröi ndraʼo ba zi sambua omo. Uʼanöröi misa nose.+
7 Sagötö wefaogu ba ndraono Gizaraʼeli, hadia no irai uwaʼö ba zi samösa satua mado ndraono Gizaraʼeli nifatarogu tobali kubalo nono mbanuagu Izaraʼeli, ’Hana wa lö mifazökhi khögu nomo moroi ba geu eresi?’”’
8 Waʼö daʼa khö genonigu Dawido, ’Imane Yehowa samatörö saradadu zorugo, ”Me so ndraʼugö ba mbenua ba wokubaloi urifö,+ ubaliʼö ndraʼugö sondröniaʼö ono mbanuagu Izaraʼeli.+
9 Fao ndraʼo khöu gofu hezo möiʼö,+ ba uheta fefu zi faʼudu khöu tanö fönau.+ Uʼalawaʼö dania döimö+ simane töi niha si tehöngö ba gulidanö.
10 Utatugöi dania sambua nahia ba nono mbanuagu Izaraʼeli, ba daʼö ufataro ira. Lö hadöi sametaʼu yaʼira ba daʼö ba lö hadöi niha si lö sökhi samakao yaʼira simane me mböröta,+
11 me awena ufataro zanguhuku+ ba nono mbanuagu Izaraʼeli. Yaʼodo göi zanimbagö si faʼudu khöu.+
”’”No göi ifatunö khöu Yehowa wa ifazökhi khöu dania Yehowa sambua nomo.*+
12 Na mate dania ndraʼugö+ ba lakoʼoʼö ba lewatö ndra tuau, yaʼo dania zamataro ngaʼötöu, onou matua,* ba uʼaroʼö wamatörönia.+
13 Yaʼia zamazökhi omo ba döigu,+ ba yaʼodo zangaʼaroʼö famatörönia sagötö faʼara.+
14 Tobali ndraʼo Amania ba onogu ia.+ Na ifalua zala, ubözi ia faoma siʼo niha, faoma bözi-bözi nono niha.*+
15 Lö uböda waʼomasigu si lö faröi khönia simane me uböda waʼomasigu khö Zaulo,+ niha nihetagu fönamö.
16 Lö tebulö fönau ngaʼötöu* hegöi famatörömö sagötö faʼara ba aro dadaomamö irugi zi lö aetu.”’”+
17 Ifaʼema Natano fefu wehede ba angilata daʼö khö Dawido.+
18 Aefa daʼö, möi yomo Razo Dawido ba modadao ia föna Yehowa imane, ”He Yehowa Lowalangi Fondrege Zalawa, haniha ndraʼodo? Ba haniha nösi nomogu irege öfalua khögu daʼa fefu?+
19 Hewaʼae na no moʼamböta daʼa ba wamaigimö, Yehowa Lowalangi Fondrege Zalawa, fahuhuo ndraʼugö wa lö tebulö sagötö faʼara ngaʼötö* genonimö andre ba zi so miföna, ba tobali amakhoita* daʼö ba niha gulidanö, Yehowa Lowalangi Fondrege Zalawa.
20 Hadia nasa zi tola iwaʼö khöu enonimö Dawido, börö me no anehe ndraʼugö haniha ndraʼodo,+ Yehowa Lowalangi Fondrege Zalawa?
21 Börö daromalimö ba moloʼö somasi dödöu, öfalua fefu zahöli-höli dödö andre ba öfaʼeleʼö khö genonimö.+
22 Daʼö mbörö wa fondrege zabölö ndraʼugö,+ Yehowa Lowalangi Fondrege Zalawa. Lö hadöi simane yaʼugö+ ba lö Lowalangi baero ndraʼugö.+ Fefu zi no marongo talingama, ba mafaduhuʼö daʼö.
23 Hadia so ba gulidanö andre zimane ono mbanuamö Izaraʼeli?+ Lowalangi zi möi mangöhöli yaʼira tobali ono mbanuania.+ Tehöngö döinia+ me ifalua khöra zahöli-höli dödö ba sataʼu ira.+ Öfofanö fefu soi awö lowalangira börö nono mbanuamö si no öhöli moroi ba Miserai ba döimö.
24 Öhonogöi nono mbanuamö Izaraʼeli tobali tana khöu sagötö faʼara,+ ba yaʼugö Yehowa, no tobali ndraʼugö Lowalangira.+
25 ”He Lowalangi Yehowa, falua zi no öfabuʼu sanandrösa khö genonimö hegöi ba ngaʼötönia sagötö faʼara, ba yaʼöfalua simane sibai nifabuʼumö.+
26 Yateʼalawaʼö döimö irugi zi lö aetu,+ irege lamane niha, ’Yehowa samatörö saradadu zorugo, yaʼia Lowalangi ndraono Gizaraʼeli,’ ba yalötebulö fönau dania ngaʼötö* genonimö Dawido andre,+
27 börö me yaʼugö Yehowa samatörö saradadu zorugo, Lowalangi ndraono Gizaraʼeli, no öfatunö khögu, ’Yaʼodo dania zamazökhi omo* khöu.’+ Daʼö mbörö wa lö ataʼu* genonimö andre wamaʼema khöu fangandrö daʼa.
28 He Yehowa Lowalangi Fondrege Zalawa, yaʼugö Lowalangi sindruhu, ba taromalimö zindruhu,+ ba no öfabuʼu khö genonimö andre ngawalö zi sökhi.
29 Andrö, yaʼedöna ndraʼugö ba wamahowuʼö ngaʼötö* genonimö ba yalötebulö ira fönau sagötö faʼara,+ börö me no öfabuʼu daʼa, yaʼugö Yehowa Lowalangi Fondrege Zalawa, ba börö howu-howumö, yatefahowuʼö ngaʼötö genonimö irugi zi lö aetu.”+
Nisura ba gahe zura
^ Mazui ”famatörö; ngaʼötö waʼarazo”.
^ Sin.: ”niha moroi ba hunö-hunöu”.
^ Mazui te ”nono Gadamo”.
^ Sin.: ”nomou”.
^ Sin.: ”nomo”.
^ Mazui ”fanuturu lala”.
^ Sin.: ”nomo”.
^ Mazui ”famatörö; ngaʼötö waʼarazo”.
^ Sin.: ”isöndra tödö”.
^ Sin.: ”omo”.
